1, 2. (a) Tuvosena tukwechi lisesa lyakulinga yika? (b) Uno kangelo wakushishika alingile vyuma muka omu vasakile kumulemesa?

TUVOSENA mutu himutu atela kutachikiza mwakukumbulwila chihula chino chachilemu chakwamba ngwavo: Iya ngwatela kulemesa? Vatu vavavulu vanahase kuhanjika ngwavo, chihula kana chachikalu kukumbulula mwomwo vanahase kuchikumbulula mujijila jakulisezaseza. Oloze kuhanjika muchano, chihula kana chapwa chachashi kukumbulula. Mutu nahase kusakula kulemesa Yehova Kalunga chipwe kulemesa Satana Liyavolo.

² Satana afwila kumulemesa. Asolwele chuma kanechi omu esekele Yesu. Ngana muze twashimutwililile muKapetulu 1, Satana alwekesele Yesu mawangana ahamavu osena. Uno asakile Yesu alinge ika? Alwezele Yesu ngwenyi: ‘Ngufukamine nakulifukula kuli ami.’ (Mateu 4:9) Oloze kangelo uze ejile kuli kaposetolo Yowano ketavilile vamulemeseko. (Tangenu Kusoloka 22:8, 9.) Omu Yowano asakile kulemesa uze mwanaKalunga wakushipilitu wakulinyisa, ikiye amulwezele ngwenyi: “Kanda ulinga chuma kanako.” Muchishishisa chauze kangelo kuhanjika ngwenyi ‘Ngulemese,’ ikiye ambile ngwenyi, “Lemesa Kalunga.”

3. (a) Mukanda uno vanausonekela ika? (b) Vyuma muka natuhituluka?

 ³ Mukanda uno vanausoneka mangana utukolezeze tulemesenga kaha Yehova Kalunga ngana muze ahanjikile uze kangelo. (Lushi. 10:20; Mateu 4:10) Tuhitulukenu muupolofweto waEzekele navyuma vamumwenesele mangana tuwane vishina tunalinangula kutalisa kukulemesa chamuchano. Kufumaho natukekesa nawa Visoneka mangana tumone vyuma vize navikasoloka kulutwe omu vatu vosena hamavu navakaveseka kamakumishilo. Vaze navakafungulula cheseko kana vakiko navakamona omu kulemesa chamuchano navakachikindulwisa hamavu hosena.

4. Vishina muka vyavinene vitatu vanashindakanya mumukanda waEzekele?

⁴ Mukanda waEzekele watunangula nge, kulemesa chamuchano chasakiwa, (1) kulemesa Yehova namuchima wetu wosena, (2) kutwalaho lika kupwa vakulinunga hakulemesa Kalunga wamuchano, (3) nakuzanga vakwetu. Tutalenu omu upolofweto navyakumwenesa tunashimutwila mumukanda uno vinashindakanya vishina kanevi vitatu.

5-9. Vyuma muka tunalinangula kutalisa kukulemesa Yehova namuchima wetu wosena?

⁵ Kapetulu 3: * Twashimutwilile hachakumwenesa chize chasolwele Yehova vanamujingilika kukongolo kaha nawa natwame hali vaka-kuyoya vakushipilitu. Echi chatunangula nge Kalunga Wangolo Josena ikiye kaha atamo kumulemesa.—Ezeke. 1:4, 15-28.

⁶ Kapetulu 5: Twashimutwilile hachakumwenesa chize chasolwele omu tembele yaYehova vayipihishile. Chakumwenesa kana chasolwele nge Yehova eji kumonanga vyuma vyosena. Eji kumonanga omu vatu jenyi veji kulinganga vyuma vyavipi vyakufwana nge kulemesa tuponya chipwe navalinga tuhu vyuma kana mukusweka. Eji kwivwanga kupihya havyuma kana kaha eji kuzangamisanga vaze veji kuvilinganga.—Ezeke. 8:1-18.

⁷ Kapetulu 7: Twashimutwilile hamujimbu wakusopesa mafuchi aze ‘asawilenga’ vaIsalele. Mujimbu kana wasolola nge Yehova mwakazangamisa vosena vaze veji kuyanjisanga vatu jenyi. (Ezeke. 25:6) Chishina chikwavo chachilemu tunalinangulako shina, twatela kushishika chatete kuli Yehova. Katwatela kuhokola jishimbi jaYehova hakufwila kwononoka vausoko wetu vaze kavalemesa Yehova chipwe kupendamina haluheto lwetu chipwe kuhokola kulonga chetu hakukundwiza jifulumende javatuko, mwomwo Yehova kaha ikiye atamo kumulemesa.

