Yesu amwene Yowano Muka-kumbapachisa kupwa wamulemu, oloze vatu vavavulu Yowano vamumwene ngachilihi? Yesu ambile ngwenyi: “Chisemunwino chino . . . chinafwane nge vana vavandende vanatwame kuvilanjilo, vaze vali nakulitambakana navakwavo ngwavo: ‘Twamimbilanga jipanda, oloze enu kamwakinangako. Twalilanga jimbimbi, oloze enu kamwalyonyingangako.’”—Mateu 11:16, 17.

Yesu atalishile mulihi? Alumbunwine ngwenyi: “Yowano ejile, kalilengako, kanwinengako, oloze vatu ngwavo, ‘Ali nandemone.’ Kaha Mwanamutu neza, ali nakulya nakunwa, vatu nawa ngwavo, ‘Talenu! Mutu kana afwa hakulya nahakunwa vinyo, apwa sepa lyavaka-kutambula mitelo navaka-shili.’” (Mateu 11:18, 19) Yowano apwilenga nge kaNajili, alihendelenga kuvinyo, oloze echi chisemunwino chamwambile ngwavo ali nandemone. (Kulava 6:2, 3; Luka 1:15) Yesu ayoyelenga ngana mwavatu vosena. Alilenga nakunwa mujila yamwaza, oloze vatu vamuvangijikilile ngwavo afwa hakulya nakunwa. Chasoloka kupwa chachikalu kusuulwisa vatu.

Yesu afwanyishile chisemunwino kana kuvana “vavandende vanatwame kuvilanjilo,” vaze vakanyine kukina omu vakwavo vapwile nakuvembila chipwe vaze kavalishonene omu valilile vakwavoko. Yesu ambile ngwenyi: “Numba ngocho, mangana eji kulijimbulanga kupwa akwoloka kumilimo yawo.” (Mateu 11:16, 19) Chikupu vene, “milimo” vazachile vaYowano naYesu yasolwele nge vyuma vahanjikilenga vatu hali vakiko vyapwile vyamakuli.

Omu Yesu akumishile kuvuluka vyachisemunwino chakulikanga, atwalileho lika kuhanjikila vaka-jinganda jitatu jaKolajine, naMbetesaita, naKapelenau, kuze alingililile vyakukomwesa vyavivulu chikuma. Yesu ambile ngwenyi kachi nge alingililile vyuma vyakukomwesa kujinganda jaTule naShitone jakuFwenyisha, kachi jinganda kana japihililile nakwalumuka. Avulukile nawa nganda yaKapelenau yize atwaminenga shimbu jimwe. Munganda kana nawa vatu kavamwivwililileko. Yesu ahanjikile kutalisa kunganda kana ngwenyi: “Kuzangamisa navakakuzangamisa ove haLikumbi lyaKusopesa nachikatohwa chikuma kuhambakana chalifuchi lyaSotome.”—Mateu 11:24.

Yesu jino alishile Ise wamwilu, uze naswekela “vaka-mangana navaze vananguka” muchano wakushipilitu, nakuusolola kuli vaka-kulinyisa vaze afwanyisa kuvana vavandende. (Mateu 11:25) Ngocho, Yesu alwezele jino ava vatu ngwenyi: “Twayenu kuli ami enu muvosena muli nakufulyangila nakulemuwa naviteli, kaha ami nangumihizumuna. Mbatenu toka yami nakulinangula kuli ami, mwomwo ami ngumuvwovu, nguwakulikehesa mumuchima, kaha namupwa vakuhizumuka. Mwomwo toka yami yayashi kumbata, kaha chiteli chami chachilelu.”—Mateu 11:28-30.

Uno Yesu eji kuhizumunanga ngachilihi vatu? Vatwamina vamukwitava vakaluwishilenga jishimbi hakuhakilako visemwa vyavo. Vakaluwishilenga jishimbi jajivulu jakufwana nge jize jaSambata, nakulingisa vatu vapwenga vandungo kujishimbi kana. Oloze Yesu avahizumwinenga hakuvanangula muchano waKalunga nakuvalingisa valihehwe kuvisemwa vize vapwile nakukavangiza. Avasolwelele nawa jila yakuvasokola kuviyulo vyavatu vize vyavashinyinyikilenga, nakukafwa vaze vanahombo nashili. Akafwile vatu kana vejive nge vanahase kuvakonekela jishili javo, nakupwa nausoko wamwaza naKalunga.

Vosena vaze navetavila toka yaYesu yayashi kumbata, vanahase kulihana kuli Kalunga namuchima wosena nakumuzachila Setu wamwilu wakeke, muka-kutetela. Kwononoka jishimbi jaKalunga kachakaluhwako mwomwo jishimbi jenyi kajapwa nge hichiteliko.—WaYowano 1, 5:3.