Omu Yesu ayile kutembele lyaMande, Nyisane 10, ahanjikile vyakufwa chenyi chize chapwile nakupandama. Yesu alizakaminyine halijina lyaKalunga, ngocho ambile ngwenyi: “Ove Tata, tohwesa lijina lyove.” Kaha mwilu mwafumine lizu lyalinene ngwalyo: “Lijina lyami ngwalitohwesa lyehi, kaha nangulitohwesa cheka nawa.”—Yowano 12:27, 28.

Vatu vaze vevwile lizu kana valikomokelele, vamwe vashinganyekele ngwavo vanevu mukalateta. Kaha veka vambile ngwavo: “Kangelo nahanjika kuli ikiye.” (Yowano 12:29) Oloze vevwile lizu lyaYehova. Elu kalwapwile lwola lwatete vatu kwivwa lizu lyaKalunga kutalisa kuli Yesu.

Mwahichile myaka yitatu nachimbwa kufuma haze vambapachishile Yesu, kaha halwola kana Yowano Muka-kumbapachisa evwile lizu lyaKalunga omu Kalunga ahanjikile kuli Yesu ngwenyi: “Ou ikiye Mwanami, ou ngwazanga, ou ngwevwila kuwaha.” Kufumaho, omu chiwanyino chaPaseka chakumine mu 32 C.E., Yesu alyalumwine mweka kumeso aYakova, naYowano naPetulu. Vaze malunga vatatu vevwile Kalunga mwahanjika ngwenyi: “Ou ikiye Mwanami, ou ngwazanga, ou ngwevwila kuwaha. Mwivwililenunga.” (Mateu 3:17; 17:5) Oloze jino halwola kanelu lwamuchitatu, vatu vavavulu vevwile lizu lyaYehova.

Yesu ambile ngwenyi: “Lizu eli lineza mwomwo yayenu, keshi mwomwo yayamiko.” (Yowano 12:30) Lizu kana lyasolwele hatoma nge Yesu apwile MwanaKalunga uze vavulukile chimweza ngwavo Meshiya.

Kushishika chaYesu hano hamavu chasolwele vyuma vivali. Chatete chasolwele omu vatu vatelele kulondezeza kuyoya chenyi, kaha chamuchivali, chasolwele nge Satana Liyavolo, muka-kuyula kano kaye vatelele kumunongesa. Yesu ambile ngwenyi: “Jino kaye kano vali nakukasopesa, kaha muka-kuyula kano kaye navamukatumuna.” Kufwa chaYesu chasolwele nge ikiye afungulwile kufwa, keshi kufwa chafungulwile ikiyeko. Mujila muka? Alumbunwine ngwenyi: “Ami, nge vanangufumisa lyehi hamavu, nangukakoka vatu vakulisezaseza vosena vakeze kuli ami.” (Yowano 12:31, 32) Kufwa chaYesu hachitondo chalingishile vatu vavavulu vapandame kuli ikiye, nakuvasokolwela jila yakukayoya haya myaka yosena.

Omu Yesu ahanjikile ngwenyi ‘navamufumisa hamavu,’ liyongomena lyambile ngwalyo: “Etu twevwa muJishimbi ngwavo Kulishitu mwatwamanga haya myaka yosena. Nyi ove nawamba ngachilihi ngwove Mwanamutu vatela kumufumisa hamavu? Uno ou Mwanamutu ikiye iya?” (Yowano 12:34) Numba tuhu kwapwile unjiho wauvulu wakuvalingisa vetavile, kuhakilako vene nakwivwa lizu lyaKalunga ivene, oloze vatu vavavulu kavetavilile ngwavo Yesu ikiye Mwanamutu, ikiye Meshiya uze vashikileko.

Ngana muze ahanjikile hakavanga, Yesu alivulukile ivene kupwa “mumunyi.” (Yowano 8:12; 9:5) Alwezele lize liyongomena ngwenyi: “Kumunyika nachipwa mukachi kenu hatando yayindende. Tambukenunga shimbu kumunyika chili nayenu, kuchina milima nayimifungulula . . . Shimbu kumunyika chili nayenu, fwelelenu kumunyika, mangana mupwenga muvana vakumunyika.” (Yowano 12:35, 36) Oloze Yesu achinyine, mwomwo likumbi lyaNyisane 10 keshi likiko likumbi atelelele kufwako. Halikumbi lyaNyisane 14, hachiwanyino chaPaseka hakiko atelelele ‘kumufumisa hamavu,’ chikiko kumusukika hachitondo.—Wavaka-Ngalesha 3:13.

Mulimo wakwambulula azachile Yesu wasolwele hatoma kutesamo chaupolofweto omu vaYuleya vakanyine kufwelela Yesu. Kapolofweto Isaya avulukilile chimweza ngwenyi meso avatu vavavulu nawakelava, kaha navakakakamisa michima yavo nakuhona kwitavila vakavahindule. (Isaya 6:10; Yowano 12:40) Chikupu vene, vaYuleya vavavulu valikangile nakukana vyuma vyasolwele nge Yesu ikiye vene Muka-kuvasokola uze vashikile, ikiye jila yakuya kukuyoya.

Oloze Nyikotemu, naYosefwe wakuAlimateya, navaka-kuyula veka vavavulu “vamufwelelele” Yesu. Uno vasolwele lufwelelo lwavo tahi nyi vakanyine kulusolola mwomwo yakuchina kuvafumisa musunangonga chipwe mwomwo ‘yakuzanga kuvatohwesa kuli vatu’?—Yowano 12:42, 43.

Yesu ivene asolwele vyuma atela kulinga mutu  numba afwelele muli ikiye, ambile ngwenyi: “Weshowo mwangufwelela, kafwelelele ami kahako, oloze nauze nawa angutumine ami, kaha weshowo nangumono ami, namono nawa naUze angutumine ami.” Muchano uze Kalunga anangwile Yesu mangana aunangule kuvatu, wapwile waulemu chikuma, ngocho Yesu ambile ngwenyi: “Weshowo mwanguleununa ami nakuhona kwitavila mazu ami, kwali umwe mwakamusopesa. Mazu awa ngunahanjika akiko vene nawakamusopesa halikumbi lyakukuminyina.”—Yowano 12:44, 45, 48.

Yesu akukulwile jino ngwenyi: “Ami kangwahanjikile mwaya vishinganyeka vyayami iveneko, oloze ivene Tata uze angutumine ikiye nanguhane lushimbi lwavyuma ngwatela kwambulula navyuma ngwatela kuhanjika. Kaha ngunatachikiza ngwami lushimbi lwenyi lukiko vene lweji kunehanga kuyoya chahaya myaka yosena.” (Yowano 12:49, 50) Yesu atachikijile ngwenyi kalinwomu amwange manyingenyi kupwa wana hali vatu vaze navamufwelela.—Wavaka-Loma 5:8, 9.