⁸ Kapetulu 13 na 14: Twashimutwilile hachakumwenesa chize chasolwele tembele yili hapili yayisuku chikuma. Chakumwenesa kana chatunangula nge twatela kumona jishimbi jaYehova kupwa jajilemu chikuma, mwomwo Yehova kaha ikiye apwa wakulitulaho kuhambakana tulunga vosena.—Ezeke. 40:1–48:35.

 ⁹ Kapetulu 15: Twashimutwilile haupolofweto uze wahanjika hali vaIsalele navaYuta vaze vafwanyishile kuli mapwevo vaka-kulinga ujila. Chuma kana chatunangula nge Yehova eji kwivwanga kupihya hali vatu jenyi vaze veji kulinganga ujila wakushipilitu.—Ezeke. kapetu.16, na 23.

10-14. Uno chishina chakutwalaho lika kulinunga hakulemesa Kalunga vanachishindakanya ngachilihi?

¹⁰ Kapetulu 8: Twashimutwilile haupolofweto uze wahanjikile nge Yehova mwakakatula “kafunga umwe” mangana akazakame vatu jenyi. Upolofweto kana wasolola nge twatela kuzachila hamwe navakwetu mukuunda nakulinunga omu vali nakututwaminyina kuli Yesu.—Ezeke. 34:23, 24; 37:24-28.

¹¹ Kapetulu 9: Twashimutwilile haupolofweto waEzekele uze wahanjikile havatu jaKalunga vaze vafumishile muufunge muMbavilone nakuvatwala kulifuchi lyavo. Upolofweto kana weji kukafwanga vatu vosena vaze navasaka kwivwisa Yehova kuwaha makumbi ano. Vaka-kulemesa Yehova vamuchano vatela kuseza vilinga vyosena vize vyakundwiza kwitava chamakuli. Numba tuhu twafuma kumauka akulisezaseza, nakuvisemwa vyakulisezaseza nachiyoyelo chakulisezaseza, oloze tuvosena twatela kupwa vakulinunga mangana tusolole hatoma ngwetu twapwa tuvatu jaKalunga.—Ezeke. 11:17, 18; 12:24; Yowa. 17:20-23.

¹² Kapetulu 10: Twashimutwilile hachakumwenesa chavifuwa vyaumu vize vyayoyele cheka. Chakumwenesa kana chashindakanyine hakulinunga chavatu jaKalunga. Twatokwa kupwa halizavu lyavatu vaze veji kulemesanga Kalunga wamuchano nakuzachila hamwe mukulinunga.—Ezeke. 37:1-14.

¹³ Kapetulu 12: Twashimutwilile haupolofweto uze wahanjikile havitondo vivali vize vanungile nakupwa chitondo chimwe. Upolofweto kana washindakanyine chikuma hakununga vatu jaKalunga. Ou upolofweto unatesamo omu vaka-Kulishitu vawavisa vanakuzachila hamwe namikoko veka, kaha chili nakutukolezeza chikuma. Numba tuhu twatwama mukaye kavikokojola nachijindo, oloze twapwa vakulinunga mwomwo yakulizanga nakupwa vakushishika.—Ezeke. 37:15-23.

¹⁴ Kapetulu 16: Twashimutwilile hachakumwenesa chasolwele lunga uze apwile nachinoma chavyuma vyakusonekesa chamuka-kusoneka, namalunga vaze vapwile navitwa vyakupuzwisa. Chakumwenesa kana chasolola nge vangamba jaKalunga vaze navakapwa vakushishika ‘nahaluyando lwalunene’ vakiko kaha navakafunjika mifunda yakukayovoka.—Mateu 24:21; Ezeke. 9:1-11.

15-18. Mwomwo ika twatela kutwalaho lika kusolola zangi, kaha natuyisolola ngachilihi?

¹⁵ Kapetulu 4: Twashimutwilile hachakumwenesa chize chasolwele vaka-kuyoya vawana. Chakumwenesa kana chatunangwile  vilinga vyakulipwila atwama navyo Yehova, kaha zangi yikiko yapwa yayilemu chikuma havilinga vyenyi. Kachi nge natusololanga zangi muhanjikiso namuvilinga vyetu, kaha natusolola ngwetu Yehova ikiye Kalunga ketu.—Ezeke. 1:5-14; Yowa. 1, 4:8.

¹⁶ Kapetulu 6 na 11: Twashimutwilile hali vaka-kulama vakufwana nge Ezekele vaze atongwele Yehova mwomwo yakuzanga vatu jenyi. Hakuwana nge Kalunga ikiye zangi, ngocho kasaka mutu numba umwe akanonge omu mwakanongesa kano kaye kaSatanako. (Petu. 2, 3:9) Tweji kusololanga zangi hakutesamo mulimo vatuhana wakukafwa vaka-kulama vamakumbi ano.—Ezeke. 33:1-9.

