Yesu atela azeyele mwomwo yakulomba ufuku wosena nakusakula tumbaji 12 vapwenga vaposetolo jenyi. Omu kwachele, apwile lika nangolo, kaha afwililile kukafwa vatu. Anangwile vatu kupili yamuNgalileya, pamo kwakamwihi naKapelenau kuze apwile nakuzachilanga chikuma.

Mayongomena avatu ejile kuli ikiye kufuma kuvihela vyakwakusuku. Vamwe vafumine kusulo yaYelusalema nakuYuleya. Kaha veka vafumine kujinganda jakukalungalwiji jaTule naShitone kunote. Mwomwo ika ava vatu vejililile kuli Yesu? “Vejile nakumwivwilila nakusaka ngwavo avahindule kumisongo yavo.” Kaha omu mukiko vene chapwile, Yesu ‘avahindwile vosena.’ Achishinganyekenu hachuma kana! Vaka-kuviza vosena vanavahindula kumisongo yavo. Yesu okile “navaze nawa vapwile nakuyanjiwa navashipilitu vavapi,” vaze vapwile nakuyanjisa kuli vandemone jaSatana.—Luka 6:17-19.

Yesu anyinyine helu lyapili nakuputuka kunangula liyongomena lyavatu lize lyamujingilikile. Tumbaji twenyi chikumanyi vaposetolo jenyi 12 vatwamine kwakamwihi nayikiye. Vosena vapwile nakwivwilila kuvyuma anangwilenga Yesu uze azachilenga milimo yakukomwesa. Yesu ahanjikile chihande chize changanyalishile vaka-kumwivwilila. Kufuma vene haze, vatu veka vavavulu vananganyala kuchihande chenyi. Nayetu tuvosena tunahase kunganyala kuchihande kana mwomwo muchano, aulumbunwine mujila yayashi kwivwa. Yesu azachishile vyakutalilaho vize vejiva vatu mangana vaze vapwile nakusaka kukavangiza jishimbi jaKalunga mukuyoya chavo, vevwishise vyuma apwile nakunangula. Vyuma muka vyalingisa kunangula chaYesu chipwenga chachilemu?

Vatu vosena vasaka kupwa wakuwahilila. Echi chikiko chalingishile Yesu aputuke kulumbununa vatu vaze vapwa vakuwahilila. Achishinganyekenu omu kunangula kana chakwachile kumichima yavaka-kumwivwilila. Oloze kwapwile vyuma vimwe vize vyavakomwesele chikuma.

Yesu ambile ngwenyi: “Vawahilila vaze vejiva ngwavo vasaka vyuma vyakushipilitu, mwomwo Wangana wamelu unapu wavo. Vawahilila vaze veji kulishonanga, mwomwo navakavavendejeka. . . . Vawahilila vaze veji kwivwanga zala nalipwila lyavyuma vyakwoloka, mwomwo navakavekuchisa. . . . Vawahilila vaze vanayanjishila hakulinga vyuma vyakwoloka, mwomwo Wangana wamelu unapu wavo. Mwawahilila enu navasaula kuvatu nakumiyanjisa . . . mwomwo yayami. Wahililenu, lisambenu.”—Mateu 5:3-12.

Uno Yesu atalikishile mulihi hakwamba ngwenyi “vawahilila”? Kuwahilila kana keshi chize cheji kwizanga mwomwo yaviseke chipwe yakwivwa kaha kuwaha nge mutu ali nalwola lwamwazako. Oloze kuwahilila kana shina chize chamwenemwene, chize cheji kulingisanga muchima wamutu kupwa wakusuuluka mukuyoya chenyi chosena.

Yesu ambile ngwenyi vatu vawahilila shina vaze vasaka vyuma vyakushipilitu, vaze veji kulishonanga hajishili javo, vaze vatachikiza Kalunga nakumuzachila. Numba tuhu vavahunga chipwe kuvayanjisa hakulinga mwaya muchima waKalunga, oloze vawahilila mwomwo vejiva ngwavo vanakwivwisa Kalunga kuwaha, kaha nawa navakatambula kuyoya chahaya myaka yosena.

