Makombakaji avatu alikungulwilile kuli Yesu mungalila yaNdekapole, kumututuko waKalungalwiji waNgalileya. Vejile mangana vevwilile kuli Yesu nakuvoka, kaha vambachile namitonga yavo mangana vambachilemo vyakulya.

Kutwala muze, Yesu alwezele tumbaji twenyi ngwenyi: “Liyongomena ngunalivwila keke, mwomwo vanatwame nayami makumbi atatu, kaha kavalile vyakulyako. Kachi nge nanguvasuula vayenga nazala kumembo avo, navafwa chizava mujila, mwomwo vamwe vanafumu kwakusuku chikuma.” Oloze tumbaji twenyi vamuhulishile ngwavo: “Kulihize mutu mwahasa kuwana jimbolo jakulisa vatu vapwaha kuchihela kuno kwakuhona vatu?”—Mako 8:2-4.

Yesu avakumbulwile ngwenyi: “Muli najimbolo jingahi?” Tumbaji vambile ngwavo: “Tuli najimbolo 7, natuvaishi tumwe twatundende.” (Mateu 15:34) Kaha Yesu alwezele vatu vatwame hamavu. Ambachile jize jimbolo navaishi nakulomba kuli Kalunga, kaha avipazwile nakuvihana kuli tumbaji twenyi mangana vapangile vatu. Kaha vosena valile nakwikuta. Numba tuhu malunga 4,000 vosena valile nakwikuta, kuhakilako namapwevo navanyike, oloze vyakulya vize vyasalileho vavikungulwile nakuzalisa mitonga 7.

Yesu alwezele mayongomena avatu valiyile kwavo, kaha ikiye natumbaji twenyi vanyinyine muwato nakuya kuMangatane, kumulauko waKalungalwiji waNgalileya. VaFwaliseu navaSatuse vamwe vasakile kweseka Yesu, ngocho vamuhulishile asolole chinjikizo chakufuma mwilu.

Yesu hakutachikiza vyapwile mumichima yavo, ambile ngwenyi: “Omu kweji kutokanga, enu mweji kwambanga ngwenu, ‘Kwilu kunachi, mwomwo lilu linachilana,’ kaha nachimene mweji kwambanga ngwenu, ‘Lelo nakupwa chishika navula, mwomwo kwilu kuli nakufwinda mavwi numba tuhu lilu linachilana.’ Enu mwatachikiza kulumbununa omu lili nakusoloka lilu, oloze munakuhona kulumbununa chinjikizo chakwijivilaho lwola luno.” (Mateu 16:2, 3) Kaha Yesu alwezele vaFwaliseu navaSatuse ngwenyi kakweshi chinjikizo cheka mwavahanako shina chinjikizo chaYona kaha.

Yesu natumbaji twenyi vengilile muwato nakuya kuMbetesaita, kunote yakalungalwiji. Omu vapwile nakuya, tumbaji vanukile ngwavo vambachile kaha mbolo yimwe, muchishishisa chakumbata jimbolo jajivulu. Yesu anukile vyuma amwene omu apwile navaFwaliseu navaSatuse vaze vakundwijilenga Helote, kaha avahuhumwine ngwenyi: “Tonenunga, zangamenu nachimbalwila chavaFwaliseu nachimbalwila chaHelote.” Tumbaji twenyi vashinganyekele ngwavo Yesu navuluka chimbalwila kutalisa kumbolo yize vavulyamine. Hakutachikiza chuma kana, Yesu ambile ngwenyi: “Ikaze muli nakulipulila jipami ngwenu kamweshi najimboloko?”—Mako 8:15-17.

Mwahichile kaha tando yayindende kufuma haze Yesu alishile makombakaji avatu. Ngocho tumbaji vatelele kutachikiza ngwavo kapwile nakulizakamina vyakuhona kumbata mbolo iveneko. Avahulishile ngwenyi: “Uno enu kamweshi nakwanuka omu ngwapuzwile jize jimbolo jitanu nakujihana malunga  5,000 nyi? Mwakungulwile mitonga yingahi yakuzala yavihanda vyajimbolo vize vyasalileho?” Vamukumbulwile ngwavo: “Mitonga 12.” Yesu atwalileho lika ngwenyi: “Kahomu ngwapuzwilanga vaze malunga 4,000 jize jimbolo 7, mwakungululanga mitonga yayinene yakuzala yingahi yavihanda vyajimbolo vize vyasalangaho?” Vamukumbulwile ngwavo: “Mitonga 7.”—Mako 8:18-20.

Yesu avahulishile ngwenyi: “Uno munahonena ika kwijiva ngwenu ami kangwapwanga nakumilweza vyamboloko?” Kaha ambile ngwenyi: “Zangamenu nachimbalwila chavaFwaliseu navaSatuse.”—Mateu 16:11.

Kutwala muze, tumbaji vamwene chishina apwile nakulumbununa. Chimbalwila veji kuchizachisanga mangana chifutunwise mbolo. Yesu azachishile chimbalwila hakusaka kulumbununa mutangule. Apwile nakuhuhumuna tumbaji valihende ‘kukunangula chavaFwaliseu navaSatuse,’ chize chinahase kuvatangula.—Mateu 16:12.