Yesu vamutachikijile chikuma hamyaka yayivulu, kufuma vene hakumumbapachisa. VaYuleya vavavulu vamwene vyuma vyakukomwesa alingilenga, kaha milimo azachilenga yatandakanyine mulifuchi lyosena. Vatu vavavulu vamutondelenga muYelusalema haChiwanyino chaJitavanaku (chipwe chaVisakila).

Vatu vapwile navishinganyeka vyakulisezaseza hali Yesu. Vamwe vambile ngwavo: “Mutu kana wamwaza.” Kaha veka ngwavo: “Nduma, kapwa mutu wamwazako, eji kuhungumwisanga vatu.” (Yowano 7:12) Vihande kana vavihanjikile chikuma kumaputukilo achiwanyino. Oloze naumwe wauchi ahamukile ahanjike hatoma nakuhakwila Yesu, mwomwo vatu vevwilenga woma vatwamina vavaYuleya.

Yesu ejile kutembele omu chiwanyino chahetele hakachi. Vatu vavavulu valikomokelele hauhashi wenyi wakunangula kanawa. Yesu kayile kumashikola avalapiko, ngocho vaYuleya vambile ngwavo: “Ou mutu ali ngachilihi nachinyingi chakutachikiza Visoneka, okunyi ikiye kalinangula kumashikolako?”—Yowano 7:15.

Yesu alumbunwine ngwenyi: “Vyuma ngweji kunangulanga kavyapwa vyamiko, oloze vyapwa vyayauze angutumine. Kachi nge mutu mwasaka kulinga mwaya muchima waIkiye, kaha mwatachikiza numba nge kunangula kanechi nguli nakunangula chafuma kuli Kalunga nyi ngweji kuhanjikanga vyayami ivene.” (Yowano 7:16, 17) Vyuma anangwilenga Yesu vyapwile vyamuJishimbi jaKalunga, kahechi chasolola nge asakile kuhana upahu kuli Kalunga keshi kuli iveneko.

Jino Yesu ambile ngwenyi: “Uno Mose kamihanyine Jishimbiko numba? Oloze naumwe wauchi hali enu eji kwononokanga Jishimbi kana. Nyi ika muli nakusaka kungujihila?” Vatu vamwe vapwile vangeji vaze vafumine kuvihela vyeka, kaha kavatachikijile nge kwapwile vamwe vasakile kumujihako. Ngocho valikomokelele chikuma hakwivwa nge kuli vamwe vasakile kujiha muka-kunangula wamwaza ngana. Shikaho vakukulwile ngwavo atela kuli vimwe vinaluwangana mumutwe wenyi, vize vinamulingisa ahanjike vyuma kana. Kaha vambile ngwavo: “Uli nandemone. Iyaze ali nakusaka kukujiha?”—Yowano 7:19, 20.

Hakavanga, kafwe himunahichi lyehi mwaka umwe nachimbwa, vatwamina vavaYuleya vasakile kujiha Yesu omu okile mutu haSambata. Yesu jino avahulishile chihula chakuvalingisa vashinganyeke chikuma nakusolola vishinganyeka vyavo vyakuhenga. Avanukishile cheka vyaLushimbi lwakwamba nge mwana walunga vatela kumujihana halikumbi lyakusokesa 8 numba tuhu likumbi kana lyaSambata. Kaha avahulishile ngwenyi: “Kachi nge mweji kujihananga mutu hasambata kuchina kuzomboka Jishimbi jaMose, nyi namupihilila ngachilihi nayami omu ngunoku mutu hasambata? Litwaminenu kusopesanga mutu kweseka nomu asoloka, oloze sopesenunga mwaya kusopesa chakwoloka.”—Yowano 7:23, 24.

Vatu vamuYelusalema vaze vatachikijile chihande kana vambile ngwavo: “Ou kumana keshi ikiye mutu vali nakusaka [vaka-kuyula] kujihako nyi? Talenu jino, ali nakuhanjika musana weye, kaha nevi vali nakuhanjikaho vyauchi. Ikiyenyi vaka-kuyula vanatachikiza chikupu ngwavo ou ikiye vene Kulishitu tahi?” Mwomwo ika vatu vahonene kufwelela ngwavo Yesu ikiye Kulishitu? Vambile ngwavo: “Etunyi tunatachikiza noku afuma ou mutu. Oloze omu mwakeza Kulishitu, kakweshi mutu mwakatachikiza okwo mwakafumako.”—Yowano 7:25-27.

Omu apwile kutembele, Yesu avakumbulwile ngwenyi: “Muvosena munangutachikiza, kaha munatachikiza noku ngwafuma nawa. Kaha nawa kangwalijilile ami iveneko, oloze Uze angutumine kwatwama chikupu, kahenu kamwamutachikizako. Ami ngunamutachikiza, mwomwo ngwafumine kuli ikiye, kaha ngunapu ngumuka-kumwimanyinako. Ou ikiye angutumine ami.” (Yowano 7:28, 29) Omu ahanjikile mazu kana, vasakile kumukwata vamumbile mukamenga chipwe kumujiha. Oloze vahonene, mwomwo lwola lwenyi lwakufwa te kanda luhete.

Chipwe ngocho, vatu vavavulu vafwelelele Yesu.  Atambukile hameya, aunjishile peho yanyamanganda, alishile makombakaji avatu mujila yakukomwesa nambolo yayindende natuvaishi, okile vaveji, navitonji, nakutonesa meso atupuputa, nakuka vaka-mbumba, nakuhindula vafu. Shikaho chatelelemo kuli vakiko kuhulisa ngwavo: “Omu mwakeza Kulishitu, kutala mwakalinga vinjikizo vyavivulu kuhambakana evi nalingi ou mutu numba?”—Yowano 7:31.

Omu vaFwaliseu vevwile liyongomena nalihanjika mazu kanawa, vakiko navapilishitu vavakulwane vatumine tupasu vayenga vakakwate Yesu.