Vatu vavavulu vashinganyeka ngwavo kupwa naluheto nakufwila chiseke vikiko vyeji kulingisanga mutu kupwa wakuwahilila. Oloze omu keshi mukiko atalishile Yesuko. Alwezele vaka-kumwivwilila ngwenyi: “Lamba kuli enu vaka-luheto, mwomwo vyakumivendejeka navyo munavitambula lyehi vyosena. Lamba  kuli enu munekuta oholyapwa, mwomwo namukevwa zala. Lamba kuli enu muli nakusehelela oholyapwa, mwomwo namukalishona nakulila. Lamba kuli enu, omu vatu vosena navahanjika vyuma vyamwaza hali enu, mwomwo omu mukiko navakakuluka javo valingile kuli vapolofweto vamakuli.”—Luka 6:24-26.

Mwomwo ika luheto, nakusehelela, nakusaka mutu kumwalisa vyeji kunehanga lamba? Mwomwo nge mutu mwafwila vyuma kana, kaha nahase kuvulyama milimo yaKalunga, nakuhona jino kupwa nakuwahilila chamwenemwene. Yesu kapwile nakulumbununa nge kuhutwa chipwe kufwa zala chikiko nachilingisa mutu apwenga wakuwahililako. Oloze apwile nakulumbununa ngwenyi kakavulu vatu vaze vali nakumona ukalu vakiko veji kwivwililanga kukunangula chaYesu nakupwa jino nakuwahilila chamwenemwene.

Yesu alwezele tumbaji twenyi ngwenyi: “Enu mwapwa mumungwa wahamavu.” (Mateu 5:13) Yesu kapwile nakulumbununa ngwenyi vapwile mungwa uveneko. Oloze mungwa uvene weji kulingisanga vyuma vihone kupola. Kulijiko lyakulumbila lyakutembele yaKalunga vahakilengako mungwa wauvulu mangana vauzachise kumawana akulumba. (VyavaLevi 2:13; Ezekele 43:23, 24) Tumbaji twaYesu vapwa “mungwa wahamavu,” kulumbununa nge veji kukafwanga vatu vahone kwenyeka usoko wavo naKalunga, nakupwa navilinga vyamwaza. Chikupu vene, mujimbu veji kwambululanga unahase kukafwa vatu vaze navakulako vakapwe nakuyoya chahaya myaka yosena.

Yesu alwezele cheka tumbaji twenyi ngwenyi: “Enu mwapwa mumumunyi wakaye.” Linongo kaveshi kulisweka mwishi yambangoko, oloze veji kulihakanga hachitumbikilo chalyo mangana limunyike. Shikaho Yesu ambile ngwenyi: “Kumunyika chenu chimunyikenga kuvatu mangana vamonenga vilinga vyenu vyamwenemwene nakumutohwesanga Senu uze ali mwilu.”—Mateu 5:14-16.

Vatwamina vamukwitava chavaYuleya vamwene Yesu kupwa muka-kuhokola Jishimbi jaKalunga, kaha vasakile kumujiha. Shikaho Yesu avalwezele hatoma ngwenyi: “Kanda namushinganyeka ngwenu ngwejile nakwenyeka Jishimbi chipwe Mazu aVapolofwetoko. Kangwejile nakuvyenyekako, oloze ngwejile nakuvitesamo.”—Mateu 5:17.

Yesu amwene Jishimbi jaKalunga kupwa jajilemu chikuma, shikaho akolezezele navakwavo vajimone kupwa jajilemu. Ambile ngwenyi: “Weshowo  mwahokola lushimbi lumwe hajishimbi eji jajindende, nakunangula nawa vakwavo valinge mwomumwe, navakamuvuluka ngwavo wamundende kutalisa kuWangana wamelu,” kulumbununa nge mutu kana keshi kukengila muWangana kanako. Kaha atwalileho ngwenyi: “Oloze weshowo mwajikavangiza nakujinangula vakwavo nawa, navakamuvuluka ngwavo wamunene kutalisa kuWangana wamelu.”—Mateu 5:19.

