Yesu apwile lika muYelusalema kuChiwanyino chaJitavanaku (chipwe chaVisakila), kaha anangwilenga lika vatu muchano. VaYuleya vamwe vaze vapwile kuchiwanyino kana vambile kuli Yesu ngwavo: “Etu tuvana vaApalahama, kaha kanda tuchipwengaho lyehi tuvandungo.” Yesu avakumbulwile ngwenyi: “Ngunatachikiza vene ngwami enu mwapwa muvana vaApalahama. Oloze muli nakusaka kungujiha, mwomwo mazu ami kaweshi nakufukila muli enuko. Ngweji kuhanjikanga vyuma ngwamwene omu ngwapwile naTata, oloze enu mweji kulinganga ovyo mwevwa kuli senu.”—Yowano 8:33, 37, 38.

Chishina ahanjikile Yesu shina echi: Ise alihandununa nasevo. Hakuwana nge vyuma ahanjikile Yesu kavyalumbunukilile vaYuleyako, vamwambile cheka ngwavo: “Etu setu Apalahama.” (Yowano 8:39; Isaya 41:8) Chikupu vene, vapwile vaka-tanga yaApalahama. Ngocho vashinganyekele ngwavo vapwile nalufwelelo lwolumwe nasepa lyaKalunga Apalahama.

Oloze Yesu avakumbulwile ngwenyi: “Kachi nge enu mwapwa muvana vaApalahama, kachi mweji kulinganga mwaya vilinga vyaApalahama.” Chikupu vene, mwana eji kulondezezanga ise. Yesu atwalileho ngwenyi: “Oloze jino muli nakusaka kungujiha, ami mutu ngunamyambulila muchano ou ngwevwa kuli Kalunga. Apalahama kalingile ngochoko.” Yesu avakumbulwile ngwenyi: “Enu mweji kulinganga mwaya vilinga vyasenu.”—Yowano 8:39-41.

VaYuleya kavatachikijile owo Yesu apwile nakuvulukako. Vahanjikile ngwavo kavapwile vana vamuujilako, vambile ngwavo: “Etu katwapwa tuvana vamuujilako, tuli naSetu umwe kaha, Kalunga.” Uno chikupu vene Kalunga apwile Sevo tahi? Yesu ambile ngwenyi: “Kachi Kalunga apwanga Senu, kachi munanguzange, mwomwo ngwafumine kuli Kalunga, kaha nguneza. Ami kangwalijilile tuhu ami iveneko, oloze Kalunga ikiye angutumine.” Yesu avahulishile chihula chize akumbulwile ivene ngwenyi: “Nyi mwomwo ika munahonena kutachikiza vyuma nguli nakuhanjika? Mwomwo enu kamweshi kuhasa kwivwilila kumazu amiko.”—Yowano 8:41-43.

Yesu avalumbunwinyine vyuma navikavasolokela hakumukana. Kaha avambile hatoma ngwenyi: “Enu senu Liyavolo, kaha mwasaka kulinga vyuma afwila senu.” Uno sevo apwa ngachilihi? Yesu amulumbunwine kanawa ngwenyi: “Ikiye apwile muka-kujiha vatu kufuma vene kumaputukilo, kaha kazamine mumuchanoko.” Yesu ambile cheka ngwenyi: “Weshowo apwa wakuli Kalunga eji kwivwililanga kumazu aKalunga. Hakiko vene mweji kuhonenanga kwivwa, mwomwo kamwafuma kuli Kalungako.”—Yowano 8:44, 47.

Awa mazu ahanjikile Yesu evwishile vaYuleya kumuchima kupihya. Ngocho vambile ngwavo: “Kumana twolokanga hakwamba ngwetu, ‘Ove ukaSamaliya kaha nawa uli nandemone.’” VaYuleya hakuvuluka Yesu ngwavo “kaSamaliya,” chasolwele nge vapwile nakumusaula. Oloze Yesu aliwile mazu avo akasautu, kaha ambile ngwenyi: “Ami kangweshi nandemoneko, oloze ngweji kuvumbikanga Tata, kahenu mweji kungusaulanga.” Yesu asolwele nge chihande kana chachilemu chikuma hakwamba ngwenyi: “Kachi nge mutu mwalamanga mazu ami, keshi kukafwako.” Kapwile nakulumbununa nge vaposetolo navatu veka vaze vamukavangijilenga kaveshi kukafwako, nduma. Oloze apwile nakulumbununa nge kaveshi kukamona kufwa chahaya myaka yosenako, chikiko “kufwa chamuchivali” chize kachatwama nalutalililo lwakusangukako.—Yowano 8:48-51; Kusoloka 21:8.

Oloze vaYuleya vambile kuli Yesu ngwavo: “Tunatachikiza jino ngwetu uli nandemone. Apalahama afwa lyehi, navapolofweto nawa, oloze ove ngwove, ‘Kachi nge mutu mwalamanga mazu ami, keshi kukafwako.’ Kutala ove unahambakana setu Apalahama uze afwa lyehi numba? . . . Ove walimona ngwove yove iya?”—Yowano 8:52, 53.

Chikupu vene, Yesu asolwele hatoma nge ikiye Meshiya. Muchishishisa chakukumbulula chihula chavo, ikiye ambile ngwenyi: “Kachi nge nangulitohwesa ami ivene, kaha ulemu wami unapu wamokomoko. Tata ikiye eji kungutohwesanga, uze muli nakwamba ngwenu ikiye Kalunga kenu. Enu kamwamutachikijileko,  oloze ami ngwamutachikiza. Nge nangwamba ngwami ami kangwamutachikizako, kaha nangupwa ngumuka-kwonga nge omu mwapwa yenu.”—Yowano 8:54, 55.

Yesu jino ahanjikile kutalisa kuli kakuluka yavo uze apwile wakushishika ngwenyi: “Senu Apalahama awahililile chikuma hakutalilila kukamona likumbi lyami. Kaha alimwene, ngocho awahililile.” Eyo, Apalahama atalililile kwiza chaMeshiya mwomwo afwelelele muvyuma ashikile Kalunga. VaYuleya vamuhamikile ngwavo: “Ove kanda uchihete namyaka yakusemuka 50, nyi Apalahama wamumwene ngachilihi?” Yesu avakumbulwile ngwenyi: “Chamuchano vene nangwamba kuli enu ngwami, shimbu kanda Apalahama asemuke, ami kungwapwile.” Yesu hakuhanjika mazu kana apwile nakutalisa kukuyoya chenyi chakushipilitu shimbu kanda ezenga hano hamavu.—Yowano 8:56-58.

VaYuleya vapihililile chikuma nakusaka kumwasa Yesu malolwa mwomwo ahanjikile ngwenyi kwapwile shimbu kanda Apalahama asemuke. Oloze Yesu achinyine.