Omu Yesu apwile nakwambulula, kakavulu ashindakanyine kulema chatwama hakulinyisa. (Luka 14:8-11) Afwililile kuwana vatu vaze vazangilenga kuzachila Kalunga namuchima wosena. Oloze kuheta nahalwola kanelu, vatu vamwe vachipwile lika vaka-shili.

VaFwaliseu navaka-kusoneka vamwene vatu kana kupwa vamokomoko, oloze vatu kanava vakiko vetavilile Yesu namujimbu wenyi. Kaha vaFwaliseu vayayavalile ngwavo: “Ou mutu eji kwitavilanga vaka-shili nakulya navo hamwe.” (Luka 15:2) VaFwaliseu navaka-kusoneka valimwene kupwa vavalemu chikuma, kaha vamwenenga vatu kupwa nge himajilo aze ali kuvilyachilo vyavo. Hakumona vatu kana ulumbi, vatwamina vamukwitava vazachishilenga lizu lyachiHepeleu ‛am ha·’aʹrets, lize lyalumbununa ngwavo “vatu vamulifuchi.”

Oloze Yesu kalingilenga ngochoko, ikiye apwile nalikoji, atetelelenga vatu nakuvavumbika. Vatu vavavulu vaze vapwile vakukalikiza navaze valingilenga shili vejile nakwivwilila Yesu. Uno Yesu evwile ngachilihi omu vatu vamulumbilishilenga hakukafwa vaka-kuhutwa, kaha akwile ngachilihi kumazu vamulumbilishile?

Hakusaka tuwane omu evwile Yesu hamazu avo, tutalenu hachifwanyisa azachishile chize chalifwanyine nachize ahanjikile hakavanga omu apwile kuKapelenau. (Mateu 18:12-14) Yesu ahanjikile kwijiva nge vaFwaliseu vapwile vakwoloka nakupwa hautanga waKalunga. Kaha vatu vakuhutwa avafwanyishile kumikoko vakujimbala. Yesu ambile ngwenyi:

“Mutu muka hali enu uze ali namikoko jenyi 100, kaha nge najimbalisa umwe, mwahona kuseza vaze 99 mupambo, nakuya nakutonda uze umwe najimbala palanga nomu mwamuwana? Kaha nge namuwane, mwamuveleka havifwiji vyenyi nakuwahilila. Kahomu mwaheta kwimbo lyenyi mwasanyika masepa jenyi navaze alihata navo nakwamba kuli vakiko ngwenyi, ‘Wahililenu nayami, mwomwo ngunawane mukoko wami uze ajimbalanga.’”—Luka 15:4-6.

Yesu alumbunwine ngachilihi echi chifwanyisa? Ambile ngwenyi: “Nangumilweza ngwami, chochimwe nawa mwilu mweji kupwanga kuwahilila chachinene hali muka-shili umwe uze mwapihilila nakwalumuka, kuhambakana hali vaka-kwoloka 99 vaze kaveshi nakusakiwa kupihilila nakwalumukako.”—Luka 15:7.

Yesu ambile ngwenyi vaFwaliseu vatelele kupihilila nakwalumuka. Valimwene vavene kupwa vakwoloka, ngocho vashinganyekele ngwavo kachatelele kuli vakiko kupihilila nakwalumukako. Omu vaFwaliseu vamwe valumbilishile Yesu mwomwo yakulya hamwe navaka-kutambula mitelo navaka-shili, ikiye ambile ngwenyi: “Ami kangwejile nakusanyika vaka-kwolokako,  oloze shina vaka-shili.” (Mako 2:15-17) VaFwaliseu vaze valimwene kupwa vakwoloka vahonene kupihilila nakwalumuka, ngocho vaka-kuyoya vakushipilitu mwilu kavawahililileko. Oloze mwilu vawahililile omu muka-shili umwe apihililile nakwalumuka.

Hakusaka asolole nge mwilu mweji kupwanga kuwahilila chikuma nge muka-shili umwe napihilila nakwalumuka, Yesu ahanjikile chifwanyisa chikwavo chavyuma vyeji kusolokanga mutanga ngwenyi: “Pwevo muka ali najimbongo jachichele jandalakima 10, kachi nge mwajimbalisa lumwe, mwahona kuwika linongo nakukomba muzuvo nakulutondatonda palanga nomu mwaluwana? Kaha nge naluwane, mwasanyika masepa jenyi navaze alihata navo, nakwamba ngwenyi, ‘Wahililenu nayami, mwomwo ngunawane lumbongo lwachichele lwandalakima luze ngwajimbalisanga.’”—Luka 15:8, 9.

Ulumbunwiso ahanyine Yesu walifwanyine nauze ahanyine hakavanga omu ahanjikile chifwanyisa chamukoko wakujimbala. Ambile ngwenyi: “Chochimwe nawa, nangumilweza ngwami, vangelo jaKalunga veji kuwahililanga hali muka-shili umwe uze mwapihilila nakwalumuka.”—Luka 15:10.

Achishinganyekenu hachuma kana. Vangelo jaKalunga veji kuwahililanga nge vaka-shili vanapihilila nakwalumuka. Chuma kana chapwa chachilemu chikuma mwomwo muka-shili uze mwapihilila nakwalumuka nakupwa nachihela muWangana waKalunga wamwilu mwakapwa nachihela chachilemu kuhambakana vangelo. (Wavaka-Kolinde 1, 6:2, 3) Chipwe ngocho, vangelo kaveshi kwivwa lwisoko. Uno twatela kwivwa ngachilihi nge muka-shili napihilila nakwalumuka nakukinduluka kuli Kalunga?