Yesu nawa ahungilenga vishinganyeka vyavipi vize vyalingishile vatu vahokole Jishimbi jaKalunga. Omu akumishile kwamba ngwenyi Jishimbi jamba ngwajo, “Kanda mukajiha mutuko,” Yesu ambile cheka ngwenyi: “Weshowo mwakwachila lika ndumbwenyi utenu navamusopesa kuzango yakusopela milonga.” (Mateu 5:21, 22) Kukwachila lika mutu utenu chapwa chachipi, mwomwo chinahase kulingisa mutu ajihe mukwavo. Ngocho Yesu alumbunwine jino vyuma atela kulinga mutu mangana atwamenga navakwavo mukuunda. Ambile ngwenyi: “Kachi nge uli nakuneha wana wove kulijiko lyakulumbila, kaha hakuheta kuze hinawanuka ngwove uli namulonga nandumbwove, seza wana wove kulutwe lwalijiko lyakulumbila, kaha yako. Chatete kalivwasane nandumbwove, numba ukinduluke jino nakuhana wana wove.”—Mateu 5:23, 24.

Lushimbi lukwavo shina luze lwakanyisa ukoji. Yesu ambile ngwenyi: “Mwevwa lyehi muze vambile ngwavo: ‘Kanda mukalinga ukojiko.’ Oloze aminyi nangwamba kuli enu ngwami, weshowo mwatala lika pwevo nakumwivwila peha, nalingi lyehi nenyi ukoji mumuchima wenyi.” (Mateu 5:27, 28) Yesu kapwile nakuvuluka kutala mutu nakumushinganyeka kahako, oloze apwile nakuvuluka ponde yeji kwizanga kachi nge mutu “mwatala lika.” Kushishika lika mutu cheji kunehanga peha. Echi chinahase kulingisa mutu alinge ukoji nge lwola lunasoloka lwakulinga ngocho. Mutu nahase kulihenda ngachilihi kuchumechi? Mutu atela kukavangiza vyuma ahanjikile Yesu ngwenyi: “Kachi nge liso lyove lyachilyo lili nakukuhukanyisa, litombongonyemo nakulimbila. . . . Kachi nge livoko lyove lyachilyo lili nakukuhukanyisa, livatule nakulimbila.”—Mateu 5:29, 30.

Vatu vamwe veji kwitavilanga vavatete chilyo chimwe chamujimba chize chili namusongo mangana vayovole myono yavo. Ngachize, Yesu apwile nakwamba ngwenyi, chapwa chachilemu chikuma ‘kumbila’ kala chuma, mangana tuhone kushinganyeka vyauvumbi nakulinga ujila, numba chuma kana chapwa chachilemu ngana mwaliso chipwe livoko. Yesu ambile ngwenyi: “Chinawahe kuli ove kutwama chakuzeneka chilyo chimwe chakumujimba wove, kuhambakana mujimba wove wosena kuumbila muNgehena” (chijiva chakakahya vochelelenga swali kuweluka wajikembwe jaYelusalema), yize yemanyinako kunonga chahaya myaka yosena.

Yesu ahanjikile nawa omu twatela kuyoyela navaka-kuhuka. Ambile ngwenyi: “Kanda mukalipika namutu wakuhukako, oloze weshowo mwakuveta kulikili lyove lyachilyo, mwalumwine nalikwavo nawa.” (Mateu 5:39) Yesu kapwile nakwamba ngwenyi mutu katela kulikinga ivene chipwe kukinga tanga yenyi nge vanamulukukako, nduma. Apwile nakulumbununa ngwenyi chapwa kasautu, keshi nge kuvulumuna  mutu chipwe kumujihako. Apwile nakwamba ngwenyi nge mutu mwamisowangiza mangana muzunge chipwe mulipule jipami, hakumiveta mbanda chipwe kuzachisa mazu akasautu, kaha kamwatela kulinga sambanjingako.

Kuhuhumuna kana chalifwana nalushimbi lwaKalunga lwakuzanganga vakwetu. Ngocho Yesu alwezele vaka-kumwivwilila ngwenyi: “Zangenunga lika vaka-kole jenu nakulombelako vaze vali nakumiyanjisa. Mangana mupwenga muvana vaSenu uze ali mwilu, mwomwo eji kututwisanga likumbi lyenyi hali vaka-kuhuka nahali vatu vamwaza.”—Mateu 5:44, 45.

Yesu akukulwile chihande chenyi ngwenyi: “Shikaho pwenunga muvakukupuka, nganomu Senu wamwilu apwa wakukupuka.” (Mateu 5:48) Yesu kalumbunwine nge vatu vatela kupwa vakukupuka mwosena sulumunuko. Oloze tunahase kulondezeza Kalunga hakuzanganga navaka-kole jetu. Mujila yikwavo, ambile ngwenyi: “Pwenunga lika muvaka-kutetela nganomu apwa Senu muka-kutetela.”—Luka 6:36.

