Mwapwile mumwaka wa 32 C.E., kaha mwahichile myaka yitatu kufuma haze vamumbapachishile Yesu. Jino Yesu natumbaji twenyi vapwile kuChiwanyino chaJitavanaku muYelusalema. Kaha chasoloka nge halwola kana vapwile kwakamwihi naYelusalema. (Luka 10:38; Yowano 11:1) Yesu azachililenga chikuma mulimo wenyi wakwambulula hatukweji 6 muYuleya chipwe musali yaKalwiji Yotau mumbongi yaPeleya. Mulimo wakwambulula wapwile nakusakiwa chikuma mujingalila kaneji.

Omu vakumishile Paseka mu 30 C.E., Yesu ambulwililenga muYuleya hatukweji vamwe, kufumaho ayile jino kuSamaliya. Kuheta kwakamwihi naPaseka mu 31 C.E., vaYuleya muYelusalema vasakile kumujiha. Yesu anangwile vatu kunote yaNgalileya hamwaka umwe nachimbwa. Halwola luze, vatu vavavulu vaputukile kumukavangiza. MuNgalileya Yesu anangwile vaposetolo jenyi nakuvatuma vayenga nakwambulula. Kaha avalwezele ngwenyi: “Ambululenunga ngwenu: ‘Wangana wamelu unapandama kwakamwihi.’” (Mateu 10:5-7) Ngocho alongesele vyuma mangana vambulwile muYuleya.

Shimbu kanda vaputuke kwambulula, Yesu asakwile tumbaji 70 nakuvatuma vavali vavali vayenga nakwambulula. Ngocho atumine ava vaka-kwambulula Wangana mungalila kana, mwomwo ‘mulimo wakwaha watohwele, oloze vaka-kuzata vapwile vavandende.’ (Luka 10:2) Yesu avatumine valivange kujingalila kuze ayile naikiye usula. Vaze tumbaji 70 vakokile vaveji nakwambulula mujimbu uze ambulwilenga Yesu.

Ava tumbaji kavavalwezele kuya nakunangula vatu mujisunangongako. Yesu avalwezele vayenga mumembo avatu. Ambile ngwenyi: “Mweshomwo muzuvo namwingila vangilenu kwamba ngwenu: ‘Muzuvo yino mupwenga kuunda.’ . . . Nge [mutu asaka kuunda] mwali, kaha kuunda chenu nachitwama hali ikiye.” Uno mujimbu muka vambulwilenga? Yesu ambile ngwenyi: “Valwezenunga ngwenu: ‘Wangana waKalunga uneza kwakamwihi nayenu.’”—Luka 10:5-9.

Jindongi jize ahanyine Yesu kuli tumbaji twenyi 70 jalifwanyine najize ahanyine vaposetolo jenyi 12 hakavanga omu avatumine kuya nakwambulula. Avalwezele ngwenyi vatu vamwe kaveshi kukavevwililako. Oloze mujimbu wavo naukakafwa vatu vamichima yamwaza vaketavile Yesu omu mweza mangana valinangule vyavivulu kuli Mwata.

Kutwala muze, vaze vaka-kwambulula Wangana vakindulukile kuli Yesu. Vawahililile nakumulweza ngwavo: “Ove Mwata, navandemone vanaliluula kuli etu hakuzachisa lijina lyove.” Mujimbu kana wevwishile Yesu kuwaha, kaha ambile ngwenyi:  “Nguli nakumona Satana naholoka lyehi nge muveso kufuma mwilu. Talenu! Ngunamihane ngolo jakulyata manoka natuvwanda.”—Luka 10:17-19.

Yesu jino akolezezele vaka-kumukavangiza ngwenyi navakalyatangila manoka natuvwanda, kulumbununa nge navakafungulula vyuma vyangolo. Kaha nawa venjikijile ngwavo kulutwe Satana mwakaholoka kufuma mwilu. Yesu akafwile nawa tumbaji twenyi 70 vatachikize chuma chachilemu nachikasoloka kulutwe. Ambile ngwenyi: “Kanda namuwahilila ngwenu vashipilitu vanaliluula kuli enuko, oloze wahililenu mwomwo majina enu vanawasoneka lyehi mwilu.”—Luka 10:20.

Yesu awahililile chikuma nakwalisa Ise hakuzachisa ava tumbaji twenyi vakulinyisa mujila kaneyi. Kaha alumukilile kuli tumbaji twenyi nakuvalweza ngwenyi: “Awahilila meso aze ali nakumona vyuma muli nakumona enu. Mwomwo nangwamba kuli enu ngwami, vapolofweto navamyangana vavavulu vasakile kumona vyumevi muli nakumona enu, oloze kavavimweneko, vasakile kwivwa vyumevi muli nakwivwa enu, oloze kavavivwileko.”—Luka 10:23, 24.