Omu alingile Yesu hanapopolola lyehi vaFwaliseu vaze vapwile nakukavangiza visemwa vyavo, ayile natumbaji twenyi kungalila yaTule naShitone muFwenyisha yize yapwililile kumututuko.

Yesu awanyine zuvo yakutwamamo, oloze kasakile vatu vatachikize ngwavo apwile muze muzuvoko. Chipwe ngocho, kahashile kuliswekako. Pwevo wakaHelase uze asemukilile mungalila kaneyi awanyine Yesu, kaha amulembelelele ngwenyi: “Nguteteleko ove Mwata, ove MwanaNdavichi. Mwanami wapwevo vanamukwate mwamupi kuvandemone.”—Mateu 15:22; Mako 7:26.

Kufumaho, tumbaji twaYesu vamulwezele ngwavo: “Mulweze ayenga, mwomwo chatambakana lika munyima yetu.” Yesu avakumbulwile nakuvalweza vyuma aliwililile uze pwevo, ambile ngwenyi: “Ami kavangutumine kuya kuli vatu vekako, oloze shina kuli mikoko vakujimbala vakuzuvo yaIsalele kaha.” Oloze uze pwevo kalitwaminyinyine kulembelela Yesuko. Apandamine kuli Yesu nakufukama kuli ikiye nakumulembelela ngwenyi: “Ove Mwata, Ngukafweko!”—Mateu 15:23-25.

Yesu hakusaka pamo kweseka lufwelelo lwauze pwevo, ahanjikile mazu aze asolwele muchima waupi vapwilenga nawo vaYuleya kutalisa kuvatu vakumafuchi eka. Ambile ngwenyi: “Kachapwa chakwoloka kumbata kulya chavana nakuchimbila kuli vana vavatuwako.” (Mateu 15:26) Hakuvuluka ngwenyi “vana vavatuwa,” Yesu apwile nakusolola muchima apwile nawo wakuzakama vatu vaze kavapwile vaYuleyako. Asolwele muchima kana mujila amukumbulwililemo nalizu lyalivwovu.

Muchishishisa chakupihilila, uze pwevo azachishile mazu ahanjikile Yesu amuchima waupi vapwilenga nawo vaYuleya nakwamba ngwenyi: “Mukiko vene ove Mwata, oloze navana vavatuwa vene veji kulyanga ungululu weji kuholokanga kumesa yavakaka javo.” Yesu amwene muchima wamwaza apwile nawo ou pwevo, kaha ambile ngwenyi: “Ove pwevo, lufwelelo lwove lwalunene. Chilingiwe vene ngocho kuli ove nganomu unasake.” (Mateu 15:27, 28) Ngocho uze mwana ahindukile, numba tuhu kapwile kuze apwile Yesuko. Omu uze pwevo akindulukile kuzuvo yenyi, akawanyine mwanenyi ali hakahela nayoyo, “uze ndemone namulovoka lyehi.”—Mako 7:30.

Omu Yesu afumine kuFwenyisha, ayile natumbaji twenyi kuchihela chakuKalwiji Yotau. Chasoloka nge vazaukile Yotau kumututuko waKalungalwiji waNgalileya nakuya kungalila yaNdekapole. Vakandukile kupili, kaha namayongomena avakavile. Vatu vanehele vitonji, natupuputa, natumama kuli Yesu. Vavatumbikile kumahinji aYesu, kaha avokile. Omu avokile, vatu vatohwesele Kalunga kaIsalele.

Yesu ahakile muchima kuli lunga umwe uze apwile kamama. Achishinganyekenu omu lunga kana apwile nakwivwa muliyongomena lyavatu. Pamo Yesu amwene woma apwile nawo ou lunga, kaha amufumishile haze haliyongomena lyavo. Omu vapwile kwauka wavo, Yesu asolwele vyuma asakile kulinga. Ahakile minwe yenyi mumatwitwi ayauze lunga, kufumaho afwijile maleji nakumukwata halilimi. Yesu atalile mwilu, kaha ahanjikile mazu aze alumbununa ngwavo, “Jikuka.” Ngocho matwitwi ayauze lunga ajikukile, kaha aputukile nakuhanjika. Yesu kapwile nakusaka chihande kana chitandakaneko, mwomwo asakile vatu vamufwelele havyuma navalimwena vavene nakulivwila.—Mako 7:32-36.

Ngolo jaYesu jakuka vatu jakwachile kumichima yavatu, kaha “valikomokelele chikuma.” Vambile ngwavo: “Vyuma vyosena eji kulinganga vyamwaza. Eji kulingisanga natujika matwitwi vevwenga, natumama nawa vahanjike.”—Mako 7:37.