Omu Yesu atwalileho lika kunangula, ahuhumwine vaka-kumwivwilila ngwenyi: “Lilamenunga kuchina vilinga vyenu vyakwoloka namuvilingilanga kumeso avatu mangana ngwenu vamimonenga.” Yesu ahungile muchima wakulyonga nakwamba ngwenyi: “Omu namuhana mawana akutetela, kanda namwimba luneta kulutwe lwenuko, nganomu veji kulinganga vaka-kulyonga.” (Mateu 6:1, 2) Chapwa chamwaza kuhanyina mawana kupenge.

Yesu atwalileho ngwenyi: “Omu namulombanga, kanda namulinga nge omu veji kulinganga vaka-kulyongako, mwomwo vazanga kulomba oku vanemana mujisunangonga nakumakanyiko ajijila mangana ngwavo vavamone kuli vatu.” Ambile cheka ngwenyi: “Omu namulombanga, yenunga kukapete kenu kwauka wenu, kahomu namulinga himunasokoko lyehi, lombenu kuli Senu uze ali kupenge.” (Mateu 6:5, 6) Yesu kakanyishile kulombela kumeso avatu vavavuluko mwomwo nayikiye alombelelenga kumeso avatu vavavulu. Oloze apwile nakukanyisa kulomba mujila yize nayikomwesa vatu nakulingisa jino vamyalise.

Yesu ahuhumwine liyongomena lyavatu ngwenyi: “Omu namulomba, kanda namuhilukila hilukila nakuvuluka vyuma vyovimweko, nganomu veji kulinganga vatu vakumafuchi eka.” (Mateu 6:7) Yesu kalumbunwine nge chapwa chakuhenga kulombanga hachihande chochimweko. Oloze apwile nakukanyisa kulomba chakuzachisa mazu wowamwe ‘nakuwahilukila hilukila.’ Yesu jino avalwezele kulomba chakutalilaho chize chatwama navyuma 7. Vyuma vitatu vyakulivanga shina vyakupandama kuwata waKalunga navyuma ajina kukalinga. Vyuma kana shina kulomba lijina lyaKalunga lipwenga lyajila, nakulomba Wangana wenyi wizenga, namwaya muchima wenyi valingemo. Kufumaho numba jino tulombe vyuma vyakumujimba vyakufwana nge kutuhana kulya chahakumbi hakumbi, nakutukonekela jishili, nakutukinga kuchina kutweseka kuhambakana hakumina ngolo jetu, nakutukinga kuli uze wakuhuka.

 Uno vikumba vyetu twatela kuvimona ngachilihi? Yesu alwezele lize liyongomena ngwenyi: “Litwaminenu kulilunjikila luheto hano hamavu, haze hatwama shingwe natututu veji kulyanga luheto, haze hatwama nawa veji vaze veji kupupanga nakwiva.” Luheto lweji kukumanga, kaha nawa kulilunjikilalwo kacheshi kutulingisa vatwivwile uselewa kuli Kalungako. Ngocho, Yesu ahanjikile nawa ngwenyi: “Lilunjikilenu luheto mwilu.” Tunahase kulinga ngocho hakuhaka milimo yaKalunga kulutwe mukuyoya chetu. Kakweshi mutu mwahasa kututambula usepa wamwaza naKalunga chipwe kuyoya chahaya myaka yosenako. Ngachize mazu ahanjikile Yesu amuchano hakwamba ngwenyi: “Kuze kuli luheto lwove, kukiko vene nakupwanga namuchima wove.” —Mateu 6:19-21.

Yesu hakushindakanya chishina kanechi ahanyine chakutalilaho ngwenyi: “Linongo lyamujimba likiko liso. Shikaho kachi nge liso lyove linatale mumwe kaha, namujimba wove wosena naumunyika zwalala. Oloze nge liso lyove nalipwa lyalushiushiu, kaha namujimba wove wosena nawilava wi.” (Mateu 6:22, 23) Nge liso lyetu nalizata kanawa, kaha nalipwa nge linongo lize lili nakumunyika mumujimba. Shikaho meso etu atela kushishika hachuma chimwe kaha, nge chiku kaha tunahase kulinga vyuma vyakuhenga mukuyoya chetu. Nge natuhaka michima yetu kuluheto muchishishisa chakuzachila Kalunga, kaha ‘mijimba yetu nayilava wi,’ nakupwa mumilima.

