Likumbi limwe, Yosefwe ahindwile Maliya hatulo mangana amulweze mujimbu waulemu. Kangelo kaYehova alotesele Yosefwe ngwenyi: “Katuka, mbata ou mwana nanaye uchinyine kuEjipitu, kaha katwame kuze palanga nomu nangukakulweza ngwami kinduluka, mwomwo Helote kalinwomu atondetonde ou mwana nakumujiha.”—Mateu 2:13.

Hahaze vene, Yosefwe, naMaliya namwanavo vachinyine naufuku. Kaha valingile kanawa kuchina halwola vene elu, mwomwo Helote ejivile nge vaze vaka-kuzachisa vatanganyika vanamwongo. Avalwezele vakinduluke kuli ikiye kachi nge vanamuwane Yesu. Oloze vakivo vakindulukile kulifuchi lyavo chakuzeneka kumulweza. Ngocho Helote apihililile chikuma. Jino hakusaka kujiha Yesu, akashile lushimbi lwakujiha vana vamalunga vosena vamyaka yivali nakuneha mwishi, vaze vapwile muMbetelema namujingalila jahachileko. Asakwile kujiha vana vamyaka kaneyi kweseka namujimbu vamulwezele vaze vaka-kuzachisa vatanganyika vafumine kuMututuko.

Mujimbu kanou wakujiha vana vamalunga wapihile chikuma. Katwatachikiza kuvula chavana vamalunga vajihileko, oloze mapwevo vaze valilile chikuma nakulishona vana vavo vateselemo upolofweto wamuMbimbiliya uze ahanjikile Yelemiya kapolofweto kaKalunga.—Yelemiya 31:15.

Halwola kanelu, Yosefwe natanga yenyi te vanachinyina lyehi muEjipitu, kaha vatwaminenga lika kuze. Jino likumbi limwe naufuku, kangelo kaYehova ejile nawa kuli Yosefwe nakumulotesa. Ou kangelo ambile ngwenyi: “Katuka, mbata ou mwana nanaye uyenga kulifuchi lyaIsalele, mwomwo vaze vapwile nakutondatonda mwono wayou mwana vanafu lyehi.” (Mateu 2:20) Ngocho Yosefwe atachikijile ngwenyi vatela kukinduluka jino kwimbo lyavo. Kukinduluka chavo chateselemo upolofweto ukwavo wamuMbimbiliya wakwamba nge,  MwanaKalunga navakamusanyika akafume muEjipitu.—Hozeya 11:1.

Chasoloka nge Yosefwe ajinyine kutunga muYuleya, kwakamwihi nanganda yaMbetelema kuze vatwaminenga shimbu kanda vachinyine kuEjipitu. Oloze evwile ngwavo mwanamwangana Helote wamupi muchima, Alekelau, ikiye apwile mwangana wamuYuleya. Kaha Yehova amulotesele nawa nakumulweza vyaponde yapwileko. Shikaho, Yosefwe natanga yenyi vayile kunote, nakukatwama munganda yaNazaleta, muNgalileya, kwakusuku nakuze kwapwile chikota chakwitava chavaYuleya. Yesu akolelele munganda kaneyi, kahechi chateselemo upolofweto ukwavo wakwamba ngwavo: “Navakamuvuluka ngwavo muka-Nazaleta.”—Mateu 2:23.