Kuhituluka muVyuma Twafwelela Vize Vanalumunako
Hamyaka yayivulu, mangazini yaKaposhi Kakutalila yinalumunangako vyuma vyavivulu vyamuupolofweto waEzekele. Kaha muno mumukanda wakwamba ngwavo, Kukindulwisa Kulemesa chaMuchano muli navyuma vyeka twafwelela vize vanalumunako. Tutalenu nge munahase kukumbulula vihula vino.
Uno vize vihanga viwana vyapwile kuli muka-kuyoya himuka-kuyoya vyemanyinako ika?
Omu twatachikijile hakavanga: Muka-kuyoya himuka-kuyoya apwile navihanga viwana, chihanga hichihanga chemanyinako chuma chimwe havilinga vyakulipwila atwama navyo Yehova.
Vyuma tunalumunako: Hakuwana nge chihanga hichihanga chavaze vaka-kuyoya vawana chemanyinako chuma chimwe havilinga vyakulipwila viwana atwama navyo Yehova, shikaho vihanga vyosena viwana vyemanyinako vilinga vyosena atwama navyo Yehova. Kaha nawa vize vihanga viwana vyatulingisa tulikomokele chikuma hangolo naupahu atwama navyo Yehova.
Ovyo vinatulingisa twalumune mujila kana: Anukenu ngwenu muMbimbiliya nambala 4 kakavulu vayizachisa kwimanyinako kuzuka mwosena. Shikaho vize vihanga vyosena viwana kavyemanyinako kaha vilinga viwana vyaYehovako, oloze vyemanyinako vilinga vyosena atwama navyo. Kaha nawa chihanga hichihanga chauze muka-kuyoya chemanyinyineko ukelenga, nangolo naulemu. Chipwe ngocho, vaze vaka-kuyoya vangolo vawana vaze vemanyinako vyuma vyakutenga, vatwama mwishi yalitanda lyaYehova. Echi chasolola nge Yehova apwa Mwata Wakulitulaho havyuma vyosena.
Uno uze lunga apwile nachinoma chavyuma vyakusonekesa chamuka-kusoneka emanyinako iya?
Omu twatachikijile hakavanga: Uze lunga apwile nachinoma chavyuma vyakusonekesa chamuka-kusoneka emanyinyineko vaka-Kulishitu vawavisa vasalaho. Kuhichila mumulimo wakwambulula nakutunga tumbaji, ava vaka-Kulishitu vawavisa vapwile nakufunjika mifunda yachifwanyisa hajiholo javatu vaze vapwile nakuliweza halizavu ‘lyaliyongomena lyalinene.’—Kuso. 7:9.
Vyuma tunalumunako: Uze lunga apwile nachinoma chavyuma vyakusonekesa chamuka-kusoneka emanyinako Yesu Kulishitu. Mwakafunjika mifunda vaze vamuliyongomena lyalinene omu mwakavasopesa kupwa mikoko ‘haluyando lwalunene.’—Mateu 24:21.
Ovyo vinatulingisa twalumune mujila kana: Yehova ahana mulimo wakusopesa kuli Mwanenyi. (Yowa. 5:22, 23) Hali Mateu 25:31-33 vasonekaho ngwavo, Yesu mwakasopesa vatu kupwa “mikoko” chipwe “vapembe.”
Uno vana vamutanga yimwe, vaOhola naOholiva vemanyinako Katolika namauka aPolotesitati tahi?
Omu twatachikijile hakavanga: Ohola (Samaliya, nganda yayinene yaIsalele) uze apwile mukulwane emanyinyineko kwitava chaKatolika, kaha Oholiva (Yelusalema nganda yayinene yaYuta) uze apwile kanyike emanyinyineko mauka aPolotesitati.
Vyuma tunalumunako: Ava vana vamapwevo valingilenga ujila wachifwanyisa kavemanyinako kala mauka amuKulishitendomuko. Oloze mujimbu wavava mapwevo watukafwa tutachikize omu Yehova eji kwivwanga kachi nge vatu jenyi vakushishika navalinga ujila wakushipilitu. Omu mukiko eji kwivwanga nahamauka amakuli osena.
