Lyacheleko, lyaSondo, haNyisane 9, Yesu natumbaji twenyi vafumine kuMbetane nakuya kuYelusalema. Omu vapwile nakupandama kuMbetefwaje, haPili yaMilive, Yesu alwezele tumbaji twenyi vavali ngwenyi:

“Yenu mwimbo lize muli nakumona, kaha namuwana chimbulu vanamukase, nalivuvu lyenyi hamwe. Vakasununenu muvanehe kuli ami. Kachi nge mutu mwamihula, ambenu ngwenu, ‘Mwata ali nakuvasaka.’ Omu mwevwa ngocho, mwavasuula washiwashi.”—Mateu 21:2, 3.

Tumbaji vahonene kutachikiza nge vyuma avalwezele Yesu vyapwile vyaupolofweto wamuMbimbiliya. Kutwala muze, vatachikijile jino ngwavo vyuma ahanjikile Yesu vyapwile vyamuupolofweto waZekaliya. Ou kapolofweto ahanjikile chimweza ngwenyi Mwangana uze ashikile Kalunga mwakengila muYelusalema ‘wakulinyisa, kaha mwakatambukila hachimbulu, mwakatambukila halivuvu lyachimbulu, lyamwanachimbulu.’—Zekaliya 9:9.

Omu tumbaji vahetele kuMbetefwaje nakumbata livuvu lyachimbulu nanaye, vatu vaze vemanyine kwakamwihi vavehwile ngwavo: “Ika muli nakukasunwina ou livuvu lyachimbulu?” (Mako 11:5) Oloze omu vavalwezele ngwavo Mwata ikiye apwile nakusaka tunyama kana, kaha vatu vechele tumbaji vambate vaze tunyama nakuvatwala kuli Yesu. Tumbaji vahakile uvwalo wavo wahelu hali vaze vimbulu, kaha Yesu atwamine halivuvu lyachimbulu.

Liyongomena lyavatu lyaputukile kutohwa omu Yesu apwile nakwingila muYelusalema. Vatu vavavulu valile uvwalo wavo mujila. Veka vatetele “mitango yamafwo muchipapa” nakuyala mujila. Vatambakanyinenga ngwavo: “Tuli nakukulomba umulwile. Vakisula ou mweza mulijina lyaYehova. Vakisula shina Wangana ou uli nakwiza wasetu Ndavichi.” (Mako 11:8-10) VaFwaliseu vaze vapwile mulizavu vapihililile chikuma hakwivwa vyuma vatambakanyinenga ava vatu. Valwezele Yesu ngwavo: “Ove Muka-kunangula, vatenukile tumbaji twove.” Yesu avakumbulwile ngwenyi: “Nangumilweza ngwami, ava nge navahola, kaha malolwa nawatambakana.”—Luka 19:39, 40.

Omu Yesu atalile Yelusalema, aputukile kulila nakwamba ngwenyi: “Watelanga kutachikiza vyuma vyakuneha kuunda halikumbi lyalelo, oloze jino vanavisweke kuchina nauvimona nameso ove.” Yelusalema navayinongesa mwomwo yakulikanga chayo. Yesu apolofwetele ngwenyi: “Vaka-kole jove navakatunga kembwe yavitondo vyakusongoloka jingulwishi ndo. Navakakuhaka muchingombela, nakukujingilika kumitamba yosena. Navakakulindumwina hamavu navana vove vaze vali muli ove, kaha kaveshi kukaseza lilolwa limwe helu lyalikwavo muli oveko.” (Luka 19:42-44) Mazu ahanjikile Yesu apwile amuchano, Yelusalema vayinongesele mumwaka wa 70 C.E.

Omu Yesu engilile muYelusalema, “munganda mwosena mwakatukile liuya ngwavo: ‘Nyi ou iya?’” Kaha aze mayongomena ambilenga lika ngwawo: “Ou ikiye kapolofweto Yesu wakuNazaleta yakuNgalileya.” (Mateu 21:10, 11) Vatu vaze vapwile haliyongomena vaze vamwene omu Yesu asangwile Lazalu valwezele vakwavo chuma kanechi chakukomwesa. VaFwaliseu vamwene ngwavo nevi navalinga vene vyauchi. Ngocho valihanjikishile mwavomwavo ngwavo: “Kaye kosena kali nakumukavangiza.”—Yowano 12:18, 19.

Omu Yesu ahetele muYelusalema, ayile kutembele nakunangula vatu nganomu alingilenga lwola lwosena. Omu ahetele kutembele, okile tupuputa navitonji. Jino omu vapilishitu vavakulwane navaka-kusoneka vamwene vyumevi alingile nomu vevwile vanyike mutembele navatambakana ngwavo, “Tuli nakukulomba umulwile MwanaNdavichi,” vakiko vapihililile chikuma. Ava vatwamina vamukwitava vehwile Yesu ngwavo: “Unevuko omu vali nakuhanjika ava nyi?” Yesu avakumbulwile ngwenyi: “Uno kanda mutangengaho lyehi mazu awako tahi, ngwavo, ‘Unalingisa tunwa twavana vavandende navakemba kukwalisa’?”—Mateu 21:15, 16.

Yesu amwene vyuma vyosena vize vyapwile mutembele. Omu kwatokele, ikiye natumbaji twenyi vayile. Shimbu kanda Nyisane 10 yiputuke, Yesu akindulukile kuMbetane kuze akasavalile lyaSondo.