Yesu ambile ngwenyi “utanga wamikoko waundende” ukiko kaha naukapwa nachihela muWangana wamwilu. (Luka 12:32) Oloze kukatambula wana kanou wakulipwila kachapwa chuma chize twatela kulelesako. Yesu asolwele omwo chalema mutu kupwa namuchima wamwaza hakusaka akapwe muWangana kana.

Chipwe ngocho, Yesu alwezele tumbaji twenyi valizange kumuvandamina omu mwakakinduluka. Ambile ngwenyi: “Vwalenu uvwalo nakupwa vakulizanga, kaha manongo enu apwenga akuwika kakahya. Pwenunga nge vatu vaze vali nakuvandamina kaka yavo uze mwakinduluka kufuma kuchilika chaulo, mangana omu mweza nakungongomweza, vakahase kumusokolwelako hahaze vene. Vawahilila vandungo vaze omu kaka yavo mweza mwavawana vanatono.”—Luka 12:35-37.

Tumbaji twaYesu vahashile kwivwishisa vyuma vyapwile muchifwanyisa chize ahanjikile. Vangamba avulukile valizangile kuvandamina kaka yavo omu mwakinduluka. Yesu alumbunwine ngwenyi: “Vawahilila vandungo kanava, kachi nge kaka yavo mweza hachilo chamuchivali [kafwe kufuma ha 21:00 nakuheta kafwe mukachi kaufuku], chipwe chamuchitatu [kufuma mukachi kaufuku nakuheta kafwe ku 3:00 yaufuku], mwavawana vanalizange lyehi.”—Luka 12:38.

Chifwanyisa kanechi chalumbunwine vyuma vyavivulu keshi nge kupwa kaha vaka-kuzata kanawa kuzuvo yakaka yavoko. Echi chasolokele hatoma omu Yesu Mwanamutu alivulukile ivene muchifwanyisa kanechi. Alwezele tumbaji twenyi ngwenyi: “Nayenu nawa pwenunga mwalizanga lyehi, mwomwo haola yize kamwashinganyekeleko, hakiko vene mweza Mwanamutu.” (Luka 12:40) Ngocho kulutwe, Yesu mwakakinduluka. Asakile vaka-kumukavangiza, chikumanyi vaze ‘vamuutanga wamikoko waundende’ vapwenga valizanga lyehi.

Petulu asakile kutachikiza vyavivulu havyuma apwile nakulumbununa Yesu, ngocho amuhulishile ngwenyi: “Ove Mwata, echi chifwanyisa unachilweze yetu kaha tahi, nyi navatu vosena?” Muchishishisa chakukumbulula Petulu, Yesu ahanjikile chifwanyisa chikwavo chakulifwanako. Ambile ngwenyi: “Iyaze chikupu napu kaselwa wakushishika, wakuzangama, uze navatongola kuli kaka yenyi kumulamina lizavu lyavangamba jenyi, avahanenga kulya chakutamo halwola lwakutamo? Awahilila ndungo uze nge kaka yenyi hakwiza mwamuwana ali nakulinga ngocho. Chamuchano vene nangumilweza ngwami, mwamutongola amulaminenga vyuma vyenyi vyosena.”—Luka 12:41-44.

Muchifwanyisa chakavanga, “kaka” atalisa kuli Yesu Mwanamutu. Ngocho, “kaselwa wakushishika” atalisa kumalunga ‘vamuutanga wamikoko waundende’ vaze navakahana Wangana. (Luka 12:32) Yesu ambile ngwenyi vatu vamwe vamuutanga kanou navakahananga “lizavu lyavangamba jenyi” “kulya chakutamo halwola lwakutamo.” Ngocho Petulu natumbaji vakwavo vaze apwile nakunangula Yesu nakuvalisa kushipilitu vahashile kukukulula ngwavo nakukapwa lwola luze mwakeza Mwanamutu. Kaha halwola kana nakukapwa kulongesa vyuma mangana vaka-kukavangiza Yesu vaze vapwa “lizavu lyavangamba” jaMwata, vakavalise kulya chakushipilitu.

Yesu ashindakanyine jila yikwavo yatela kulingisa tumbaji twenyi vapwenga vakutona nakulama michima yavo. Mwomwo mutu nahase kupwa nakanengauli hakuzata milimo yaKalunga nakuputuka jino kuhunga vandumbwenyi. Yesu ambile ngwenyi: “Oloze kachi nge uze ndungo mwalyamba mumuchima wenyi ngwenyi, ‘Kaka yami nashimbula kwiza,’ kaha himwaputuka kuveta vaze vangamba vamalunga navaze vamapwevo, nakulya nakunwa nakupenda, jino kaka yayauze ndungo omu mwakeza halikumbi lize kamufwelelele ngwenyi mwezako, nahaola yize katachikijileko, mwakamuzangamisa chikuma nakumutongwela kumuhaka kuchihela chimwe navaze vakuhona kushishika.”—Luka 12:45, 46.

 Yesu ambile ngwenyi ejile “nakwepula kakahya hamavu.” Akatwile chihande chize chanehele vikokojola vyavivulu nakusolola hatoma kunangula chamakuli navisemwa vyavaFwaliseu. Echi chanehele chihandwa mukachi kavatu vaze valinungile hamwe, kaha “ise yamutu mwakindukila mwanenyi walunga, mwana walunga mwakindukila ise, naye yamutu mwakindukila mwanenyi wapwevo, mwana wapwevo mwakindukila naye, nayewenu mwakindukila nayewenu yamutu, nayewenu yamutu mwakindukila nayewenu.”—Luka 12:49, 53.

Awa mazu atalikishile chikumanyi kuli tumbaji twenyi. Jino Yesu ahanjikile kumayongomena avatu. Vatu vavavulu vakanyine kwitavila ngwavo Yesu ikiye Meshiya, kaha avambile ngwenyi: “Omu mweji kumonanga livwi lili nakufwinda kumulauko, hahaze vene mweji kwambanga ngwenu, ‘Vula yayinene nayinoka,’ kaha cheji kupwanga vene ngocho. Kahomu nawa mweji kumonanga peho yakusulo yili nakuhuhwa, mweji kwambanga ngwenu, ‘Nakwiza musana wakaza,’ kaha weji kwiza vene. Enu vaka-kulyonga, mwatachikiza kulumbununa omu eji kusolokanga mavu nalilu, nyi mwomwo ika munahono kulumbununa lwola luno?” (Luka 12:54-56) Chikupu vene, vatu kana kavapwile vakulizangako.