Mwahichile makumbi atatu kufuma haze Natanyele alinungile hamukana watumbaji twaYesu vakulivanga. Yesu natumbaji twenyi vamwe vatalikishile kunote kungalila yakuNgalileya, kuze vafumine vosena. Vapwile nakuya kuKana, kuze afumine Natanyele. Kana yapwililile kujipili kunote yaNazaleta kuze akolelele Yesu. Vavasanyikile kuchifupawenga chipwe ngwetu kuchiwanyino chakulimbata kuKana.

Naye yaYesu nayikiye vamusanyikile kuchiwanyino kana. Chasoloka nge Maliya naikiye apwile nakuzangajala vyakulisa vangeji vavavulu vaze vejile kuchiwanyino, mwomwo alitachikijile natanga eyi yapwile nachechi chiwanyino. Ngachize omu amwene vinyo vinakumu, alwezele Yesu ngwenyi: “Kaveshi navinyoko.”—Yowano 2:3.

Mujila yikwavo Maliya apwile nakulweza Yesu alingeho chuma chimwe hakuwana nge vinyo vyakumine. Yesu amukumbulwile kuzachisa kashimutwiji kakusolola nge akanyine. Ambile ngwenyi: “Ove pwevo, mwomwo ikaze ami nayove natulizakamina hachuma kana?” (Yowano 2:4) Hakupwa Mwangana vatongola kuli Kalunga, Yesu atachikijile ngwenyi Ise wamwilu ikiye atelelele kumulweza vyakulinga, keshi nge vatanga jenyi chipwe masepa jenyiko. Ngocho Maliya asezele chihande kanechi mumavoko amwanenyi, kaha alwezele vaze vapwile nakuzata ngwenyi: “Lingenu vyeshovyo mwamilweza.”—Yowano 2:5.

Kwapwile milondo yamalolwa 6, mulondo himulondo wapwile kafwe jilita 40. Jino Yesu alwezele vaze vapwile nakuzata ngwenyi: “Zalisenu eyi milondo nameya.” Kaha Yesu ambile ngwenyi: “Switenumo jino mutwale kuli muka-kutwaminyina chiwanyino.”—Yowano 2:7, 8.

Muka-kutwaminyina chiwanyino awahililile chikuma hakuwaha chavinyo kana, oloze katachikijile ngwenyi vavikelele mujila yakukomwesako. Ngocho asanyikile mwenyamwenga, nakwamba kuli ikiye ngwenyi: “Vatu vosena veji kuvangilanga kulovola vinyo vyamwenemwene, kahomu navalinga hivananu nakupenda, numbanyi valovole vyavisamu. Oloze ove unalame vinyo vyamwenemwene kuheta noholili.”—Yowano 2:10.

Echi chikiko chuma chakukomwesa chatete alingile Yesu. Omu tumbaji twenyi vavahya vamwene chuma kana, lufwelelo lwavo lwazamine mbe. Kufumaho, Yesu nanaye navandumbwenyi vakatukile nakuya kuKapelenau, kuchau chakumulauko chakuKalungalwiji waNgalileya.