¹⁷ Kapetulu 17 na 18: Twalinangwile nge, Yehova atachikiza ngwenyi vatu vavavulu kaveshi kuketavila mazu enyi akuvahuhumunako kaha navakafwila kunongesa vatu jenyi vakushishika. Zangi nayikalingisa Yehova akakinge vatu jenyi omu “Ngonge wakulifuchi lyaMangonge,” mwakalukuka vangamba jaKalunga vakushishika. Kuzanga vatu chikiko cheji kutulingisanga twambulile vatu vavavulu ngwetu Yehova mwakanongesa vatu vaze veji kuyanjisanga vatu jenyi.—Ezeke. 38:1–39:20; Teso. 2, 1:6, 7.

¹⁸ Kapetulu 19, 20 na 21: Twashimutwilile hachakumwenesa chize chasolwele kalwiji wameya akuyoya nachakumwenesa chakupula lifuchi. Vyakumwenesa kana vyasolola zangi atwama nayo Kalunga hali vatu jenyi. Vyasolola nawa zangi yayinene atwama nayo Kalunga hakutuma Mwanenyi atufwile mangana atukonekele jishili jetu nakukapwa jino nakuyoya chamwenemwene mwavana vaKalunga. Jila yimwe natusolwelamo ngwetu twazanga vakwetu shina kuvalweza vyuma vyamwaza vize Yehova nawahishila vatu vaze vafwelela muli Mwanenyi.—Ezeke. 45:1-7; 47:1–48:35; Kuso. 21:1-4; 22:17.

19. Vyuma muka mwakalinga Yesu omu mwakayula myaka 1,000? (Talenu lipwata lyakwamba ngwavo “Cheseko Chamakumishilo.”)

¹⁹ Muchiyulo chaYesu chamyaka 1,000, Yesu mwakasangula vafu nakufumisako “kufwa chize chapwa muka-kole” wetu. (Koli. 1, 15:26; Mako 5:38-42; Vili. 24:15) Kufuma vene hakulikanga chaAlama naEve, vatu vanahichinga muukalu wakulisezaseza. Oloze omu Yesu mwakasangula vatu vaze vafwa, navakayoya kanawa ngana muze chapwile hakavanga shimbu kanda Alama naEve valinge shili. Mwakafumisako vyuma vyosena vize vyaneha kuviza, najijita, namisongo nazala kuhichila mundando yakusokola. Mwakatukafwa nawa tukakumise shili yize twaswana kuli Alama. (Loma 5:18, 19) Yesu mwakenyeka “milimo yaLiyavolo” yosena. (Yowa. 1, 3:8) Kaha vyuma muka navikakavangizaho?

20. Uno Yesu navaze 144,000 navakasolola ngachilihi muchima wakulinyisa? Lumbununenu. (Talenu muvwimbimbi wakulivanga.)

²⁰ Tangenu Wavaka-Kolinde 1, 15:24-28. Omu vatu vosena navakapwa vakukupuka mwosena, kaha nawa nge kaye kosena kanapu Palachise ngana muze ajinyine Kalunga hakavanga, Yesu navaze 144,000 mwakayula navo navakasolola muchima wakulinyisa. Navakahana Wangana kuli Yehova. Navakalisuula kuhana  wata kuli Yehova uze vanapunga nawo hamyaka 1,000. Vyuma vyosena vize Wangana naukatesamo navikapwangako haya myaka yosena.

21, 22. (a) Kaye nakakapwa ngachilihi hanyima yamyaka 1,000? (b) Mwomwo ika Yehova mwakafumishila Satana navandemone jenyi muwina wakuzeneka kukuma?

²¹ Yehova jino mwakalinga chuma chakulipwila chize nachikasolola nge afwelela chikuma vatu jenyi vahamavu. Mwakalovola Satana navandemone jenyi muwina wakuzeneka kukuma muze vavahakile hamyaka 1,000. (Tangenu Kusoloka 20:1-3.) Navakawana vatu vakulihandununa navaze vapwilenga mukaye kakuhuka. Shimbu kanda Alamangetone, vatu vavavulu vavahungumwishilenga kuli Satana, ngocho kavapwile vakulinungako mwomwo yachijindo nakulimona ulumbi. (Kuso. 12:9) Oloze omu nayikakuma yize myaka 1,000, vatu vosena navakapwa vakulinunga nakuzachila Yehova. Mavu osena nawakapwa Palachise.

