Yesu alwezele tumbaji twenyi jila yamwaza yakumwenamo luheto. NavaFwaliseu navakiko kuvapwile, kaha vatelele kwivwilila kumazu apwile nakuhuhumuna Yesu. Mwomwo ika? Mwomwo “vapwile vaka-kuzanga jimbongo.” Omu vevwile mazu aYesu, “vaputukile kumbwatula.”—Luka 15:2; 16:13, 14.

Vyuma valingile vaFwaliseu kavyevwishile Yesu womako. Ambile kuli vakiko ngwenyi: “Enu yenu mweji kulivulukanga kuvatu ngwenu muvaka-kwoloka, oloze Kalunga atachikiza michima yenu. Mwomwo ocho vazezula helu kuli vatu, chapwa chaunyengwe kumeso aKalunga.”—Luka 16:15.

Hamyaka yayivulu vaFwaliseu ‘vanavazezulanga kuli vatu,’ oloze jino vyuma vyatelelele kwalumuka. Vatu vaze vazezwilenga helu, vaze vapwilenga naluheto mulifuchi, navaze vazanyinenga muvihande vyamapolitiki, navatwamina vamukwitava, vavenyishile. Kaha vatu vaze vamwenenga kupwa vamokomoko, vaze vasakilenga vyuma vyakushipilitu, vavazezwile helu. Yesu asolwele hatoma ngwenyi vyuma vyapwile nakwalumuka, ambile ngwenyi:

“Jishimbi naMazu aVapolofweto kuvyapwilenga palanga nakuli Yowano. Kufuma vene haze, Wangana waKalunga vachili nakuuvilika kupwa himujimbu wamwaza, kaha mutu himutu ali nakuukilikichila. Chikupu vene, chinapu chachashi lilu namavu kuhita, kuhambakana sona umwe wakuJishimbi ahite chakuzeneka kukatesamoko.” (Luka 3:18; 16:16, 17) Jino mazu aYesu asolwele ngachilihi nge vyuma vyapwile nakwalumuka?

Vatwamina vamukwitava chavaYuleya valisashilenga hakwamba ngwavo vakavangijilenga Jishimbi jaMose. Anukenu ngwenu omu Yesu okile uze lunga wakapuputa muYelusalema, vaFwaliseu valisashile hakwamba ngwavo: “Etu tutumbaji twaMose. Etu twatachikiza ngwetu, Kalunga ahanjika kuli Mose.” (Yowano 9:13, 28, 29) Chuma chimwe chachilemu vahanyinyine Jishimbi kuhichila muli Mose shina jitetekele vatu vakulinyisa kuli Meshiya chipwe ngwetu kuli Yesu. Yowano Muka-kumbapachisa avulukile Yesu ngwenyi ikiye Mwanamukoko waKalunga. (Yowano 1:29-34) Kufuma vene halwola aputukile Yowano mulimo wenyi wakwambulula, vaYuleya vakulinyisa, chikumanyi vaka-kuhutwa, vevwilililenga kumujimbu ‘waWangana waKalunga.’ Eyo, kwapwile “mujimbu wamwaza” wavatu vosena vaze vasakile kupwa muWangana waKalunga nakunganyala kuukiko.

Jishimbi jaMose kajahonene kutesamoko, oloze jatetekelele vatu kuli Meshiya. Oloze kukavangiza jishimbi kana chatelele kukuma. Chakutalilaho, Jishimbi jetavishile vatu kulukulula mapwevo havyuma vyakulisezaseza, oloze Yesu ambile ngwenyi: “Weshowo mwalukulula pwevo lyenyi nakumbata weka, nalingi ukoji, kaha weshowo mwambata pwevo vanalukulula lyehi kuli lunga lyenyi, mwalinga ukoji.” (Luka 16:18) Mazu kana akwachile vaFwaliseu kumichima mwomwo vazangilenga kutunga jishimbi hakala chuma navamona.

Yesu jino avalwezele chifwanyisa chize chashindakanyine havyuma vize vyapwile nakwalumuka. Chifwanyisa  kana chapwile chamalunga vavali, kaha chiyoyelo chamutu himutu chalumukile mukukasumuna. Omu natushimutwila hachifwanyisa kana, tachikizenu ngwenu havatu vaze vapwile nakwivwilila kuli Yesu hapwile navaFwaliseu vaze vazangilenga chikuma jimbongo, kaha nawa vatu vavazezwilenga.

