1, 2. (a) Ezekele vamulwezele ika kuli Yehova? (b) Vihula muka natushimutwila?

EZEKELE amwene chakumwenesa chize chamulingishile ashinganyeke havyuma vyasolokele kunyima mumakumbi aMose naYoshuwa. Halwola kana, Yehova alwezele Mose mwahichile jingiza jaLifuchi lyaLushiko. Kahomu mwahichile myaka, alwezele nawa Yoshuwa omu vatela kukalipulila lifuchi kana kweseka namiyachi yavaIsalele. (Kula. 34:1-15; Yoshu. 13:7; 22:4, 9) Jino kuheta mumwaka wa 593 B.C.E., Yehova alwezele Ezekele navakwavo vafunge vapulile miyachi yavaIsalele jingalila muLifuchi lyaLushiko.—Ezeke. 45:1; 47:14; 48:29.

² Uno Ezekele navakwavo vafunge valinangwile vyuma muka kuchakumwenesa kana? Chakumwenesa kana nachikolezeza ngachilihi vangamba jaKalunga makumbi ano? Uno echi chakumwenesa nachikatesamo chikuma kulutwe tahi?

3, 4. (a) Jishiko muka jiwana vavuluka muchakumwenesa chamakumishilo vamwenesele Ezekele? (b) Lushiko muka natushimutwila mukapetulu uno?

³ Chakumwenesa chamakumishilo vamwenesele Ezekele vachisoneka mutupetulu 9 vamakumishilo vamumukanda waEzekele. (Ezeke. 40:1–48:35) Mwapwile jishiko jiwana jize  jakafwile vafunge vafwelele ngwavo navakakinduluka kulifuchi lyavo lyaIsalele. Uno jishiko muka vene eji? Lwatete, kulemesa chamuchano navakachikindulwisa cheka. Lwamuchivali, vapilishitu navakulwane navakatwaminyina vatu vaze navakakinduluka mulifuchi. Lwamuchitatu, vatu vosena vaze navakakinduluka mulifuchi navakavahana chihela chakutwamaho. Kaha lwamuchiwana, Yehova mwakapwanga hamwe navatu jenyi.

⁴ Mukapetulu 13 na 14 twashimutwilile hajishiko jivali jakulivanga nomu jateselemo. Oloze mukapetulu uno natushimutwila halushiko lwamuchitatu luze lwahanjika hakuswana lifuchi. Kaha mukapetulu mwakavangizaho natukashimutwila halushiko luze lwahanjika hali Yehova omu mwakapwanga hamwe navatu jenyi.—Ezeke. 47:13-21; 48:1-7, 23-29.

5, 6. (a) Muchakumwenesa vamwenesele Ezekele, “ngalila” muka yize vamulwezele kuhana vatu? (Talenu muvwimbimbi wakulivanga.) (b) Mwomwo ika vamumweneselele echi chakumwenesa chakupula jingiza?

⁵ Tangenu Ezekele 47:14. Yehova alwekesele Ezekele muchakumwenesa ngalila yize yejile nakupwa nge “milemba yaEtene.” (Ezeke. 36:35) Kufumaho Yehova ahanjikile ngwenyi: “Eyi yikiko ngalila namukahana miyachi yavaIsalele 12 kupwa uswana wavo.” (Ezeke. 47:13) “Ngalila” yize vamulwezele kuhana, yapwile lifuchi lize vejile nakutwama vaIsalele vaze vafumine muufunge. Yehova alwezele Ezekele munona munona omu mwatela kukahita jingiza jalifuchi kana kweseka namazu atwama hachisoneka chaEzekele 47:15-21.

⁶ Mwomwo ika vamumweneselele echi chakumwenesa chakupula jingiza? Vamumweneselecho mangana chimukafwe hamwe kaha navakwavo vafunge vafwelele ngwavo navakakinduluka kulifuchi lyavo. Twafwelela ngwetu ava vafunge vevwile kuwaha chikuma hakuvafwelelesa vyuma kanevi kuli Yehova. Uno vangamba jaKalunga vakushikulu, vatambwile lifuchi lize vavashikile kuvahana kupwa uswana wavo tahi? Eyo valitambwile.

7. (a) Chuma muka chaputukile kusoloka mu 537 B.C.E., kaha chatwanukisa ika? (b) Chihula muka natuvangila kushimutwila?

⁷ VaIsalele vaze vapwile muufunge vakindulukile kulifuchi lyavo mumwaka wa 537 B.C.E., omu mwahichile myaka 56 kufuma haze vamwenesele Ezekele chakumwenesa. Chuma kanechi chakulipwila chasolokele kunyima chili nakutwanukisa chuma chamwaza chinakusoloka kuli vangamba jaKalunga makumbi ano. Mwomwo navakiko vavahana jingalila. Mujila muka? Yehova etavishile vangamba jenyi vengile mulifuchi lyakushipilitu kupwa uswana wavo. Kutachikiza omu vakindulwishile Lifuchi lyaLushiko kushikulu, chinahase kutunangula vyavivulu kutalisa kulifuchi lyakushipilitu lize vatwamamo vangamba jaKalunga vamumakumbi ano. Shimbu kanda tushimutwile havishina kana, tuvangilenu chatete kukumbulula  chihula chino, “Mwomwo ika natukukulwila ngwetu lifuchi lyakushipilitu kulyatwama makumbi ano?”

