Pilatu alwezele lize liyongomena lyasakile kujiha Yesu ngwenyi: “Kangwamuwananga namilonga muli nakumuhanako. NaHelote nawa kayiwanyineko.” (Luka 23:14, 15) Pilatu hakusaka kusuula Yesu, azachishile jila yeka, ambile ngwenyi: “Enu mweji kusakanga ami ngumikasunwinenga mutu umwe haPaseka. Shikaho namusaka ngwenu ngumikasunwine Mwangana wavaYuleya tahi?”—Yowano 18:39.

Pilatu atachikijile ngwenyi mukamenga mwapwile Mbalapa uze vatachikijile vatu kupwa mwiji, muka-kufumbukila fulumende, muka-kujiha vatu. Ngocho Pilatu ahulishile ngwenyi: “Umwe ulihi namusaka ngwenu ngumikasunwine, Mbalapa tahi, nyi Yesu ou vavuluka ngwavo Kulishitu?” Hakuwana nge vatu vavakunywile kuli vapilishitu vavakulwane, ngocho vatu vambile ngwavo vavakasunwine Mbalapa keshi Yesuko. Pilatu avahulishile cheka ngwenyi: “Umwe ulihi hali ava vatu vavali namusaka ngwenu ngumikasunwine?” Liyongomena lyatambakanyine ngwavo: “Mbalapa”!—Mateu 27:17, 21.

Pilatu alikomokelele, kaha avahulishile ngwenyi: “Nyi Yesu ou vavuluka ngwavo Kulishitu ngumulinge muka?” Vatu vatambakanyinyine hamwe ngwavo: “Vamupapalile hachitondo!” (Mateu 27:22) Ava vatu vasakile Yesu uze kapwile nachuma chakumuhanyina mulonga afwenga. Pilatu alembelelele vatu ngwenyi: “Mwomwo ika? Chuma muka chachipi nalingi ou mutu? Ami kangwamuwanyine namulonga atela kufwilako. Shikaho nangumuzangamisa nakumukasununa.”—Luka 23:22.

Numba tuhu Pilatu esekele nangolo jenyi josena mangana asuule Yesu, oloze lize liyongomena lyapihililile chikuma nakwamba ngwalyo: “Vamupapalile hachitondo!” (Mateu 27:23) Vatwamina vamukwitava vakunywile vatu vetavile mulonga wamanyinga. Kawapwile manyinga achihwanga chipwe muka-kujiha vatuko, oloze apwile manyinga amutu wakuzeneka chuma chakumuhanyina mulonga. Kaha nawa mwahichile kaha makumbi atanu kufuma haze vamutambwile muYelusalema namavoko avali nge Mwangana. Nge tumbaji twaYesu kuvapwile, kachi vaholele kulu nakulikomokela.

Pilatu amwene ngwenyi vyuma apwile nakuhanjika kuli vatu vavimwene kupwa vyamokomoko. Vatu vapwile nakutambakana chikuma, ngocho ambachile meya halilonga nakusana kumavoko enyi kumeso avatu vavavulu. Kaha ambile ngwenyi: “Ami kangweshi namulonga wamanyinga ayou mutuko. Mulonga kana uli hali enu vavene.” Numba ngocho vatu kavalumwine vishinganyeka vyavoko, oloze vambile ngwavo: “Mulonga wamanyinga enyi upwenga tuhu hali etu nahali vana vetu.”—Mateu 27:24, 25.

Ngocho nguvulu asakile kuvasuulwisa muchishishisa chakulinga vyuma vize amwene ngwenyi vyakwoloka. Kaha Pilatu etavilile vyuma vize vasakile vatu kulinga, ngocho asuwile Mbalapa kuliyongomena. Oloze ahanyine Yesu kuli vatu vamumwenese vihuli nakumwipula vikote.

 Omu vakumishile kumuveta, maswalale vambachile Yesu nakumwingisa muchipango changuvulu. Maswalale vavavulu nawa valikungulwile nakuputuka kumuyanjisa chikuma. Vatungile muchama wamingonga nakumuvwikawo kumutwe. Maswalale vambachile lihongo nakulihaka mulivoko lyaYesu lyachilyo nakumuvwika lihina lichila, ngana lize vavwalilenga vatu vakuwangana. Vamusawile ngwavo: “Mwoyo wove, ove Mwangana wavaYuleya!” (Mateu 27:28, 29) Kaha nawa vamufwijililenga maleji nakumuveta jimbanda kumeso. Vamutambwile lize lihongo nakumuvetalyo mumutwe muze mwapwile “muchama” wamingonga nakumutwa mbandu.

Yesu alamine kulonga chenyi chamokomoko navihuli vyosena evi ahichilemo, ngocho Pilatu evwile kuwaha nakusaka kulihakwila hakwamba ngwenyi: “Ivwenu! Nangumulovola nakumuneha kuli enu mangana mutachikize ngwenu, ami kangwamuwanyine nakatengako.” Uno Pilatu ashinganyekele ngwenyi kulovola Yesu haweluka oku vanamutu jimbandu namanyinga ali nakupwelumuka, nachilingisa vatu valumune vishinganyeka vyavo tahi? Omu Yesu emanyine kulizavu lyavatu vamichima yaukenya, Pilatu ambile ngwenyi: “Talenu! Ou mutu!”—Yowano 19:4, 5.

Numba tuhu Yesu vamutwile jimbandu nakumuvulumuna, oloze aholele kulu nakulama kulonga chenyi. Chuma kanechi chalingishile Pilatu ahanjike nakavumbi nakumwivwila keke.