Yesu akolelele muNazaleta, nganda yize kayafumakanyine chikumako. Nganda kana yapwilile kunote, kungalila yajipili yaNgalileya, kumulauko wachijiva chachinene vavulukile ngwavo Kalungalwiji waNgalileya.

Chasoloka nge omu Yesu apwile namyaka yakusemuka yivali, visemi jenyi vaYosefwe naMaliya vejile nakutwama munganda kana kufuma kuEjipitu. Chasoloka nawa nge halwola kana, Yosefwe naMaliya vapwile namwana umwe kaha. Oloze kutwala muze, vasemene Yakova, naYosefwe, naShimona, naYuta. Yosefwe naMaliya vasemene nawa vana veka vamapwevo. Ngocho Yesu apwile jino navandumbwenyi vamalunga navava vamapwevo kafwe 6.

Yesu apwile navausoko veka nawa. Kausoko kenyi umwe apwile Elizaveta namwanenyi Yowano, vaze vatwaminenga kwakusuku chikuma kuYuleya. Kausoko kenyi mukwavo uze atwaminenga mwakamwihi muNgalileya shina naye Salome, ndumbwanaye Maliya. Salome asombokele kuli Zevete. Ngocho vana vavo vamalunga vavali, Yakova naYowano, vapwile nge vandumbwaYesu. Katwatachikiza numba nge Yesu ahemenenga hamwe navava vandumbwenyi omu apwile nakukolako, oloze kutwala muze vapwile masepa jenyi vaze azangile, vapwile vaposetolo jenyi.

Yosefwe azachilenga nangolo mangana azakame tanga yenyi yize yapwile nakutohwelako lika, kaha apwile muka-kusonga maliva. Yosefwe alelele Yesu  kwijiva nge mwanenyi wakulisemena, shikaho Yesu vamuvulukile ngwavo “mwana wayauze muka-kusonga maliva.” (Mateu 13:55) Yosefwe anangwile Yesu mwakusongela maliva, kaha naikiye ejivile kanawa mulimo kana. Shikaho vatu vavulukilile Yesu ngwavo: ‘Ou himuka-kusonga maliva.’—Mako 6:3.

Tanga yaYosefwe yalemeselenga Yehova. Yosefwe naMaliya valamine Jishimbi jaKalunga jize jahanjikile nge visemi vatela kunangula vana vavo vyuma vyakushipilitu ‘hakutwama mujizuvo javo, nahakutambuka mujila, nahakusavala, nahakuhinduka.’ (Lushimbi lwamuchivali 6:6-9) MuNazaleta nawa mwapwile sunangonga. Chakuzeneka kukakasana, Yosefwe atwalilenga tanga yenyi lwola lwosena kusunangonga nakulemesa Kalunga. Mbimbiliya yahanjika ngwawo, “kweseka namuze alingilenga halikumbi lyaSambata,” Yesu ayilenga kusunangonga. (Luka 4:16) Tanga yosena nawa yalivwishilenga kuwaha kuya lwola lwosena kutembele yaYehova kuYelusalema.