Yesu alingile vyuma vyavivulu hakuzata mulimo wenyi muNgalileya. Chipwe ngocho, Yesu hakwamba ngwenyi, “Ngwatela kwambulula mujimbu wamwaza waWangana waKalunga nakujinganda jeka nawa,” alumbunwine nge atelelele kuya nakuvihela vyeka, keshi muNgalileya kahako. Ngocho, “ayile nakwambulula mujisunangonga jamuYuleya.” (Luka 4:43, 44) Echi chapwile chakutamo mwomwo kwapwile jino kuchivatuko chavula, kaha lwola lwachiwanyino muYelusalema lwapwile hakamwihi.

Milimo azachile Yesu muNgalileya yize vasoneka muMikanda yaMujimbu Wamwaza kavahanjikamo chikuma vyamulimo azachile muYuleyako. Numba tuhu vatu vamuYuleya kavakwile kanawa kumulimo wenyiko, oloze kalitwaminyine kwambulula nakulinga vyuma vyamwazako.

Yesu apwile nakuya kuPaseka yamu 31 C.E. kuYelusalema, nganda yayinene yamuYuleya. KuChikolo chaMikoko chamunganda kana kwapwile chijiva vavulukilenga ngwavo Mbeteseta. Kuchijiva kana kwejilenga vatu vavavulu vaze vavijilenga, natupuputa, navitonji. Mwomwo ika? Mwomwo vafwelelele ngwavo vatu vanahase kulikangula kachi nge navengila muchijiva kana omu nawavweluka meya.

Kaha halikumbi lyaSambata, Yesu amwene lunga umwe kuze kuchijiva uze avijile hamyaka 38. Yesu amwihwile ngwenyi: “Uli nakusaka ulikangule tahi?” Ou lunga akumbulwile ngwenyi: “Ove Mwata, ami kangweshi namutu wakungwingisa muchijiva nge meya anavundukako. Omu nangulinga ngwami nguyengamo, kaha mukwetu weka himwalivanga kushikumukamo.”—Yowano 5:6, 7.

Yesu ahanjikile mazu aze alingishile uze lunga navatu vapwileko valikomokele. Ambile ngwenyi: “Katuka, mbata kahela kove, utambuke.” (Yowano 5:8) Omu mukiko vene alingile uze lunga. Vamukile hahaze vene, ngocho ambachile kahela kenyi nakuputuka kutambuka.

Muchishishisa chakuwahilila havyuma vyasolokele, vaYuleya vambile kuli uze lunga ngwavo: “Lino hilikumbi lyaSambata, kaha kavachitavisa kumbata kahela koveko.” Uze lunga avakumbulwile ngwenyi: “Ou nanguhindula ikiye angulwezanga ngwenyi, ‘Mbata kahela kove, utambuke.’” (Yowano 5:10, 11) Ava vaYuleya vevwilile kupihya mutu uze apwile nakuka vatu haSambata.

Kaha vahulishile uze lunga ngwavo: “Mutu muka vene owo akulwezanga ngwenyi, ‘Mbata kahela, utambuke’?” Mwomwo ika vahulishilile uze lunga echi chihula? Mwomwo Yesu “engilile halizavu,” kaha nawa uze lunga vokile kejivile lijina lyaYesuko. (Yowano 5:12, 13) Oloze uze lunga alihumanganyine cheka naYesu. Alihumanganyine nenyi mutembele, ngocho ejivile jino uze amukile kuze kuchijiva.

Shikaho uze lunga awanyine vaYuleya vaze vamuhulishile vyauze amukile. Ngocho avalwezele ngwenyi Yesu ikiye amukile. Hakwivwa ngocho, vaYuleya vayile kuli Yesu. Uno vayile mangana vakahulise Yesu avalweze ngolo azachishile hakulinga vyuma vyakukomwesa tahi? Nduma. Vasakile kaha kumuwanyina katenga hakulinga vyuma vyamwaza haSambata. Kaha vaputukile kumuyanjisa.