YEHOVA alifwanyisa mapapa kakavulu kuli kafunga wakufwana ngana. MuMazu enyi atufwelelesa ngwenyi: “Nangutondatonda mikoko jami, kaha nanguvazakamanga ami yivene.”—Ezekele 34:11, 12.

Mikoko jaYehova vapwa veya? Vapwa vatu vaze vamuzanga nakumulemesa. Mbimbiliya yahanjika ngwayo: “Tulemese Kalunga nakulifukula kuli ikiye. Tufukamenu kumeso aYehova Tengi yetu. Mwomwo ikiye Kalunga ketu, kaha etu tuvatu vakuulilo wenyi, tumikoko jenyi vaze azakama.” (Samu 95:6, 7) Ngana mwamikoko vaze vali nakukavangiza kafunga, vaka-kulemesa Yehova vafwila kukavangiza Kafunga kavo. Uno kavatwama natutengako tahi? Nduma. Vangamba jaKalunga shimbu jimwe vanapunga “vakulimwanga,” kaha nawa nge “mikoko vaze vanajimbala.” (Ezekele 34:12; Mateu 15:24; WaPetulu 1, 2:25) Chipwe ngocho, nge mutu nahanduka kuutanga, Yehova eji kufwelelanga ngwenyi likumbi limwe mwakakinduluka cheka.

 Uno weji kushinganyekanga ngwove Yehova achili lika Kafunga kove tahi? Uno Yehova apwa ngachilihi Kafunga makumbi ano? Achitale hajijila jino jitatu:

Eji kutulisanga kushipilitu. Yehova ahanjika ngwenyi: ‘Nanguvalishilanga kuulilo wamwaza kaha nawa navautamanga kuulilo wamwaza.’ (Ezekele 34:14) Yehova kanda lyehi ahonengaho kutuhana vyakulya vyamwaza vyakulisezaseza vyakushipilitu. Kutala unahase kwanukako chihande chimwe chamumikanda yetu, chipwe chize ahanjikile ndumbwetu, chipwe vindiyo yize yakumbulwile kulomba chove chakusaka Yehova akukafwe tahi? Kutala kachakukafwile ufwelele ngwove Yehova akuzakamako tahi?

Yehova eji kutukinganga nakutukafwa. Yehova ashika ngwenyi, ‘Nangukindulwisa vaze vanahanduka. Nangujichika vaze vanalemana, nakujikijisa vaze vanazeye.’ (Ezekele 34:16) Yehova eji kujikijisanga vaze vanazeye chipwe vanalizakamina. Eji kujichikanga mikoko jenyi, nakuvakafwa vakanguke nge vanavalemeka pamo kuli vakwavo vaka-kwitava. Kaha nawa eji kukindulwisanga vaze vanahanduka navaze vali nakulipika navishinganyeka vyavipi.

Eji kutuzakamanga. Yehova amba ngwenyi: “Nanguvapululula kweshokwo vanalimwangila,” kaha nawa ngwenyi: “Nangutondatonda vaze vanajimbala.” (Ezekele 34:12, 16) Yehova afwelela ngwenyi mukoko wakujimbala nahase kukinduluka cheka. Eji kwijivanga nge mukoko najimbala, eji kumutondatondanga, kaha eji kuwahililanga nge namuwane. (Mateu 18:12-14) Eji kuvulukanga vaka-kumulemesa vamuchano ngwenyi, “mikoko jami ngweji kuzakamanga.” (Ezekele 34:31) Nayove wapwa umukoko kana.

Mwomwo ika Yehova eji kukutondelanga ukinduluke kuli ikiye? Asaka upwenga wakuwahilila. Afwelelesa mikoko jenyi ngwenyi, “jikisu najikanoka nge vula.” (Ezekele 34:26) Lushiko kana lweji kutesangamo. Unalimwena lyehi unjiho kanou.

Anuka vyuma walivwishile kuwaha omu watachikijile Yehova. Chakutalilaho, wevwile ngachilihi omu chatete walinangwile muchano waKalunga wakutalisa kulijina lyenyi nakuvyuma ajina kukalingila vatu? Kutala unakwanuka omu wevwile kuwaha hakulinunga hamwe navakwenu vaka-Kulishitu hakukunguluka chachihanda chipwe changalila tahi? Kutala kawakindulukile kwimbo oku unawahilila omu wambulilile mutu mujimbu wamwazako tahi?

Unahase cheka kupwa wakuwahilila. Vangamba jaKalunga vakushikulu valombele ngwavo: “Ove Yehova, tukindulwise, kaha natukinduluka kuli ove namichima yetu yosena. Vyuma vyosena vipwenga nge muze vyapwile kumakumbi akunyima.” (Lungungu 5:21) Yehova akumbulwile kulomba kana, kaha vatu jenyi vakindulukile nakuputuka kumuzachila nakupwa cheka vakuwahilila. (Nehemiya 8:17) Omu mukiko Yehova mwalinga nakuli yove.

Chipwe ngocho, kukinduluka kuli Yehova chapwa chachashi kuchihanjika kaha nakanwa, oloze chachikalu kuchilinga. Achitale haukalu watwama hakukinduluka kuli Yehova, kaha nomu unahase kuuhonesa.