Yesu alishile makombakaji avatu mujila yakukomwesa kumututuko waKalungalwiji waNgalileya, kaha achinyine omu vatu vasakile kumukwata vamulingise kupwa mwangana. Haufuku vene uze, Yesu atambukile hameya nakuyovola Petulu uze naikiye atambukile hameya, oloze aputukile kulondomana mwomwo yakuhona kupwa nalufwelelo. Yesu aunjishile peho nakusaka pamo kuyovola tumbaji twenyi vaze vasakile kuvomba.

Yesu akindulukile jino kumulauko wakalungalwiji kungalila yaKapelenau. Vatu vaze alishile mujila yakukomwesa vamuwanyine nakumuhulisa ngwavo: “Lwola muka wezanga kuno?” Yesu avahanjikilile nakuvahuhumuna nge vapwile nakumutonda mangana avalise cheka. Ngocho avalwezele ngwenyi: “Kanda kuzachila kulya chize cheji kupolangako, oloze zachilenu kulya chize cheji kwililanga nakutwala kukuyoya chahaya myaka yosena.” Kaha vamuhulishile ngwavo: “Vyuma muka twatela kulinga mangana tuzatenga milimo yaKalunga?”—Yowano 6:25-28.

Pamo vapwile nakushinganyeka vyuma vavuluka muJishimbi, oloze Yesu apwile nakwinyikila kuvyuma vyavilemu chikuma hakwamba ngwenyi: “Mulimo waKalunga ukiko vene ou, kufwelela ou atuma.” Numba tuhu Yesu alingile vyuma vyavivulu vyakukomwesa, oloze vatu vavavulu kavafwelelele muli ikiyeko. Vamukanjikijile avahane chinjikizo numba vamwitavile. Vamuhulishile ngwavo: “Chuma muka naulinga? Vakakuluka jetu valilenga mana mupambo nge muze vasoneka ngwavo: ‘Avahanyine kulya chakufuma mwilu valyenga.’”—Yowano 6:29-31; Samu 78:24.

Kutalikisa kuchinjikizo valombele, Yesu avalwezele Kaselwoke kavyuma vyakukomwesa ngwenyi: “Nangwamba kuli enu ngwami, Mose kamihanyine kulya chakufuma mwiluko, oloze Tata eji kumihananga kulya chamuchano chakufuma mwilu. Mwomwo kulya chakufuma kuli Kalunga ikiye vene ou afuma mwilu, ou eji kuhananga kuyoya kukaye.” Hakuhona kutachikiza mwalumbunukilile vyuma ahanjikile, vaputukile kumulembelela ngwavo: “Ove Mwata, tuhanenga kulya kanocho shimbu yosena.” (Yowano 6:32-34) Uno “kulya” muka apwile nakulumbununa Yesu?

Ambile ngwenyi: “Ami yami kulya chakuyoya. Weshowo mweza kuli ami keshi kukevwa cheka zalako, kaha weshowo mwangufwelela keshi kukevwa cheka lipwilako. Oloze nge muze ngwamilwezanga ngwami, enu munangumono lyehi, oloze kamwetavileko. . . . Nguneza kufuma mwilu mangana ngulingenga mwaya muchima wayauze angutumine, keshi nge mwaya muchima wamiko. Omu mukiko mwaya muchima wayauze angutumine, ngwenyi kanda nangujimbalisa mutu numba umweko havatu vosena vaze nanguhane, oloze ngwenyi ngukavasangule halikumbi lyakukuminyina. Mwomwo omu mukiko vene mwaya muchima waTata, ngwenyi weshowo mwamona Mwana nakumufwelela, atela kupwa nakuyoya chahaya myaka yosena.”—Yowano 6:35-40.

Echi chevwishile vatu kumuchima kupihya, kaha vaYuleya vaputukile kutatwoka hali ikiye. Uno mwahanjika ngachilihi ngwenyi ikiye “kulya kanechi chakufuma mwilu”? (Yowano 6:41) Kuli vakiko, Yesu apwile kaha mwanamutu wakufuma munganda yaNazaleta muNgalileya. Vatu valihulishile ngwavo: “Ou kumana keshi ikiye Yesu mwanaYosefwe, ukwechi ise nanaye twatachikizako nyi?”—Yowano 6:42.

Yesu avambile ngwenyi: “Echenu kutatwoka. Kakweshi mutu mwahasa kwiza kuli amiko kuvanga vanamukoko kuli Tata uze angutumine. Kahami nangukamusangula halikumbi lyakukuminyina. MuMazu avapolofweto vasonekamo ngwavo: ‘Vosena navakavanangula kuli Yehova.’ Weshowo nevwilila Tata nakulinangula kuli ikiye, mweza kuli ami. Kakweshi mutu amona lyehi Tatako, shina uze kaha afuma kuli Kalunga. Ou ikiye amona Tata. Chamuchano vene nangwamba kuli enu ngwami, weshowo etava ali nakuyoya chahaya myaka yosena.”—Yowano 6:43-47; Isaya 54:13.

Hakavanga omu Yesu ahanjikile naNyikotemu, avulukile vyakuyoya chahaya myaka yosena chize  chatambukila hamwe nakufwelela muli Mwanamutu. Ambile ngwenyi: “Weshowo mwamufwelela [MwanaKalunga umwe kaha wakulipwila] vakahone kumunongesa, oloze akapwe nakuyoya chahaya myaka yosena.” (Yowano 3:15, 16) Yesu jino ahanjikile kulikungumbuwa lyavatu nakuvalweza ngwenyi akwechi mulimo wakuvakafwa vakayoye haya myaka yosena. Kuyoya kana kaveshi kuchiwana hakulya mana chipwe kala kulya vanahase kuwana muNgalileyako. Uno kuyoya chahaya myaka yosena vanahase kuchiwana ngachilihi? Yesu ahanjikile cheka ngwenyi: “Ami yami kulya chakuyoya.”—Yowano 6:48.

Echi chihande chakuvuluka kulya chakufuma mwilu chatwalileho, kaha Yesu achishindakanyine chikuma omu apwile nakunangula musunangonga yamuKapelenau.