Kuli ndumbwetu:

Ngana muze watachikiza lyehi, Mbimbiliya yapwa himukanda uze wahanjika hachiyoyelo chavatu. Havatu kana, vavavulu vapwile malunga namapwevo vakushishika vaze vamwenenga ukalu nganou tuli nakumona etu makumbi ano. Vatu kana vevwilenga “nganomu tweji kwivwanga nayetu.” (WaYakova 5:17) Vatu vamwe valipikilenga naukalu nakulizakamina. Kaha veka nawa vavahukanyishilenga kuli vaka-tanga yavo chipwe vandumbwavo vakushipilitu. Vavavulu nawa vapwilenga nakuyanda navishinganyeka vyakulivwa nge vali namulonga mwomwo yavyuma valimbenjele kunyima.

Kutala vatu kana vasezele Yehova chakuzeneka kukinduluka cheka tahi? Nduma. Vavavulu vapwile nge muka-kwimba jisamu uze alombele ngwenyi: “Nguli nakulumbwangila nge mukoko wakujimbala. Ngutondetonde ami ngamba yove, mwomwo kangwavulyamine jishimbi joveko.” (Samu 119:176) Kutala omu mukiko weji kwivwanga nayove tahi?

Yehova keshi kuvulyama vangamba jenyi vaze vanahanduka kulimba lyenyiko. Oloze eji kuvatondatondanga, chikumanyi kuzachisa vakwavo vaka-kwitava. Achitale chakutalilaho chomu Yehova akafwile ngamba yenyi Yopa uze amwene makava amavulu, kuhakilako naukalu wakuhona jimbongo, kufwisa vaka-tanga yenyi, nakuviza musongo waunene. Yopa omikile nawa hamazu amapi aze vahanjikile vatu vaze vatelele kumukafwa. Numba tuhu lwola lumwe ashinganyekele vyuma vyakuhenga, oloze kasezele Yehovako. (Yopa 1:22; 2:10) Uno Yehova akafwile ngachilihi Yopa apwenga cheka wakujikiza?

Jila yimwe yize Yehova akafwile Yopa shina kuhichila muli mukwavo muka-kwitava, Elihu. Omu Yopa alinyengele haukalu apwile nawo, Elihu amwivwililile nakumuhanjikisa. Uno Elihu ahanjikile vyuma muka? Uno ahulamishile Yopa chipwe kumuhana mulonga nakumwivwisa sonyi tahi? Kutala Elihu alimwene kupwa wamulemu kuhambakana Yopa tahi? Nduma. Shipilitu yaKalunga yalingishile Elihu ahanjike ngwenyi: “Nayami ngwapwa nge ove kumeso aKalunga wamuchano. Nayami ngwafuma kuunonga.” Kaha ajikijishile Yopa ngwenyi: “Kanda ungwivwa womako, mazu ami kaweshi kukulemuwisako.” (Yopa 33:6, 7) Muchishishisa chakutohwesa ukalu waYopa, Elihu amuhuhumwine muzangi nakumukolezeza.

Tachikiza ngwove yino mbuloshuwa tunayisoneka namuchima nganou waElihu. Chatete, twevwililile vyuma vapwile nakuhanjika vandumbwetu vavavulu vaze vazeya kushipilitu nakuhunanana haukalu vapwile nakumona. (Vishimo 18:13) Chamuchivali, twataliletalile muVisoneka nakukekesa mijimbu yize yahanjika omu Yehova akafwile vangamba jenyi kunyima omu vapwile muukalu woumwe. Chamakumishilo, twafutwile mijimbu kaneyi yamuVisoneka namijimbu yavandumbwetu vamakumbi ano nakusoneka jino yino mbuloshuwa. Tunakulombo ukekese kanawa mijimbu kaneyi. Tachikiza ngwove twakuzanga chikuma.

Lizavu lyaKutwaminyina lya Vinjiho jaYehova