 ²² Mwomwo ika Yehova mwakafumishila Satana navandemone jenyi muwina nakuvaneha mukaye kamwaza ngana? Mwomwo vatu vavavulu vaze navakapwako hanyima yamyaka 1,000 navakapwa vaze kanda vahitengaho lyehi muvyeseko nakupwa vakushishika kuli Yehova. Vavavulu vafwile chakuzeneka kutachikiza Yehova kaha navakasanguka nakutwama muPalachise. Halwola kana Yehova mwakavahana kuyoya, nakuvahana nawa vyuma vyasakiwa mukuyoya navyuma vyakushipilitu. Navakapwa hamukana wavatu vavilinga vyamwaza, vaze vazanga Yehova nakumuzachila. Satana mwakavangijikila vatu vaze navakasanguka ngana muze avangijikilile Yopa. Mwakavamba ngwenyi vali nakuzachila Kalunga mwomwo yavyuma vyamwaza ali nakuvalingila. (Yopa 1:9, 10) Shikaho shimbu kanda Yehova asoneke majina etu mumukanda wakuyoya, mwakavangila kutuhana lwola mangana tukasolole hatoma ngwetu twashishika kuli ikiye hakupwa Setu kaha nawa Mwata wetu.—Kuso. 20:12, 15.

23. Chuma muka atela kukalisakwila mutu himutu?

 ²³ Satana navakamuhana kalwola kakandende mangana akahungumwise vatu vakalitwamine kuzachila Kalunga. Uno mwakavahungumwisa ngachilihi? Vatu vosena navakahita mucheseko ngana chize ahichilemo Alama naEve. Mutu himutu atela kukalisakwila ivene kwononoka jindongi jaYehova nakukundwiza chiyulo chenyi nakumulemesa chipwe kulikanga kuchiyulo chenyi nakukundwiza Satana.

24. Mwomwo yika vatu vaze navakalikanga vavavulukila ngwavo Ngonge naMangonge?

²⁴ Tangenu Kusoloka 20:7-10. Vatu vaze navakalikanga omu nayikakuma yize myaka 1,000 navakavavuluka ngwavo, Ngonge naMangonge. Vatu kana navakapwa navilinga ngana vize vapwile navyo vatu vakulikanga vaze apolofwetele Ezekele ngwenyi navakafumbukila vatu jaKalunga haluyando lwalunene. Vatu kana vavavuluka ngwavo “Ngonge wakulifuchi lyaMangonge,” kwimanyinako vaka-mafuchi vaze navakafumbukila chiyulo chaYehova. (Ezekele 38:2) Chochimwe nawa navatu vaze navakalikanga hanyima yachiyulo chaKulishitu chamyaka 1,000, vavavuluka ngwavo “vaka-mafuchi.” Jino mwomwo ika vavavulukila ngwavo vaka-mafuchi? Mwomwo muChiyulo chaYesu chaMyaka 1,000, kamweshi kukapwa kulihandununa chamafuchiko, vatu vosena navakononoka kufulumende yimwe yize yapwa Wangana  waKalunga. Kaye kosena nakakapwa lifuchi limwe kaha. Shikaho ou upolofweto hakuvuluka ava vaka-kulikanga ngwavo, Ngonge naMangonge nakuvamba ngwavo, “vaka-mafuchi,” chasolola nge Satana mwakalingisa vatu jaKalunga vamwe vakanehe vihandwa hali vakwavo. Vatu kaveshi kukavashinjila vakakundwize Satanako. Mutu himutu mwakalisakwila ivene kukundwiza Satana chipwe chiku.

25, 26. Vatu vangahi navakakundwiza Satana, kaha vyuma muka navikasoloka kuli vakiko?

²⁵ Uno vatu vangahi navakakundwiza Satana? Vatu vaze navakalikanga vavavuluka ngwavo navakapwa nge “usekeseke wakungenge yakalungalwiji.” Mazu kana kawasolola nge vatu vaze navakalikanga navakapwa vavavulu chikumako. Tunatachikiza ngachilihi ngocho? Tuchishimutwilenu halushiko luze Kalunga ashikile Apalahama. Yehova ambile ngwenyi, vaka-tanga yaApalahama navakapwa nge “usekeseke wakungenge yakalungalwiji.” (Kupu. 22:17, 18) Kaha vatu vaze vejile nakupwa vaka-tanga yaApalahama vapwile kaha 144,001. (Ngale. 3:16, 29) Numba tuhu vatu kana vapwa vavavulu oloze vapwa vavandende hakuvesekesa kuvatu vamukaye kosena. Chochimwe nawa navatu vaze navakakundwiza Satana vanahase kukapwa vavavulu vene, oloze keshi vavavulu chikumako. Ava vaka-kulikanga kaveshi kukahasa kunongesa vangamba jaYehova vakushishikako.