Yesu ahanyine chakutalilaho ngwenyi: “Kakweshi ndungo mwahasa kuzachila vamyata vavaliko, mokomoko mwahunga umwe nakuzanga mukwavo, chipwe mwalipanjika naumwe nakulumbilisa mukwavo. Kamweshi kuhasa kuzachila Kalunga naLuheto hamweko.”—Mateu 6:24.

Vatu vamwe hakwivwa ngocho, atela valizakaminyine mujila vatela kumwenamo vyuma vyakumujimba. Ngocho Yesu avafwelelesele ngwenyi kavatela kulizakaminako, chikalu kaha nge navahaka milimo yaKalunga kulutwe. Avalwezele ngwenyi: “Achitalenu kanawa tujila vahelu. Vakiko kaveshi kukuvako, chipwe kwahako, chipwe kukungulwila  muviseteko, oloze Senu wamwilu eji kuvalisanga.”—Mateu 6:26.

Kaha Yesu avulukile nawa jitemo jamuvipapa nakwamba ngwenyi: “Numba vene Solomone muupahu wenyi wosena, kavwalile uvwalo umwe wakulita natemo yimweko.” Uno echi chalumbununa ika? Yesu ambile ngwenyi: “Kachi nge Kalunga eji kuvwikanga vyuma vyakusoka hamavu, evi navipwako lelo kaha hamene hinavavimbila mukakahya, kutala keshi kuhambakana chikuma kumivwika enuko nyi?” (Mateu 6:29, 30) Yesu avakolezezele ngwenyi: “Kanda namulizakaminako nakwamba ngwenu, ‘Natulya ika?’ chipwe ngwenu, ‘Natunwa ika?’ chipwe ngwenu, ‘Natuvwala ika? . . . Senu wamwilu atachikiza ngwenyi nayenu mwasakiwa vyuma vyosena evi. Ngocho tondenunga lika chatete Wangana wenyi nakwoloka chenyi, kaha evi vyuma vikwavo vyosena navakamihanavyo.”—Mateu 6:31-33.

Vaposetolo navatu veka vakuwahilila vatondele kutwama mujila yize nayivwisa Kalunga kuwaha. Oloze echi kachapwile chachashiko. Chakutalilaho, vaFwaliseu vavavulu vapwilenga namuchima waupi wakuhananga vakwavo milonga. Yesu ahuhumwine vaka-kumwivwilila ngwenyi: “Litwaminenu kusopesanga vakwenu, kuchina nayenu navakamisopesa, mwomwo kusopesa chize muli nakusopesanga vakwenu, chikiko navakamisopesa nayenu nawa.”—Mateu 7:1, 2.

Chapwile ponde kukavangiza vaFwaliseu vakukakama michima. Yesu ahanyine chakutalilaho ngwenyi: “Kutala kapuputa nahase kutwaminyina mukwavo kapuputa nyi? Kutala vosena vavali kaveshi kuholokela muwinako tahi?” Uno vaka-kwivwilila Yesu vatelelele kumona ngachilihi vakwavo? Kavatelelele kumona vakwavo mujila yayipiko mwomwo chapwa mulonga waunene. Yesu ambile ngwenyi: “Nawamba ngachilihize kuli ndumbwove ngwove, ‘Ove ndumbwami, ngwitavise ngukufumise chiswaswa chili muliso lyove,’ okunyi lisoko lili muliso lyove kawalimweneko? Ove muka-kulyonga! Vangila kulifumisa lisoko lili muliso lyove, numbanyi umone kanawa mwakufumishila chiswaswa chili muliso lyandumbwove.”—Luka 6:39-42.

Echi kacheshi nakulumbununa nge tumbaji twaYesu kavatela kusopesanga vakwavo numba chachindendeko. Yesu ambile ngwenyi: “Kanda namuhana chuma chajila kuli vatuwako, chipwe kumbila jipela jenu kuli vanguluko.” (Mateu 7:6) Muchano wamuMazu aKalunga wapwa waulemu nge jipela jachifwanyisa. Nge vatu vamwe navapwa navilinga vyaunyama nakuhona kumona muchano kupwa waulemu, kaha tumbaji vatela kuseza vatu kana nakutonda vaze navetavila muchano.