Yesu ambile ngwenyi: “Jino kwapwile muka-luheto umwe uze apwile nakuvwalanga mahina aungonyi nawawa amwaza, nakulivwisanga kuwaha hakumbi hakumbi nakutwama muuhando. Oloze kuchikolo chenyi vatumbikilengako muka-kulombalomba umwe uze apwilenga najimbandu mujimba wosena. Lijina lyenyi apwile ikiye Lazalu. Asakilenga kulya ungululu waholokelenga kumesa yayauze muka-luheto. Kaha navatuwa vejilenga nakumulasa hajimbandu jenyi.”—Luka 16:19-21.

Hakuwana nge vaFwaliseu vapwile vaka-kuzanga jimbongo, ngocho katweshi kuhasa kuhuhwasana ngwetu Yesu apwile nakutalisa kuli vakiko omu avulukile ‘muka-luhetoko.’ Ava vatwamina vamukwitava chavaYuleya vavwalilenga nawa uvwalo waulangaji, wandando yayinene. Chikupu vene, vatu kana vapwilenga naluheto, kaha valivwishilenga kuwaha mukuyoya chavo mwomwo yaluheto vapwile nalwo. Eyo, hakuvafwanyisa kulunga uze navwale mahina aungonyi apwile nakutalikisa kuvihela vyavo vyavilemu, kaha uvwalo utoma wapwile nakusolola muchima wavo wakulimona kupwa vakwoloka.—Ndanyele 5:7.

Uno ava vatwamina valuheto vamwenenga ngachilihi vatu vamokomoko, vakuhutwa? Vatu kana vavasawilenga nakuvavuluka ngwavo ‛am ha·’aʹrets, chipwe vatu vamulifuchi, vaze kavatachikijile  Jishimbi chipwe kutamo kuvanangulajoko. (Yowano 7:49) Kahechi chasolwele ukalu apwile nawo ‘muka-kulombalomba Lazalu,’ uze asakilenga kulya ungululu uze “waholokelenga kumesa yayauze muka-luheto.” Ngana muze Lazalu apwile najimbandu mumujimba wosena, vaka-kuhutwa vavamwenenga kupwa vamokomoko nge hivatu vaze kavahashile kwivwisa Kalunga kuwahako.

Ukalu kanou wapwilengako hatando yayisuku, oloze Yesu jino amwene ngwenyi chapwile chakutamo kwalumunako vyuma vimwe kuli vaze vapwile nge uze lunga waluheto nakuli vaze vapwile nge Lazalu.

Yesu atwalileho lika kuhanjika hakwalumuka kana. ambile ngwenyi: “Jino kutwala muze, uze muka-kulombalomba afwile, kaha vangelo vamumbachile nakumutwala kuli Apalahama. Nauze muka-luheto nawa afwile, kaha vamufunjile. Jino apwile nakuyanjiwa muFuka, ngocho andwile meso enyi, kaha amwene Apalahama hahasuku ali naLazalu hamwe.”—Luka 16:22, 23.

Vatu vaze vapwile nakwivwilila kuli Yesu, vatachikijile ngwavo Apalahama afwile lyehi, kaha vamufunjile muFuka. Visoneka vyahanjika hatoma ngwavyo mutu uze ali muFuka chipwe muSheyole, kuhakilako vene naApalahama, keshi kuhasa kumona chipwe kuhanjikako. (Muka-kwambulula 9:5, 10) Vyuma muka vashinganyekele ava vatwamina vamukwitava kutalisa kuvyuma apwile nakuhanjika Yesu muchifwanyisa kanechi? Uno vyuma muka chinasolola chifwanyisa chaYesu hali ava vatu vamokomoko navatwamina vamukwitava vakuzanga jimbongo?

Yesu ahanjikile vyakwalumuka hakwamba ngwenyi ‘Jishimbi naMazu aVapolofweto kuvyapwilenga palanga nakuli Yowano Muka-kumbapachisa, oloze kufuma vene haze, Wangana waKalunga vachili nakuuvilika kupwa himujimbu wamwaza.’ Vyuma ambulwile Yowano naYesu Kulishitu vyasolola nge kuyoya chamwaka chaLazalu nauze muka-luheto chalumukile, kaha vapwile nachiyoyelo cheka chize chayile mwaya muchima waKalunga.

