Mujimbu wakukinduluka chaYesu kufuma kuNdekapole wahetele kuli vaYuleya vaze vatwaminenga kumulauko waKalungalwiji waNgalileya. Pamo vatu vavavulu vevwile ngwavo Yesu aunjishile peho yanyamanganda, nakutulisa makimba, nakuka malunga vaze vapwile navandemone. Ngocho “liyongomena lyalinene” lyalikungulwilile kukalungalwiji, pamo kungalila yaKapelenau mangana vatambwokese Yesu. (Mako 5:21) Vatu vapwile nakulyangalyanga michima omu Yesu apwile kwakamwihi nakuheta kutunda.

Yailu uze apwile mukulwane wasunangonga yize pamo yapwililile muKapelenau, naikiye apwile halizavu lyavatu vaze vafwililile chikuma kumona Yesu. Afukamine kumahinji aYesu nakumulembelela ngwenyi: “Mwanami wapwevo wamundende ali nakuviza chikuma. Ngunakulembelela wizenga umusalike mavoko ove mangana ahinduke, ayoye.” (Mako 5:23) Uno Yesu akumbulwile ngachilihi Yailu uze amulembelelele hali mwanenyi wapwevo wamyaka yakusemuka 12 uze nawa azangile chikuma?—Luka 8:42.

Omu Yesu apwile nakuya kuzuvo yaYailu, kuheta hakachi amwene vyuma vize vyamwivwishile keke. Vatu vavavulu vaze vamukavangijilenga vawahililile nakushinganyeka ngwavo mwavalingila vyuma vyakukomwesa. Oloze pwevo umwe havatu kana apwile kaha nakushinganyeka haukalu wakulikangula chenyi.

Ou pwevo wakaYuleya ayanjile chikuma hamyaka 12 namusongo wakuhita manyinga. Ayilenga kuli vandotolo vavavulu mangana vamukafwe nakuzachisa jimbongo jenyi josena kulanda vitumbo vize vamulwezelenga. Oloze vyuma vyosenevi kavyamukafwileko. Musongo wenyi “wapwile nakuya nakumutekeleka lika.”—Mako 5:26.

Munahase kumona ngwenu ukalu wenyi kawapwile kaha nakumuzeyesako, oloze wamwivwishilenga nasonyi. Kaha mutu nawa keshi kuhasa kuhanjika ukalu wakufwana ngana kuvatu vavavuluko. MuJishimbi jaMose nawa, pwevo uze ahichilenga manyinga vamumwenenga kupwa wamajilo. Weshowo amukwachilenga chipwe kukwata uvwalo wenyi atelelele kusana, kaha apihilenga palanga nakuchingoloshi.—VyavaLevi 15:25-27.

Ou pwevo “evwile vyuma vahanjikilenga hali Yesu,” ngocho ayile nakumutondatonda. Hakuwana nge katomeneko, ngocho alivembele nakwingila hakachi kavatu nakulyamba mumuchima wenyi ngwenyi: “Kachi nge nangukwata kaha kuuvwalo wenyi wahelu, nanguhinduka.” Omu akwachile kujizombo jauvwalo waYesu, hahaze vene evwile mumujimba wenyi ngwenyi manyinga analitwamina kuhita. Ngocho ahindukile “kumusongo waupi.”—Mako 5:27-29.

Yesu ahulishile ngwenyi: “Iya nangukwate?” Jino munashinganyeka ngwenu uze pwevo evwile ngachilihi hakwivwa chihula chaYesu? Petulu akumbulwile Yesu namazu akumuhuhumuna ngwenyi: “Mayongomena ali nakulihomena kuli ove nakukushindakanya.” Mwomwo ika Yesu ahulishilile ngwenyi, “Iya nangukwate?” Yesu alumbunwine ngwenyi: “Kuli mutu umwe nangukwate, mwomwo ngunevu ngolo jinangufumu.” (Luka 8:45, 46) Chapundu vene, kuhinduka chayou pwevo chakokele ngolo muli Yesu.

Ou pwevo hakumona jino ngwenyi vanamutachikiza, ejile nakufukama kumahinji aYesu nawoma oku anakuchikima. Alumbunwine jino musongo wenyi kumeso avatu vosena nomu ahindukile kumusongo kana. Jino Yesu amuvendejekele ngwenyi: “Ove mwanami, lufwelelo lwove lunakuhindula. Yakonga mukuunda, likangule kumusongo wove waupi.”—Mako 5:34.

Chapundu vene, mutu uze Kalunga atongola mangana akayule hano hamavu atwama namuchima wamwaza, wakeke, kaha nawa azakama vatu, nakupwa nangolo jakuvakafwa.