CHIHANDA 3
Kutupihisa Kumuchima Nge Tuli ‘naChuma Chize Chinatulingisa Tuyayavale’
“Ndumbwami wapwevo wamuchikungulwilo chetu anguvangijikilile ngwenyi ngunevi jimbongo jenyi. Kaha vandumbwetu veka vamuchikungulwilo vatachikijile chihande kana nakuputuka kumuhakwila. Kutwala muze uze ndumbwami angulwezele ngwenyi natambula mujimbu weka wakuvuluka nge keshi yami ngwevile jimbongo jenyiko. Numba tuhu alikonekelele kuli ami, oloze ngwashinganyekele mumuchima wami ngwami kangweshi kukamukonekelako hachuma nangulingi.”—Linda.
KUTALA nayove vakupihisaho lyehi kumuchima kuli ndumbwetu ngana muze chapwile kuli Linda tahi? Chaluvinda, vandumbwetu vamwe vanevunga kupihya chikuma havilinga vyavandumbwavo nakuvazeyesa nakushipilitu. Kutala nayove vakupihisaho lyehi kumuchima kuli ndumbwetu tahi?
Kutala Mutu Nahase “Kutuhandununa kuZangi yaKalunga” Tahi?
Chinahase vene kutukaluhwila kukonekela ndumbwetu uze natupihisa kumuchima. Chipwe ngocho, vaka-Kulishitu vatela kulizanga navakwavo. (Yowano 13:34, 35) Nge mukwetu muka-kwitava natulingi mwamupi, chinahase kutukolesa chikuma kumuchima.—Samu 55:12.
Mbimbiliya yahanjika ngwayo lwola lumwe vaka-Kulishitu veji ‘kupwanga nachuma chimwe chakuvalingisa vayayavale.’ (Wavaka-Kolose 3:13) Chipwe ngocho, nge chuma kana chinasoloka kuli etu, chinahase kutukaluhwila kuwana mwakulingila. Kutala kuli vyuma vimwe vize vinahase kutukafwa tahi? Tuchitalenu hajishimbi jino jitatu jamuVisoneka:
Setu wamwilu atachikiza vyuma vyosena. Yehova eji kumonanga vyuma vyosena vyeji kusolokanga kuhakilako vene navilinga vyavipi tweji kumonanga naukalu weji kufumangamo. (WavaHepeleu 4:13) Kaha nawa Yehova eji kutwivwilanga keke nge tunakuyanda. (Isaya 63:9) Keshi kwechelela ‘luyando chipwe vihuli’ chipwe vyuma vyeka numba vene ngamba yenyi ‘atuhandunune kuzangi yaKalungako.’ (Wavaka-Loma 8:35, 38, 39) Nayetu katwatela kwechelela kala chuma chipwe kala mutu atuhandunune kuli Yehovako.
Kukonekela kachalumbununa kwechelela vilinga vyavipi vitwalilileko. Nge natukonekela vaze vanatupihisa, kaha kacheshi nakulumbununa nge tunetavila chipwe tunechelela vilinga vyavipi vitwalilileko. Tachikizenu ngwenu Yehova ketavisa shiliko, oloze eji kukonekelanga nge chinatemo kulinga ngocho. (Samu 103:12, 13; Hambakuke 1:13) Omu Yehova eji kutukolezezanga tukonekelenga vakwetu, eji kutulwezanga tumulondezeze. Keshi “kulamina vatu koko haya myaka yosenako.”—Samu 103:9; Mateu 6:14.
Nge natuhona kulaminanga vakwetu koko, kaha natunganyala. Mujila muka? Tala hachakutalilaho chinakavangizaho. Olola livoko lyove nakuhakaho lilolwa lyalilemuko chindende. Chinahase kupwa chachashi lilolwa kana kupwa lika halivoko lyove halwola lwalundende. Oloze ngachilihi nge mutwalaho lika kwolola livoko lyove halwola lwalusuku? Kutala unahase kulyolola muminyutu yayindende tahi nyi haola yamuundu, nyi kuhambakanaho? Chikupu vene livoko lyove nalizeya chikuma. Numba tuhu kulema chalize lilolwa kacheshi kwalumukako, oloze lilolwa kana nge nalishimbula chikuma halivoko lyove, kaha nawivwa nge linaleme. Omu mukiko chapwa nakulamina vakwetu koko. Nge natulamina mukwetu koko halwola lwalusuku, numba vene hachuma chachindende, kaha natuliyanjisa etu vavene. Echi chikiko chalingisa Yehova atukolezeze tuhonenga kulamina vakwetu koko. Kukonekela vakwetu chinahase kutunganyalisa.—Vishimo 11:17.
Nge natuhona kulaminanga vakwetu koko, kaha natunganyala
“Ngwevwile Kwijiva Nge Yehova Ali Nakuhanjika naYami”
Vyuma muka vyakafwile Linda ahone kulamina uze mukwavo koko havyuma vize amulingile? Chuma chimwe chamukafwile shina kushinganyeka haVisoneka vize vyahanjika hakukonekelanga vakwetu. (Samu 130:3, 4) Chuma chakafwile chikuma Linda shina kutachikiza ngwenyi nge mwakonekela uze mukwavo, kaha naYehova mwamukonekela. (Wavaka-Efwesu 4:32–5:2) Ngachize, ahanjikile ngwenyi: “Ngwevwile kwijiva nge Yehova ali nakuhanjika nayami.”
Mukuhita chalwola, Linda kapwile cheka nakokoko. Akonekelele uze ndumbwenyi namuchima wenyi wosena, kaha oholyapwa apwa jino hisepa lyenyi. Linda achili lika nakuzachila Yehova. Tachikiza ngwove Yehova asaka kukukafwa nayove ulingenga mwomumwe.