 ²⁶ Vatu vaze navakalikanga navakavanongesela hamwe naSatana navandemone jenyi kaha kaveshi kukapwako chekako. Oloze vyuma vyavipi vize valingilenga vikiko kaha navakanukanga vatu.—Kuso. 20:10.

27-29. Vyuma muka navakalivwisa kuwaha vatu vaze navakahita mucheseko chamakumishilo?

²⁷ Vatu vaze navakahita mucheseko chamakumishilo, majina avo navakawasoneka “mumukanda wakuyoya.” (Kuso. 20:15) Kufumaho, vana vaYehova vakushishika vosena navakalemesanga kaha Yehova.

²⁸ Achishinganyekenu havyuma kanevi vyamwaza natukalivwisa kuwaha. Natukazatanga milimo yamwaza yakutusuulwisa nakulikata namasepa vamwaza. Enu navaka-tanga yenu kamweshi kukayanda chekako. Kaha nawa katweshi kukasakiwa ndando yakusokola yaYesu numba tukapwe vatoma kumeso aYehovako. Mutu himutu mwakapwa sepa lyaKalunga. Chuma chachilemu chikuma nachikapwako shina kulemesa Yehova mujila yakukupuka mwilu nahamavu. Echi nachikasolola nge kulemesa chamuchano vanachikindulwisa chikupu.

²⁹ Kutala namukapwako mangana mukamone vyuma kanevi tahi? Munahase kukapwako kachi nge namutwalaho lika kukavangiza vishina vyavilemu vitatu vyamumukanda waEzekele. Vishina kana shina, kulemesa Yehova namuchima wetu wosena, kutwalaho lika kupwa vakulinunga hakulemesa Kalunga  wamuchano nakuzanga vakwetu. Muupolofweto waEzekele vavulukamo chishina chize chapwa chachilemu chikuma. Chishina muka?

30, 31. Mazu akwamba ngwavo “navakatachikiza ngwavo ami yami Yehova” nawakalumbununa ika (a) kuli vaka-kole jaKalunga? (b) kuli vatu jaKalunga?

³⁰ Mazu akwamba ngwavo “navakatachikiza ngwavo ami yami Yehova” vawavuluka kuswakumwe mumukanda waEzekele. (Ezeke. 6:10; 39:28) Kuli vaka-kole jaKalunga, mazu kana nawakalumbununa jita nakuvanongesa. Navakatachikiza jino ngwavo Yehova kwatwama. Navakejiva mwalumbunukila lijina lyenyi lyakwamba ngwavo “Eji Kulingisanga Vyuma Kupwako.” “Yehova wamayongomena” mwakapwa “muka-kwasa jita wangolo,” kaha mwakazunga navo. (Kulo. 15:3; Samwe. 1, 17:45) Shikaho navakatachikiza muchano uvene walijina lyenyi wakuvuluka nge, kakweshi chuma chize nachimuhonesa kutesamo vyuma ajinako.

³¹ Kuli vatu jaKalunga, mazu akwamba ngwavo “navakatachikiza ngwavo ami yami Yehova,” nawakalumbununa kutwama mukuunda nakulivwisa kuwaha kuyoya. Yehova mwakatulingisa tukapwe ngana muze ajinyine hakavanga. Ajinyine ngwenyi vana venyi vatela kulondezeza vilinga vyenyi mujila yakukupuka. (Kupu. 1:26) Twatachikiza ngwetu Yehova apwa Setu wazangi, kaha nawa Kafunga wakutukinga. Kalinwaha apwenga Mwangana uze mwafungulula vaka-kole jetu. Shimbu kanda likumbi kana lihete, twatela kwanuka aze mazu ahanjikile Ezekele. Hanjikiso yetu navilinga vyetu vyatela kusolola hakumbi hakumbi ngwetu twatachikiza Yehova, nomu lyalumbunukila lijina lyenyi. Kaha katweshi kukalizakaminako omu navakecha jipeho jakunongesa jakuneha luyando lwalunene, oloze natukandula mitwe yetu helu mwomwo natukatachikiza ngwetu kuyovoka chetu chili hakamwihi. (Luka 21:28) Shimbu tuli nakuvandamina vyuma kana, tutwalenuho lika kukafwa vatu vatachikize Yehova Kalunga nakumuzanga mwomwo ikiye kaha atamo kumulemesa.—Ezeke. 28:26.