Kuhanjika muchano, vatu vakulinyisa chipwe vakuhutwa vanayandenga kushipilitu hamyaka yayivulu. Oloze vavakafwile kuli Yowano Muka-kumbapachisa naYesu, ngocho vaputukile jino kwitavila kumujimbu waWangana. Hamyaka yayivulu, vanonelenga nakulya ungululu ‘uze waholokelenga kumesa yakushipilitu’ yavatwamina vamukwitava. Oloze mulwola lwaYesu, vavalishilenga muchano waulemu wamuVisoneka, chikumanyi vyuma vyamwaza vize avanangwilenga Yesu. Echi chapwile jino nge vawanyine uselewa kumeso aYehova Kalunga.

Oloze vaka-luheto navatwamina vamukwitava vakanyine kwitavila mujimbu waWangana uze avambulwilile Yowano nauze nawa apwilenga nakwambulula Yesu mulifuchi lyosena. (Mateu 3:1, 2; 4:17) Chapundu vene, vevwile kupihya hamujimbu kanou, mwomwo watalishile kukusopesa chaKalunga chize  chapwile nakwiza. (Mateu 3:7-12) Kachi nge Yesu natumbaji twenyi valitwaminyinyine kwambulula mujimbu waKalunga kachi vatwamina vamukwitava, vaka-kuzanga jimbongo vawahililile. Ava vatwamina vapwile nge uze lunga muka-luheto wamuchifwanyisa uze ambile ngwenyi: “Ove tata Apalahama, nguteteleko. Mutume Lazalu atupike songo yamunwe wenyi mumeya mangana angusotwele halilimi lyami hatute, mwomwo nguli nakulyonyinga muno mukakahya kamilangi.”—Luka 16:24.

Oloze chuma kana kachasolokeleko. Vatwamina vamukwitava vavavulu kavalumukileko. Vakanyine “kwivwilila mazu asonekele Mose namazu vasonekele Vapolofwetoko,” aze atelele kuvalingisa vetavila Yesu kupwa Meshiya naMwangana uze vatongola kuli Kalunga. (Luka 16:29, 31; Wavaka-Ngalesha 3:24) Kaha nawa kavalinyishile nakuvakunyula kuli vatu vakuhutwa vaze vetavilile Yesu nakuvevwila jino kuwaha kuli Kalungako. Oloze tumbaji twaYesu kavapopolwele muchano avanangwile Yesu mangana vevwise vatwamina vamukwitava kuwahako. Yesu hakulumbununa chishina kanechi muchifwanyisa chenyi, avulukile mazu aze ahanjikile “tata Apalahama” kuli uze lunga waluheto ngwenyi:

“Ove mwanami, anuka ngwove walivwishilenga kuwaha vyuma vyamwaza mukuyoya chove, oloze Lazalu ayanjilenga. Oholili jino vali nakumuvendejeka kuno, oloze ove uli nakulyonyinga. Kaha nawa mukachi kayetu nayenu vanahakemo wina waunene, mangana vaze navasaka kufuma kuno nakwiza okwo kuli enu vahone, chipwe vaze navafuma okwo nakwiza kuno kuli etu vahone.”—Luka 16:25, 26.

Achishinganyekenu omu vyuma kana vyalumukile mukuyoya chavatu ava vavali! Kwalumuka kanechi chatalikishile kuvyuma vyalumukile kuli vatwamina vamukwitava vakulivwimba nakuli vaka-kuhutwa vakulinyisa vaze vetavilile toka yaYesu nakupwa jino vakuhizumuka nakuvalisa kushipilitu. (Mateu 11:28-30) Echi kwalumuka nawa chatalikishile kuvyuma vyapwile nakusaka kusoloka mukuhita chatukweji vavandende omu vashishishile Lushiko lwamuJishimbi nalushiko lwaluhya. (Yelemiya 31:31-33; Wavaka-Kolose 2:14; WavaHepeleu 8:7-13) Omu Kalunga ahingunwinyine shipilitu yenyi yajila halikumbi lyaPendekoseta 33 C.E., chasolokele hatoma nge tumbaji twaYesu vakiko Kalunga evwilile uselewa keshi vaFwaliseu navatu javoko.