Omu Yesu apwile kwakamwihi nakukumisa mulimo wenyi wakwambulula, atwalileho lika kuzachisa vifwanyisa hakusopolola vaka-kusoneka navapilishitu vavakulwane. Shikaho vasakile kumujiha. (Luka 20:19) Oloze Yesu atwalileho lika kuvasopolola, kaha ahanjikile chifwanyisa chikwavo ngwenyi:

“Wangana wamelu unafwane nge mwangana uze awahishile chifupawenga chamwanenyi walunga. Kaha atumine vandungo jenyi vayenga nakusanyika vatu vaze alanyine lyehi vezenga kuchifupawenga, oloze vakanyine kwiza.” (Mateu 22:2, 3) Yesu aputukile kuhanjika chifwanyisa chenyi hakuvuluka “Wangana wamelu.” Ngocho “mwangana” emanyinyineko Yehova Kalunga. Nyi ngachilihi mwanamwangana navatu vaze alanyine kuchifupawenga? Mwanamwangana emanyinyineko MwanaYehova uze apwile nakuhanjika echi chifwanyisa, kaha vatu vaze alanyine mwangana vemanyinyineko vatu vaze navakapwa nayou Mwana muWangana wamelu.

Veya vapwile vatete kulanya? Uno vatu muka vaze Yesu navaposetolo jenyi vambulililenga mujimbu waWangana? Vambulililenga kuli vaYuleya. (Mateu 10:6, 7; 15:24) Ou muyachi wetavilile Lushiko lwamuJishimbi mu 1513 B.C.E., ngocho vakiko vapwile vatete kupwa “muwangana wavapilishitu.” (Kulovoka 19:5-8) Uno lwola muka vavasanyikile “kuchifupawenga”? Vavasanyikile mu 29 C.E. omu Yesu aputukile kwambulula vyaWangana wamelu.

Uno vaIsalele vavavulu vakwile ngachilihi omu vavalanyine? Yesu ambile ngwenyi, “vakanyine kwiza.” Vatwamina vamukwitava vavavulu navatu veka vakanyine Meshiya uze vatongola kuli Kalunga kupwa Mwangana.

Chipwe ngocho, Yesu ambile ngwenyi vaYuleya vavasanyikile cheka. Ambile ngwenyi: “[Mwangana] atumine cheka vandungo jenyi vakwavo ngwenyi, ‘Kavalwezenu vaze ngunalanye ngwenu: “Talenu! Ngunawahisa kulya chami chahamulungu, vangombe jami navimuna jami vakununa vanavajihi lyehi, kaha vyosena vinakumu lyehi kuwahisa. Twayenu kuchifupawenga.”’ Oloze vakiko vahombwanyishile nakuliyila kwavo, umwe kuwande wenyi, mukwavo kumilimo yenyi yakusekasana. Oloze veka vakwachile  vaze vandungo jenyi, vavasawile nakuvajiha.” (Mateu 22:4-6) Vyuma kana vyalitombwele navyuma vize vyasolokele omu chaputukile chikungulwilo chavaka-Kulishitu. Halwola kana, vaYuleya vahashile cheka kupwa nakutokwa chakupwa muWangana, oloze vavavulu vakanyine nakuyanjisa ‘vandungo jamwangana.’—Vilinga 4:13-18; 7:54, 58.

Vyuma muka vyasolokele kumuyachi waIsalele? Yesu ambile ngwenyi: “Mwangana akwachile utenu, kaha atumine maswalale jenyi vakajihe vaze vajihile vandungo jenyi nakwocha nganda yavo.” (Mateu 22:7) Chuma kana chasolokele kuli vaYuleya mu 70 C.E. omu vaLoma venyekele “nganda” yaYelusalema.

Uno omu vakanyine kuya kuze avasanyikile mwangana chalumbunwine nge mwangana keshi kukalanya vatu veka tahi? Omu keshi mukiko ahanjikile Yesu muchifwanyisa chenyiko. Ambile ngwenyi: “Jino [mwangana] ambile kuli vandungo jenyi ngwenyi, ‘Chifupawenga vanachiwahisa lyehi, oloze vaze ngwalanyine kavatelemo kupwako. Shikaho, yenunga jino kujijila jize jalovoka munganda, kaha veshovo namuwana valanyenu vezenga kuchifupawenga.’ Ngocho vaze vandungo vayile kujijila, kaha vakungulwile vosena vaze vawanyine, vakuhuka navaze vakwoloka. Kaha zuvo yachiwanyino chakulimbata yazalile to navaze vejile nakulya.”—Mateu 22:8-10.

Kaposetolo Petulu aputukile kukafwa vatu vakumafuchi eka, vaze kavapwile vaYuleyako, vapwenga vaka-Kulishitu vamuchano. Kaha mu 36 C.E., Kolonelyu uze apwile kapitau kamaswalale javaLoma natanga yenyi vatambwile shipilitu yaKalunga nakupwa jino muWangana wamelu uze avulukile Yesu.—Vilinga 10:1, 34-48.

Yesu ambile ngwenyi keshi vosena vaze vejile kuchifupawenga vavetavilile kuli ‘mwanganako.’ Ambile ngwenyi: “Omu mwangana engililemo nakukekesa vangeji, amwenemo mutu umwe azenekele kuvwala uvwalo wahachilika chaulo. Kaha ambile kuli ikiye ngwenyi, ‘Ove lunga, unengila ngachilihi muno chakuzeneka kuvwala uvwalo wahachilika chaulo?’ Ikiye ahonene vyakuhanjika. Jino mwangana ambile kuli vangamba jenyi ngwenyi, ‘Mukasenu kumavoko nakumahinji mumumbile mumilima kuweluka. Mwamuze vene mumwakapwanga nakulila nakulingenjunga kumazo.’ Mwomwo vaze valanya vapwa vavavulu, oloze vaze vasakula vapwa vavandende.”—Mateu 22:11-14.

Vatwamina vamukwitava vaze vapwile nakwivwilila Yesu kavevwishishile ulumbunwiso wavyuma ahanjikile Yesuko. Chipwe ngocho, vapihililile nakufwila chikuma kumujiha mwomwo avevwishilenga sonyi.