Hamakumbi amavulu, Yesu ambulwililenga chikuma muNgalileya, muze awanyinenga vatu vavavulu vaze vevwilililenga kumujimbu wenyi kuhambakana muYuleya. Kahomu apwile muYelusalema, okile lunga umwe halikumbi lyaPaseka, oloze “vaYuleya vasakilenga kumujiha.”—Yowano 5:18; 7:1.

Mwapwile mungonde yanonga mu 32 C.E., kaha Chiwanyino chaJitavanaku (chipwe chaVisakila) chapwile kwakamwihi. Chiwanyino kana vachilingilenga hamakumbi 7, kaha halikumbi lyakusokesa 8 kwapwile kukunguluka chajila. Echi chiwanyino vachilingilenga kusongo yangonde yakulima, kaha nawa lwapwile hilwola lwakuwahilila chikuma nakuhana wana wakusakwilila Kalunga.

Vandumbu jaYesu vaYakova, naShimona, naYosefwe, naYuta vamulwezele ngwavo: “Fuma kuno uyenga kuYuleya.” Yelusalema yapwile nganda yize valikungulwililenga vaka-kwitava mulifuchi kana. Munganda kana mwapwilenga vatu vavavulu halwola kwapwilenga viwanyino vize valingilenga hamwaka katatu. Ngocho vandumbu jaYesu vambile ngwavo: “Kakweshi mutu mwalinga vyuma mukusweka okunyi ikiye nasake ngwenyi vamutachikize kuvatuko. Kachi nge uli nakulinga vyumevi, lisolole kukaye.”—Yowano 7:3, 4.

Tuyokutuyoku nawa, ava vandumbwenyi vawana “kavamufwelelele” ngwavo ikiye Meshiyako. Oloze vasakile ngwavo vatu vaze valikungulwilile kuchiwanyino kana vamone milimo yenyi yakukomwesa. Yesu atachikijile ponde yapwileho, kaha avalwezele ngwenyi: “Kaye kakeshi kuhasa kumihunga enuko, oloze kanguhunga ami, mwomwo ami ngweji kuhananga unjiho wakuvuluka kaye ngwami, vilinga vyako vyapwa vyakuhuka. Enu yenunga tuhu kuchiwanyino. Ami kangweshi kuya oholili kuchiwanyino kanechiko, mwomwo lwola lwami kanda luchihete.”—Yowano 7:5-8.

Kahomu vandumbu jaYesu vakindulukile hamwe nalizavu, Yesu natumbaji twenyi vaseunukile nakuliyila kwavo. Vazachishile jila yakuhita muSamaliya muchishishisa chakuhita jila yize vatachikijile vosena yakuhita kwakamwihi naKalwiji Yotau. Yesu natumbaji twenyi vapwile nakusakiwa kwakusavala muSamaliya, ngocho atumine vatu mangana vayenga nakuwahisa kwakutulila. Vatu kuchihela chimwe vakanyine kutambula Yesu natumbaji twenyi namavoko avali mwomwo ngwavo Yesu apwile nakuya kuYelusalema kuchiwanyino chavaYuleya. Yakova naYowano vevwile kupihya, kaha vahulishile Yesu ngwavo: “Ove Mwata, nausaka tusanyike kakahya kufuma mwilu mangana kavanongese tahi?” (Luka 9:54) Yesu avakanjile kulomba chuma kana, kaha vatwalilileho naungeji wavo.

Omu vapwile nakuya mujila, muka-kusoneka umwe ambile kuli Yesu ngwenyi: “Ove Muka-kunangula, nangukukavangiza kweshokwo nauya.” Yesu amukumbulwile ngwenyi: “Vamyumbwe vatwama namenavo, tujila vahelu vatwama namaswa avo, oloze Mwanamutu keshi nahamwe hakusachila mutwe wenyiko.”  (Mateu 8:19, 20) Apwile nakulumbununa nge uze muka-kusoneka mwakamona ukalu kachi nge mwapwa muka-kukavangiza Yesu. Kaha chasolokele nge uze muka-kusoneka alivwimbile nakukana chiyoyelo chaYesu. Ngocho etu tuvosena twatela kulihulisa mutu himutu ngwetu, ‘Kutala ngunalisuula kukavangiza Yesu nyi?’

Yesu alwezele lunga weka ngwenyi: “Pwako umuka-kungukavangiza.” Uze lunga akumbulwile ngwenyi: “Ngwitavise chatete nguyenga nakufunda tata.” Hakuwana nge Yesu atachikijile chiyoyelo chauze lunga, amwambile ngwenyi: “Echa vafu vafunde vafu javo, oloze ove yako ukavilike Wangana waKalunga kwosena.” (Luka 9:59, 60) Chasoloka nge ise yauze lunga achipwile wamutonyi. Nge afwile, kachi uze lunga kapwile mujila nakuhanjika naYesuko. Uze lunga kapwile namuchima wakuhaka Wangana waKalunga kulutwe mukuyoya chenyiko.

Omu vapwile nakuya nakuheta kwakamwihi naYelusalema, lunga umwe ambile kuli Yesu ngwenyi: “Ove Mwata, nangukukavangiza, oloze ngwitavise chatete nguyenga nakusalisa vaze vakuzuvo yami.” Kaha Yesu amukumbulwile ngwenyi: “Kakweshi mutu nakwate kulitemo lyakukoka navangombe, kaha himwatala kuvyuma naseze kunyima, natemo kupwa muWangana waKalungako.”—Luka 9:61, 62.

Vosena vaze navasaka kupwa chikupu tumbaji twaYesu vatela kuhaka michima yavo kumulimo waWangana. Nge mutu uze ali nakulima navangombe keshi kutala kulutweko, kaha keshi kuhasa kulima kanawako. Kachi nge mwecha kulitemo mangana atale vyuma vili munyima, kaha mulimo wakulima unahase kuzezama. Chochimwe nawa, mutu uze mwatala kunyima kukatwamino kamyaka yino nahase kuhukana nakufuma mujila yakuya kukuyoya chahaya myaka yosena.