Hakuvuluka cheka chihande chakulomba, Yesu ambile ngwenyi: “Lombenunga lika, kaha navakamihana.” Kalunga eji kukumbululanga kulomba ngana muze ahanjikile Yesu hakwamba ngwenyi: “Mutu muka muli enu, nge mwanenyi mwamulomba mbolo, kaha ikiye himwamuhana lilolwa? . . . Shikaho kachi nge enu, numba tuhu mwapwa muvakuhuka, oloze munatachikiza mwakuhanyina mawana amwaza kuli vana venu, kahanyi Senu uze ali mwilu mwahambakanamo chikuma kuhana vyuma vyamwaza kuli vaze navamulombavyo.”—Mateu 7:7-11.

Yesu ahanjikile jino lushimbi lwalulemu ngwenyi: “Shikaho vyuma vyosena namusaka ngwenu vatu vamilingile, nayenu nawa valingilenuvyo.” Tuvosena twatela kukavangiza lushimbi kanelu omu natutwamanga navakwetu vatu. Kukavangiza lushimbi kana chinahase kupwa chachikalu mwomwo Yesu ambile  ngwenyi: “Ingililenu kuchikolo chachindende, mwomwo chikolo chachinene najila yakuhweka vili nakutwala kukunonga, kaha vaze vali nakuyamo vanapu vavavulu. Oloze chikolo chachindende najila yakupalakanya vili nakutwala kukuyoya, kaha ava vali nakuyiwana vanapu vavandende kaha.”—Mateu 7:12-14.

Kwatwama vaka-kole vaze vafwila kuhungumwisa tumbaji mangana vahone kutambuka mujila yakuya kukuyoya, ngocho Yesu ahuhumwine tumbaji twenyi ngwenyi: “Zangamenunga navapolofweto vamakuli vaze veji kwizanga kuli enu oku vanalifwiki malambu amikoko, oloze mukachi vapwa tungunge vazala.” (Mateu 7:15) Yesu ambile ngwenyi mitondo yamwenemwene nayeyi yayipi veji kuyijivilanga kumihako yayo. Omu mukiko chapwa nakuli vatu. Tweji kutachikizanga vapolofweto vamakuli hakunangula chavo navilinga vyavo. Yesu alumbunwine ngwenyi mutu keshi kupwa kambaji kenyi hakanwa kahako, oloze nahavyuma eji kulinganga nawa. Vatu vamwe veji kuvulukanga Yesu kupwa Mwata wavo, nyi ngachilihi nge kaveshi nakulinga mwaya muchima waIseko? Yesu ambile ngwenyi: “Nangukamba kuli vakiko ngwami: ‘Ami kangwamitachikizako! Fumenu kuli ami, enu vaka-kulinga upapwoki!’”—Mateu 7:23.

Yesu jino akukulwile kunangula chenyi hakwamba ngwenyi: “Weshowo mwevwa awa mazu ami nakuwakavangizanga, mwapwa nge lunga wakuzangama uze atungilile zuvo yenyi halilolwa. Kaha vula yanokele, livaji lyejile, peho yahuhwile nakuliveta hazuvo yize, oloze kayashiukileko mwomwo vayitungilile halilolwa.” (Mateu 7:24, 25) Mwomwo ika yize zuvo yahonene kushiuka? Mwomwo uze lunga “afulile chihela chakwalilaho zuvo nakuchikunamisa, kaha achalile halilolwa.” (Luka 6:48) Ngocho kwasakiwa kulinga vyuma vyavivulu keshi kwivwilila kumazu aYesu kahako. Twatela kuzata nangolo mangana ‘tukavangizenga mazu’ enyi.

Nyi ngachilihi mutu uze ‘mwevwa awa mazu nakuhona kuwakavangiza’? Napu “nge lunga wakuhulama uze atungilile zuvo yenyi hausekeseke.” (Mateu 7:26) Zuvo kana yinahase kushiuka kachi nge nakwiza vula, nalivaji, napeho.

Vatu vosena valikomokelele chikuma hakunangula chaYesu, mwomwo avanangwile nge mutu ukwechi wata, keshi nge muze vavanangwilenga kuli vatwamina javo vamukwitavako. Kaha vatu vavavulu vaze vevwililile kukunangula chenyi vapwile jino tumbaji twenyi.