Omu Yesu apwile kutembele halikumbi lyamakumishilo, atwalileho kusopolola vaka-kusoneka navaFwaliseu hakuvavuluka hatoma ngwenyi vaka-kulyonga. Ahanjikile ngwenyi: “Mweji kutomesanga kuweluka walupasa nalilonga, oloze mutulo munazale nachipululu namuchima wakundupukila muvyuma vafwila. Ove kaFwaliseu wakapuputa, vangila kutomesa mutulo yalupasa nalilonga, numbanyi kuweluka walwo kutome.” (Mateu 23:25, 26) Numba tuhu vaFwaliseu vakavangijilenga chikuma vyakulitomesa kweseka najishimbi nakusoloka kanawa haweluka, oloze kavahakile muchima kumutu wavo wamukachiko, kaha nawa vahonene kutomesa muchima wavo wachifwanyisa.

Kulyonga chavo chasolokele nawa hatoma omu valisuwilenga kutunga vimbumbe vyavapolofweto nakuviwahisa. Oloze ngana muze ahanjikile Yesu, vapwile “vana vavaze vajihile vapolofweto.” (Mateu 23:31) Echi chasolokele omu vasakile kujiha Yesu.—Yowano 5:18; 7:1, 25.

Yesu ahanjikile jino vyuma vyapwile nakuvavandamina ava vatwamina vamukwitava nge kaveshi kupihilila nakwalumukako, ambile ngwenyi: “Enu manoka, enu vana vaviyenge, kusopesa chaNgehena namukachichina ngachilihize?” (Mateu 23:33) Chinema chaHinome chize chapwile kwakamwihi nakuze apwile Yesu chapwilenga chakwochela swali, kaha chemanyinyineko kunonga chahaya myaka yosena chize chavandaminyine vaka-kusoneka navaFwaliseu vakuhuka.

Tumbaji navakemanyinako Yesu kupwa “vapolofweto navaka-mangana navaka-kunangula.” Uno navakavalinga muka? Yesu alwezele vatwamina vamukwitava ngwenyi: ‘Tumbaji twami vamwe namukavajiha nakuvasukika havitondo, kaha vakwavo namukavaveta vikote mujisunangonga jenu nakukavayanjisa munganda hinganda, mangana manyinga avaka-kwoloka osena aze vanamwange hano hamavu akeze hali enu, kufuma vene kumanyinga amutu wakwoloka Avele nakuheta kumanyinga aZekaliya . . . uze mwajihile.’ Kaha avahuhumwine ngwenyi: “Chamuchano vene nangwamba kuli enu ngwami, vyuma vyosena evi navikeza hachisemunwino chino.” (Mateu 23:34-36) Chuma kana chasolokele mu 70 C.E. omu maswalale javaLoma vanongesele Yelusalema nakujiha vaYuleya vavavulu chikuma.

Kushinganyeka hachuma kanechi chevwishile chikuma Yesu kupihya. Ngocho ahanjikile naushona ngwenyi: “Ove Yelusalema, ove Yelusalema, ove muka-kujiha vapolofweto, ove muka-kwasa malolwa vaze vanatumu kuli ove. Ngwasakile mapapa kakavulu kukungulula vana vove nge omu chali eji kukungulwilanga vana venyi mumavava enyi. Oloze enu kamwasakileko. Talenu! Zuvo yenu vanamiselayo.” (Mateu 23:37, 38) Vatu vaze vevwile mazu kana atela vasakile kutachikiza “zuvo” apwile nakuvuluka. Kutala apwile nakuvuluka tembele yaupahu yamuYelusalema yize vakingilenga kuli Kalunga tahi?

Yesu atwalileho ngwenyi: “Nangwamba kuli enu ngwami, chikupu vene kamweshi kungumona chekako kufuma oholili palanga nomu namukamba ngwenu, ‘Vakisula ou mweza mulijina lyaYehova.’” (Mateu 23:39) Ahanjikile mazu aupolofweto ahali Samu 118:26 akwamba ngwavo: “Vakisula ou mweza mulijina lyaYehova. Natumikisula muzuvo yaYehova.” Chikupu vene, omu venyekele eyi tembele, naumwe wauchi ejile kuchihela kana mulijina lyaKalunga.

Omu Yesu apwile mutembele ayile nakwimana kuze kwapwile vikasha vyamawana vyakufwana nge jineta. Vatu vahakilenga mawana muvikasha kana. Yesu amwene vaYuleya vakulisezaseza navalinga ngocho, kaha vaka-luheto vahakilengamo “jimbongo jachichele jajivulu.” Jino Yesu amwene tuliwe wakuhutwa uze ahakilemo “tujimbongo twachichele tuvali twandando yayindende chikuma.” (Mako 12:41, 42) Chikupu vene, Yesu atachikijile omu evwile Kalunga hawana ahanyine uze tuliwe.

Yesu asanyikile tumbaji twenyi nakwamba ngwenyi: “Chamuchano vene nangumilweza ngwami, ou tuliwe muka-kuhutwa nahakemo jimbongo jajivulu kuhambakana vosena vaze vali nakuhaka jimbongo muvikasha vyamawana.” Mwomwo ika ambilile ngocho? Yesu alumbunwine ngwenyi: “Vosena vanahakemo  jimbongo jakufuma kujimbongo javo jajivulu, oloze ikiye, nakukalikiza chenyi nahakemo jimbongo jize apwanga najo josena jakulikafwa najo mukuyoya chenyi.” (Mako 12:43, 44) Chikupu vene, ou pwevo apwile navishinganyeka navilinga vyakulihandununa navize vyavatwamina vamukwitava.

Omu likumbi lyaNyisane 11 lyapwile nakulauka, Yesu afumine kutembele kuze apwile halwola lwamakumishilo. Kaha kambaji kenyi umwe ambile ngwenyi: “Ove Muka-kunangula, tala omu awaha awa malolwa najeji jizuvo!” (Mako 13:1) Chikupu vene, malolwa amwe vatungishile kembwe yatembele apwile amanene, kaha alingishile kembwe kana yipwenga yakukola nakushimbula. Oloze mazu ahanjikile Yesu apwile akukomwesa, ambile ngwenyi: “Eji jizuvo jajinene unajimono nyi? Hano kaheshi lilolwa limwe nalikasala helu lyalikwavo chakuzeneka kuliholwela hamavuko.”—Mako 13:2.

Omu akumishile kuhanjika vyuma kana, Yesu navaposetolo jenyi vayile kuChinema chaKichilone nakukanduka haPili yaMilive. Halwola kana apwile navaposetolo jenyi vawana, vaPetulu, naAndelei, naYakova, naYowano. Kaha haze hapili vahashile kumona kanawa tembele yaupahu.