Yesu hakupwa wakukupuka mwosena, kamwene ukalu uze veji kumonanga vatu vosena nakulizakamina chize veji kupwanga nachoko. Chipwe ngocho, apwile namuchima wakuzakama vatu. Alisuwilenga kukafwa vatu, nakuvalingila vyuma vasakile chikuma. Eyo, keke yikiko yamulingishile akafwe vatu. Ngocho shinganyekenu havyakutalilaho vili muKapetulu 32, na 37, na 57, na 99.

Vatu vosena, vanyike navakulwane, vachiwanyinenga kupwa chachashi kupandama kuli Yesu mwomwo kalimwene kupwa wamulemu kuhambakana vakwavo chipwe kulivulishila milimo nakuhona kuwana lwola lwakukafwa vakwavoko. Vatu vevwilenga kuwaha kupwa naYesu mwomwo apwile namuchima wakuvazakama. Hakusaka mumone chishina kanechi, talenu Kapetulu 25, na 27, na 95.

Yesu alombelenga kuli Ise lwola lwosena omu apwilenga uka wenyi nomu apwilenga navaka-kulemesa Kalunga vamuchano. Kalombelenga hakulya kahako, oloze alombelenga nawa nahalwola lweka. Chakutalilaho, alombelenga hakusakwilila Ise, nahakumwalisa, nahakusaka amutwaminyine shimbu kanda asakule vyakulinga. Talenu vishina kana muKapetulu 24, na 34, na 91, na 122, na 123.

Yesu alisuwilenga kukafwa vakwavo nahalwola luze atelelele kunoka chipwe kulihizumuna. Kapwile namuchima wakusaka kupwa ndundu muteteko. Chikupu vene, asolwele chakutalilaho chamwaza chize twatela kukavangizanga. Linangulenu chishina kanechi muKapetulu 19, na 41, na 52.

Yesu kanangwilenga kaha vatu vyakukonekela vakwavoko, oloze naikiye akonekelelenga tumbaji twenyi navatu veka. Shikaho hunananenu havyakutalilaho vili muKapetulu 26, na 40, na 64, na 85, na 131.

Upolofweto wahanjikile lyehi ngwawo vaYuleya vavavulu navakakana kwitavila Meshiya, kaha vaka-kole jenyi nawa navakamujiha. Vyuma kana kachi vyalingishile Yesu alingile vatu vyuma vyavindende kaha. Oloze azachile natwima hakukundwiza kulemesa chamuchano. Yesu asolola chakutalilaho chamwaza kuli vaka-kumukavangiza chakupwa natwima chamokomoko nakala ukalu navamona. Talenu Kapetulu 16, na 72, na 103.

Yesu apwile wamulemu chikuma mujijila jajivulu kuli vatu vakuhona kukupuka mwosena. Chakutalilaho, apwile nachinyingi namangana chikuma kuhambakana vatu vosena. Kukupuka mwosena chalingishile Yesu apwenga nauhashi wakuhambakana kala mutu uze apwilenga nenyi. Oloze alinyishile nakuzachila vakwavo. Wanenu vyakutalilaho vyamwaza hachishina kanechi muKapetulu 10, na 62, na 66, na 94, na 116.

Yesu atalililenga chikoki vaposetolo jenyi navatu veka omu vahonene kulondezeza chakutalilaho chenyi chipwe kulinga vyuma avanangwilenga. Avatalililenga chikiko nakuhilukila vishina avanangwilenga mangana vivakafwe vapandame kuli Yehova. Shinganyekenu havyakutalilaho vyaYesu vyakutalilila vatu chikoki vize vili muKapetulu 74, na 98, na 118, na 135.