Ovyo vinatulingisa twalumune mujila kana: Kakweshi Visoneka vize vyasolola nge Ohola naOholiva vemanyinako mauka aKulishitendomuko. Isalele naYuta vapwilenga mapwevo jaYehova vakushishika vachifwanyisa. Oloze Kulishitendomu kanda yipwengangaho lyehi pwevo lyaKalunga wachifwanyisa. Kaha nawa hakufwanyisa vatu jaKalunga vakuhona kushishika kuli mapwevo vaka-kulinga ujila vasoneka mumukanda waEzekele kapetulu 16 na 23, chasolola nge Yehova evwililile keke vatu jenyi nakuvakindulwisa kulifuchi lyavo. Oloze Kulishitendomu yize yatwama muMbavilone Yayinene kaveshi kukayivwila kekeko.
Uno Kulishitendomu yemanyinako Yelusalema yakushikulu yize yapwile navilinga vyavipi tahi?
Omu twatachikijile hakavanga: Kulishitendomu yemanyinako Yelusalema yize yapwile navilinga vyavipi. Kaha kunongesa Yelusalema chemanyinako kunongesa Kulishitendomu.
Vyuma tunalumunako: Vyuma valingilenga vatu muYelusalema vyakufwana nge, kulemesa tuponya navilinga vyeka vyakuhenga vili nakutwanukisa vyuma vinakusoloka muKulishitendomu, oloze mikanda yetu kayeshi nakuhanjika cheka nge Kulishitendomu yemanyinako Yelusalemako.
Ovyo vinatulingisa twalumune mujila kana: MuMbimbiliya kamwatwama unjiho uze wasolola nge Kulishitendomu yemanyinako Yelusalemako. Yelusalema yapwile chihela chakulemesela Kalunga wamuchano, oloze Kulishitendomu kanda yilemesengaho lyehi Kalunga wamuchano. Mukuhita chalwola Yehova evwililile keke nganda yaYelusalema, oloze Kulishitendomu kanda lyehi vayivwileho keke kuli Kalunga.
Uno chakumwenesa chize chasolwele chinema chapwile navifuwa vyaumu chateselemo ngachilihi?
Omu twatachikijile hakavanga: Mu 1918, vaka-Kulishitu vawavisa vavatwalile muufunge muMbavilone Yayinene, kaha vapwile kwijiva nge vanafu. Oloze kuheta mu 1919, Yehova avasokwele muufunge, kaha vaputukile cheka kwambulula mujimbu wamwaza waWangana, echi chapwile kwijiva nge vanayoyo cheka.
Vyuma tunalumunako: Kufwa chachifwanyisa chipwe ngwetu ufunge wakushipilitu waputukile lyehi shimbu kanda 1918. Waputukile mulikulukaji lyamyaka lyamuchivali C.E. kaha wakumine mu 1919 C.E. Ufunge kana wambachile myaka yayivulu ngana muze Yesu ahanjikile muchifwanyisa chatiliku namwila.
Ovyo vinatulingisa twalumune mujila kana: Ufunge uze vapwilemo vaIsalele wambachile tando yayisuku, waputukile mu 740 B.C.E. nakukuma mu 537 B.C.E. Upolofweto waEzekele uze wahanjikile havifuwa “vyaumu” chipwe “vyakuma chau,” wasolola nge vatu vaze vafwanyishile kuvifuwa vafwile hatando yayisuku. Vize vifuwa vyaputukile kulinunga chikoki chikoki, echi chasolola nge vyambachile tando numba viyoye.
Uno kuwanyisa vitondo vivali hamwe chalumbununa ika?
Omu twatachikijile hakavanga: Omu yakumine Jita yaKaye Yatete, vaka-Kulishitu vawavisa vakushishika valinungile cheka hamwe mu 1919.
