Kumututuko waPili yaMilive, kafwe jikilomita jitatu kufuma muYelusalema, kwatwama ngalila vavuluka ngwavo Mbetane. (Yowano 11:18) Omu Yesu ahetele kungalila kana, ayile kuzuvo yaMalita naMaliya. Ava mapwevo nandumbwavo Lazalu vapwile masepa jaYesu, ngocho vamutambwile nachisambo.

Chapwile hikutokwa kuvatambukila kuli Meshiya. Malita asakile kuwahishila Yesu vyakulya, ngocho aputukile kuwahisa kulya chachivulu. Omu Malita apwile nakuwahisa vyakulya, Maliya atwamine kumahinji aYesu nakwivwilila. Kutwala muze, Malita ambile kuli Yesu ngwenyi: “Ove Mwata, uno kawamwene omu nangwechelela ndumbwami nguzate milimo uka wamiko nyi? Shikaho mulweze ezenga angukafweko.”—Luka 10:40.

Muchishishisa chakuhanjikila Maliya, Yesu ahuhumwine Malita hakulizakamina havyuma vyakumujimba ngwenyi: “Ove Malita, ove Malita, unakulizakamina nakutanguka navyuma vyavivulu. Vyuma vyavindende kaha vinakusakiwa, mokomoko chimwe kaha. Maliya nasakula chazano chamwaza, kaha kaveshi kukamutambulachoko.” (Luka 10:41, 42) Eyo, Yesu asolwele hatoma nge kachapwa chakutamo kwenyeka lwola lwaluvulu hakuwahisa vyakulya vyavivuluko. Vyakulya vyavindende kaha vikiko vyapwile nakusakiwa.

Malita apwile navishinganyeka vyamwaza. Asakile kusolola chisambo. Oloze hakulizakamina chikuma hakuwahisa vyakulya chamulingishile ahone kwivwilila kuvyuma vyavilemu vize apwile nakuhanjika MwanaKalunga. Yesu ahanjikile ngwenyi Maliya asakwile chuma chamwaza chize nachikamunehela nganyo yakwilila, kaha nayetu tuvosena nachitulingisa tulinanguleko chishina chachilemu.

Halwola lukwavo nawa, Yesu anangwile chishina chikwavo chachilemu. Kambaji umwe ambile kuli Yesu ngwenyi: “Ove Mwata, tunangule mwakulombela nge muze Yowano nawa anangwile tumbaji twenyi.” (Luka 11:1) Yesu te navanangula lyehi mwakulombela halwola ahanjikile Chihande chenyi ChahaPili kafwe mwaka umwe nachimbwa kunyima. (Mateu 6:9-13) Chasoloka nge halwola kana kambaji kana kapwileko, shikaho Yesu ahilukilile cheka vishina kana. Kaha avahanyine chakutalilaho chize chavanangwile kupwa nalukakachila mukulomba.

Ambile ngwenyi: “Ngachilihi nge mutu umwe hali enu ali nasepa lyenyi, kaha mwaya kuli uze sepa lyenyi mukachi kaufuku nakwamba kuli ikiye ngwenyi, ‘Ove sepa lyami, ngulevanyiseko jimbolo jitatu, mwomwo sepa lyami neza ali haungeji wenyi, kaha kangweshi nakulya chakumuzumbulako.’ Oloze uze sepa lyenyi muzuvo himwamukumbulula ngwenyi: ‘Kanda kunguyanjisako. Kuchikolo kwakusoka lyehi, kaha ami navana vami vavandende tuli lyehi mukahela. Kangweshi kuhinduka nakukuhana vimweko.’ Nangumilweza ngwami, numba mwakana kuhinduka nakumuhana vimwe hakupwa sepa lyenyi, oloze mwomwo yaluzema lwenyi, mwahinduka nakumuhana vyeshovyo nasake.”—Luka 11:5-8.

Yesu kapwile nakulumbununa nge Yehova kasaka kukumbulula kulomba chavatu jenyiko, ngana muze alingile uze sepa navulukako. Oloze alumbunwine ngwenyi kachi nge mutu uze keshi nakusaka kukafwa sepa lyenyi mwetavila jino kumukafwa mwomwo yakumulomba naluzema, kahanyi Setu wamwilu wazangi mwakumbulula kulomba chavangamba jenyi vakushishika. Yesu atwalileho ngwenyi: “Nangwamba kuli enu ngwami, lombenunga lika, kaha navakamihana. Tondenunga lika, kaha namukawana. Ngongomwezenunga lika, kaha navakamisokolwela. Mwomwo weshowo mwalombanga mwatambula, kaha weshowo mwatondanga mwawana, kaha weshowo mwangongomwezanga navamusokolwela.”—Luka 11:9, 10.

Yesu jino ashindakanyine chishina kanechi hakuchesekesa kuli chisemi ngwenyi: “Chisemi muka hali enu, nge mwanenyi mwamulomba ishi, kaha himwamuhana linoka mukutela kumuhana ishi? Mokomoko nge mwalomba liulu, kaha himwamuhana kavwanda? Shikaho kachi nge enu, numba tuhu mwapwa muvakuhuka, oloze munatachikiza mwakuhanyina mawana amwaza kuli vana venu, kahanyi Senu wamwilu mwahambakanamo chikuma kuhana shipilitu yajila kuli vaze navamulombayo.” (Luka 11:11-13) Ocho kutokwa kana hakutachikiza ngwetu Setu asaka kwivwilila kukulomba chetu nakufwila kutukafwa!