Yesu apwilenga lika muYelusalema halikumbi lyaSambata. Omu apwile nakutambuka natumbaji twenyi munganda, vamwene muka-kulombalomba uze apwile kapuputa kufuma kukusemuka chenyi. Kaha tumbaji twenyi vahulishile Yesu ngwavo: “Ove Lapi, iya alingile shili numba ou mutu asemuke kapuputa, ivene tahi, nyi visemi jenyi?”—Yowano 9:2.

Tumbaji vatachikijile ngwavo mutu katwama nachuma chize cheji kuyoyanga shimbu kanda asemukeko, oloze vahuhwasanyine ngwavo pamo mutu nahase kulinga shili shimbu ali mujimo lyanaye. Yesu avakumbulwile ngwenyi: “Ou mutu kalingile shiliko, chipwe visemi jenyi vene kavalingile shiliko, oloze chapwile ngocho mangana milimo yaKalunga yisoloke kuhichila muli ikiye.” (Yowano 9:3) Shikaho, upuputa wayou lunga kawejile mwomwo ikiye chipwe visemi jenyi valingile shiliko, nduma. Oloze mwomwo yashili yaAlama, vatu vosena vasemuka vakuhona kukupuka mwosena nakupwa jino namisongo yakufwana nge upuputa. Ngocho upuputa wayauze lunga walingishile Yesu asolole milimo yaKalunga, ngana muze alingilenga hakuka vatu vapwilenga nakuviza.

Yesu asolwele nge milimo kana yapwile nakusakiwa kuyizata hahaze vene. Ambile ngwenyi: “Twatela kuzata milimo yayaUze angutumine shimbu kuchili musana. Ufuku uli nakwiza omu mutu naumwe wauchi mwahasa kuzata. Shimbu nguchili mukaye, ngunapu ngumumunyi wakaye.” (Yowano 9:4, 5) Chikupu vene, kufwa chaYesu kalinwomu chimwingise mumilima yamufuka muze keshi kukahasa kulinga chuma numba chimweko. Muholyapwa, Yesu napu kasulu kakumunyika mukaye.

Uno Yesu ahindwile uze lunga tahi? Nge mukiko, kaha mujila muka? Yesu afwijilile hamavu, ambachile aze mavu afwijilile maleji nakuwashila hameso ayauze lunga wakapuputa, kaha ambile ngwenyi: “Yako ukasane muchijiva chaShilowame.” (Yowano 9:7) Uze lunga alingile vene ngocho, kaha meso enyi atonene. Achishinganyekenu ocho kuwaha evwile ou lunga hakuputuka kumona lwola lwatete mukuyoya chenyi!

Vatu vaze alihachile navo navaze vamumwenenga valikomokelele chikuma. Vahulishile ngwavo: “Ou kumana keshi ikiye uze natwamenga nakulombalombako nyi?” Vamwe vakumbulwile ngwavo: “Ikiye vene.” Oloze vamwe vakanyine ngwavo: “Nduma, nalifwane nenyi kaha.” Kaha uze lunga akumbulwile ivene ngwenyi: “Yami vene.”—Yowano 9:8, 9.

Ngocho vamuhulishile ngwavo: “Nyi meso ove anatono ngachilihi?” Akumbulwile ngwenyi: “Mutu uze vavuluka ngwavo Yesu ambatanga mavu aze afwijilanga maleji, kaha angushilangawo hameso nakwamba kuli ami ngwenyi, ‘Yako kuShilowame ukasane.’ Shikaho ngwayanga nakusana, kaha ngunatono.” Kaha vamuhulishile ngwavo: “Mutu kana ali kulihi?” Uze lunga akumbulwile ngwenyi: “Kangwatachikijileko.”—Yowano 9:10-12.

Vatu vatwalile uze mutu kuli vaFwaliseu vaze vasakile kutachikiza mujila atonenenemo. Ngocho avalwezele ngwenyi: “Angushilanga mavu akufwijila maleji  hameso ami, kaha ngwasananga, ngocho nguli nakumona.” Chatelele kupwa chakutamo vaFwaliseu kuwahilila nauze lunga vatonesele. Oloze vamwe vapopolwele Yesu ngwavo: “Ou mutu kana kafuma kuli Kalungako, mwomwo keshi kujilila Sambatako.” Kaha veka vambile ngwavo: “Uno mutu muka-shili mwahasa ngachilihi kulinga vinjikizo vyangachize?” (Yowano 9:15, 16) Vatu kana vapwile navishinganyeka vyakulihandununa handununa.

Mwomwo yakupwa navishinganyeka vyakulihandununa handununa, vahulishile uze lunga vatonesele ngwavo: “Nyi ove muhanjikaho ika hali ikiye hakuwana nge nakutonesa meso ove?” Uze lunga kahuhwasanyineko, ngocho akumbulwile ngwenyi: “Ou hikapolofweto.”—Yowano 9:17.

VaYuleya kavetavilile vyuma kanako. Vashinganyekele ngwavo valivwasanyine naYesu mangana vongenga vatu. Hakusaka kuwana mashina namasongo, vasakile kuhulisa visemi jauze lunga mangana vatachikize numba nge chikupu vene apwile kapuputa.