Yesu afumine kuNgalileya natumbaji twenyi, kaha vazaukile Kalwiji Yotau, vatalikishile kusulo nakuhita muPeleya. Hakavanga omu Yesu apwile muPeleya, ahanyine vaFwaliseu lushimbi lwakusolola omu Kalunga amona kulukulula mapwevo. (Luka 16:18) Ngocho vakatwile chihande kana mangana veseke Yesu.

Mose asonekele ngwenyi pwevo vanahase kumulukulula kachi nge lunga nawane “ukalu umwe” muli ikiye. (Lushimbi lwamuchivali 24:1) Vatu vapwile navishinganyeka vyakulisezaseza hachihande kanechi. Vamwe vashinganyekele nge vatelele kulukulula mapwevo nahatuvihande twatundende. Ngocho vaFwaliseu vahulishile ngwavo: “Uno vetavisa lunga kulukulula pwevo lyenyi hakala mulonga tahi?”—Mateu 19:3.

Muchishishisa chakukumbulula kweseka nomu vashinganyekele vatu, Yesu avakumbulwile hakuvuluka omu Kalunga ahakileko ulo hakavanga. Ambile ngwenyi: “Uno kanda mutangengaho lyehi ngwavo ou avatangile kufuma vene kumaputukilo avatengele lunga napwevo nakwamba ngwenyi: ‘Shikaho lunga mwakaseza ise nanaye nakukalipanjika napwevo lyenyi, kaha ava vavali navakapwanga mujimba umweko’ nyi? Ngocho kaveshi cheka vavaliko, oloze mujimba umwe kaha. Shikaho chuma chize Kalunga nanungu hamwe mutu kanda achihandununako.” (Mateu 19:4-6) Omu Kalunga aputukile ulo wavaAlama naEve, kahakileko jila yakulilukulwilamoko.

VaFwaliseu vahulishile Yesu ngwavo: “Mwomwo ika Mose ahanjikilile vyakuhana mukanda wakuhanga pwevo nakumulukulula?” (Mateu 19:7) Yesu avalwezele ngwenyi: “Hakukaluhwa chamichima yenu, hakiko amitavilile Mose kulukulula mapwevo jenu, oloze kachapwile ngocho kufuma kukuputukako.” (Mateu 19:8) ‘Kukuputuka’ vanavuluka hano keshi mumakumbi aMoseko, oloze halwola Kalunga ahakileko ulo mumilemba yaEtene.

Kaha Yesu ahanjikile mazu amalemu kuli vakiko, ambile ngwenyi: “Nangwamba kuli enu ngwami weshowo mwalukulula pwevo lyenyi chakuzeneka mulonga waujila [muchiHelase por·neiʹa] nakumbata weka, mwalinga ukoji.” (Mateu 19:9) Ngocho, ujila ukiko kaha mulonga vetavisa muVisoneka wakulilukulula.

Tumbaji vahanjikile ngwavo: “Nge mukiko chapwa kuli lunga napwevo lyenyi, kahanyi kachawaha kumbatako.” (Mateu 19:10) Shikaho, weshowo mwashinganyeka kumbata chipwe kusomboka atela kumona ulo kupwa wahaya myaka yosena.

Yesu hakuvuluka ujike, ambile ngwenyi vamwe vaheuka lyehi kufuma vene mumajimo amanevo. Vamwe vapwa viheu mwomwo yakuliheula vavene. Kaha veka veji kulipikanga nakusaka kuhonesa peha yakufwila kulisavala namutu, mangana vazatenga chikuma milimo yakupandama kuWangana waKalunga. Ngocho Yesu alwezele vatu vaze vapwile nakumwivwilila ngwenyi: “Ou mwahasa kutwama [ujike] atwame vene ngocho.”—Mateu 19:12.

Vatu vaputukile kuneha jino vana vavo kuli Yesu. Oloze tumbaji twenyi vatenukilile vatu ngwavo kanda navayanjisa Yesu hakumunehela vana vavoko. Omu Yesu amwene chuma kana, evwile kupihya, kaha ambile ngwenyi: “Vechenu vana vavandende vezenga kuli ami, kanda namuvakanyisako, mwomwo Wangana waKalunga unapu wavava vangana. Chamuchano vene nangwamba kuli enu ngwami, weshowo mwakana kutambula Wangana waKalunga nganomu mwana wamundende eji kutambulanga vyuma, chikupu vene keshi kukengilamoko.”—Mako 10:14, 15; Luka 18:15.

Echi chapwile hichakutalilaho chamwaza. Hakusaka tukengile muWangana waKalunga, twatela kulikehesa nakwitavila vyuma navatunangula, nganomu veji kulinganga vana vavandende. Yesu asolwele nge azangile vaze vanyike hakuvasata mumavoko enyi nakuvakisula. Shikaho, Yesu azanga vosena vaze navatambula “Wangana waKalunga nganomu mwana wamundende eji kutambulanga vyuma.”—Luka 18:17.