Omu Yesu natumbaji twenyi vahetele kusulo yaPeleya kwakamwihi naYelusalema, vazaukile Kalwiji Yotau kwakamwihi naYeliko. Kaha vatu veka nawa vayile navo hamwe kuchiwanyino chaPaseka chamu 33 C.E.

Omu vapwile nakuya, Yesu apwile kulutwe yatumbaji twenyi, mwomwo apwile nakusaka kuheta washi munganda mangana vakapwe kuchiwanyino chaPaseka. Oloze tumbaji twenyi vevwile woma. Hakavanga omu afwile Lazalu, Yesu apwile nakusaka kufuma muPeleya nakuya kuYuleya. Kaha Tomase alwezele vakwavo ngwenyi: “Tuyenu nayetu nawa mangana tukafwile nenyi hamwe.” (Yowano 11:16, 47-53) Ngocho, kuya kuYelusalema chapwile hiponde yayinene, shikaho tumbaji twenyi vevwile woma.

Hakusaka mangana akafwe vaposetolo jenyi vapwenga vakumika havyuma vize vyatelele kusoloka kulutwe, Yesu avasanyikilile kupenge nakuvalweza ngwenyi: “Tuli nakukanduka kuYelusalema, kaha Mwanamutu navakamuhana kuli vapilishitu vavakulwane nakuli vaka-kusoneka. Navakamusopesa nakumutongwela kufwa, kaha navakamuhana kuvatu vakumafuchi eka mangana vakamuhende nakumuveta vikote nakumusukika hachitondo. Oloze halikumbi lyamuchitatu navakamusangula.”—Mateu 20:18, 19.

Yesu apwile nakulweza tumbaji twenyi kamuchitatu chihande chakuvuluka kufwa nakusanguka chenyi. (Mateu 16:21; 17:22, 23) Hano jino hakiko avulukile ngwenyi navakamusukika hachitondo. Tumbaji twenyi vevwile vyuma ahanjikile, oloze kavyavalumbunukilileko. Pamo vapwile nakushinganyeka vyakukindulwisa wangana wavaIsalele hano hamavu mangana vakalivwise kuwaha upahu naulemu muwangana wahano hamavu naKulishitu hamwe.

Salome, naye yakaposetolo Yakova naYowano apwile halizavu lyavaze vapwile nakuya naMwata. Yesu ahanyine ava vaposetolo jenyi vavali lijina lize lyalumbunwine ngwavo “Vana vaMikalateta,” pamo  mwomwo yamichima yavo yamatoto. (Mako 3:17; Luka 9:54) Kaha nawa ava vaposetolo jenyi vapwile namuchima wakufwila kupwa vavalemu muWangana waKulishitu. Nanevo atachikijile chuma kana. Ngocho ayile kuli Yesu, alifukwile kuli ikiye nakuhanjikilako vana venyi avevwile uselewa. Yesu amuhulishile ngwenyi: “Uli nakusaka ika?” Ambile kuli Yesu ngwenyi: “Vetavile ava vana vami vavali vakatwamenga ou kulivoko lyove lyachilyo, ou kulivoko lyove lyachimoswe muWangana wove.”—Mateu 20:20, 21.

Vyuma ahanjikile ou pwevo vyafumine kuli Yakova naYowano. Hakukumisa kuvuluka vyuma vize navimwivwisa sonyi vize mwakahitamo, Yesu avalwezele ngwenyi: “Enu kamwatachikijile chuma muli nakulombako. Uno munahase kunwa lupasa elu nguli nakusaka kunwa kalinwomu nyi?” Vakiko vamukumbulwile ngwavo: “Eyo, tunahase.” (Mateu 20:22) Chipwe ngocho, vyuma ahanjikile kavyavalumbunukilileko.

Kaha Yesu avalwezele ngwenyi: “Lupasa lwami munahase kulunwa vene, oloze kutwama kulivoko lyami lyachilyo nakulivoko lyami lyachimoswe keshi yami ngweji kuchihanangako, oloze Tata ikiye eji kuchihananga vaze nawahishila.”—Mateu 20:23.

Omu vaposetolo vakwavo likumi vevwile vyuma valombele vaYakova naYowano, vevwile kupihya. Uno echi chili nakulumbununa nge vaYakova naYowano vakiko vapwile vandundu mutete muchihande chakufwila kutachikiza iya apwile wamulemu mukachi kavaposetolo tahi? (Luka 9:46-48) Chamokomoko nomu chapwile, echi chihande vakatwile halwola kanelu chasolwele nge vaposetolo 12 kavevwile vyuma avahuhumwine Yesu ngwenyi vatela kupwa vakulikehesako. Uze muchima wavo wakufwila ulemu watwalileho lika.

Yesu jino apwile nakusaka kuwana jila yakukumishilamo ukalu kanou navikokojola wanehele. Asanyikile vaposetolo jenyi 12 nakuvahuhumuna ngwenyi: “Enu munatachikiza ngwenu vaze vasoloka kupwa nangolo jakuyula vaka-mafuchi, veji kulilingisanga kupwa vakaka javo, kaha vatu vavalemu veji kusololanga ngolo javo hali vakiko. Oloze enu kamwatela kulinga ngochoko. Weshowo mwasaka kupwa wamulemu hali enu apwenga muka-kumizachila, kaha weshowo mwasaka kupwa watete hali enu apwenga ndungo yavosena.”—Mako 10:42-44.

Yesu avahanyine chakutalilaho chenyi chize vatela kukavangiza. Ambile ngwenyi: “Mwanamutu kejile mangana vamuzachilenga milimoko, oloze mangana azachile vatu milimo nakuhana mwono wenyi kupwa ndando yakusokola vavavulu.” (Mateu 20:28) Yesu azachililenga vakwavo hamyaka yitatu. Kaha nawa avazachilile lika palanga nakukufwa chenyi. Tumbaji twenyi vatelele kupwa namuchima nge uze waKulishitu wakufwila kuzachila vakwavo keshi wakufwila kumuzachila ikiyeko, wakulikehesa keshi uze wakufwila ulemuko.