Vyuma tunalumunako: Upolofweto kana wasolola nge vangamba jaYehova navakalinunga hamwe. Hanyima yamwaka wa 1919, vaka-Kulishitu vawavisa vasalaho valinungile hamwe navaze vatwama nalutalililo lwakukayoyela hano hamavu. Mazavu osena avali anakulemesela hamwe Yehova.
Ovyo vinatulingisa twalumune mujila kana: Upolofweto kana kawasolola nge chitondo chimwe nachikahokoka havali kaha kufumaho hinavachinunga chekako. Shikaho ou upolofweto kawalumbununa nge lizavu limwe nalikalihandununa, kaha kufumaho hinalilinunga cheka hamweko. Oloze walumbununa omu mazavu avali akulihandununa nawakalinunga hamwe.
Uno Ngonge wakuMangonge apwa iya?
Omu twatachikijile hakavanga: Ngonge wakuMangonge lyapwa lijina likwavo lyaSatana lize vamulukile omu vamufumishile mwilu.
Vyuma tunalumunako: Lijina lyakwamba ngwavo Ngonge wakuMangonge lyatalisa kuli vaka-mafuchi vaze navakalifutula nakufumbukila vaka-kulemesa Kalunga vamuchano haluyando lwalunene.
Ovyo vinatulingisa twalumune mujila kana: Hakuwana nge Ngonge navakamulya kutujila nakumuhana nawa chihela chakumufunda hamavu, ngocho Ngonge kapwa mutu wakushipilituko. Kaha nawa ou Ngonge alifwana nauze valumbununa mumukanda waNdanyele naKusoloka. Mikanda kana yavuluka vaka-mafuchi ahamavu aze nawakafumbukila vatu jaKalunga.—Ndanye. 11:40, 44, 45; Kuso. 17:14; 19:19.
Uno Ezekele amwene tembele yayinene yakushipilitu ngana yize alumbunwine kaposetolo Paulu tahi?
Omu twatachikijile hakavanga: Tembele yize vamwesele Ezekele yikiko vene tembele yakushipilitu alumbunwine kaposetolo Paulu.
Vyuma tunalumunako: Ezekele kavamumwenesele tembele yakushipilitu yize yaputukile mu 29 C.E. koko, oloze chakumwenesa kana chasolola omu kulemesa chamuchano vavulukile muJishimbi vahanyine Mose vachikindulwishile omu vafunge vakindulukile kulifuchi lyavo. Tembele yakushipilitu alumbunwine Paulu yashindakanya hamulimo azachile Yesu, uze apwa Kapilishitu Wakulitulaho Wamunene kufuma mu 29 nakuheta mu 33 C.E. Tembele vamwenesele Ezekele kavavulukilemo Kapilishitu Wakulitulahoko, vavulukilemo kaha vyakusokola vatu jaKalunga muufunge wakushipilitu chize chaputukile mu 1919 C.E. Shikaho katweshi kufwila kuwana ovyo vyemanyinako vipimo navyuma vyosena vize vamwenesele Ezekele muchakumwenesa chatembeleko. Oloze twatela kushinganyeka chikuma havishina vize natulinangula kuli echi chakumwenesa chaEzekele kutalisa kujindongi ahakako Yehova mukulemesa chamuchano.
Ovyo vinatulingisa twalumune mujila kana: Tembele vamwenesele Ezekele yalihandununa natembele yakushipilitu mujijila jajivulu. Chakutalilaho, mutembele vamwenesele Ezekele vavulukamo vyakuhana vimuna vavavulu kupwa wana, oloze mutembele yakushipilitu vavulukamo vyakuhana wana umwe kaha wakulumba, uze vahanyine kamwe “kaha kunahu.” (Hepe. 9:11, 12) Shimbu kanda Kulishitu ezenga hano hamavu, Yehova kalumbunwine muchano wakujiminyina kutalisa kutembele yakushipilituko.