8. (a) Yehova ashishishile muyachi wavaIsalele wachisemwa namuyachi muka? (b) Uno lifuchi lyakushipilitu chipwe ngwetu palachise yakushipilitu yapwa yika? (c) Uno eli lifuchi lyakushipilitu lyejile nakupwako mwaka uka, kaha veya vatwamamo?

⁸ Muchakumwenesa chakulivanga chize vamwenesele Ezekele, Yehova asolwele ngwenyi upolofweto uze wahanjikile vyakukindulwisa vaIsalele naukatesamo chikuma omu ‘ngamba yenyi Ndavichi,’ Yesu Kulishitu mwakaputuka kuyula mwaMwangana mwilu. (Ezeke. 37:24) Chuma kana chasolokele mu 1914 C.E. Halwola kana, muyachi wavaIsalele wachisemwa vaushishile kuli vaIsalele vakushipilitu vaze vapwa vaka-Kulishitu vawavisa. (Tangenu Mateu 21:43; WaPetulu 1, 2:9.) Shikaho Yehova kakanyine kaha muyachi waIsalele wachisemwako, oloze nalifuchi lyavo alishishishile nalifuchi lyakushipilitu chipwe ngwetu palachise yakushipilitu. (Isa. 66:8) Ngana muze twalinangulanga muKapetulu 17, lifuchi lyakushipilitu lyapwa chihela chakushipilitu chize chapwa chakukingiwa, muze vaka-Kulishitu vawavisa vasalaho  vanalemeselanga Yehova kuputuka vene mu 1919. (Talenu lipwata 9B, lyakwamba ngwavo, “Vyuma Muka Vyasolokele Mu 1919?”) Mukuhita chalwola, “mikoko veka” vaze vatwama nalutalililo lwakuyoyela hamavu vaputukile kutwama mulifuchi kaneli lyakushipilitu. (Yowa. 10:16) Numba tuhu palachise yakushipilitu yili nakutohwelako lika makumbi ano, oloze vyuma vyamwaza vyavivulu natukalivwisavyo kuwaha hanyima yaAlamangetone.

9. Jindongi muka jize Yehova ahanyine vatu vakavangize hakupula lifuchi?

⁹ Tangenu Ezekele 48:1, 28. Omu Yehova alwezele Ezekele muze mwahichile jingiza jalifuchi, amulwezele jino omu vatela kukalipulila. Avalwezele vapangile jingalila jakweseka hamwe kumiyachi 12 yavaIsalele kupwa uswana wavo, kuputuka namuyachi waNdane uze wapwililile kunote nakukumishila namuyachi waNgate uze wapwililile kusulo. Yize miyachi 12 vayipulilile misuka yakuya muusuku kufuma kungiza yize yapwililile kumututuko walifuchi, nakutwala kumulauko kuze kwapwililile Kalungalwiji Wamunene chipwe ngwetu Kalungalwiji waMendetelenya.—Ezeke. 47:20.

10. Echi chakumwenesa chafwelelesele vafunge vyuma muka?

¹⁰ Uno echi chakumwenesa chakafwile ngachilihi vafunge? Vyuma vize avalwezele Ezekele vyalingishile vakwavo vafunge vatachikize ngwavo navakavapangila jingalila jakuteseka hamwe mulifuchi. Chize chakumwenesa chasolwele nge yize miyachi 12 navakayipangila jingalila, kahechi chavakafwile vatachikize ngwavo mutu himutu mwakatambula ngalila kupwa uswana wenyi. Naumwe wauchi navakahona kuhana ngalila.

11. Vyuma muka natulinangula kuchakumwenesa chize vamwenesele Ezekele chakupula jingalila? (Talenu lipwata lyakwamba ngwavo, “Kupula Lifuchi.”)

¹¹ Vyuma muka natulinangula kuchakumwenesa kana? MuLifuchi lyaLushiko kamwapwile kaha jingalila javapilishitu, navaLevi, navamyatako oloze mwapwile nawa jingalila javatu vosena vakumiyachi 12. (Ezeke. 45:4, 5, 7, 8) Namakumbi ano nawa, mupalachise yakushipilitu kamwatwama kaha jingalila javaka-Kulishitu vawavisa vaze vachili hano hamavu, navaze ‘vamuliyongomena lyalinene’ vali nakututwaminyinako, oloze mwatwama nawa najingalila javatu vosena vaze vatwama muliyongomena lyalinene. * (Kuso. 7:9) Chamokomoko namilimo mwatwama nayo muliuka lyaYehova, tuvosena tukwechi chihela chakukingiwa, kaha nawa tukwechi milimo yayilemu mulifuchi lyakushipilitu. Chikupu vene awa mazu atela kutwivwisa kuwaha chikuma.

12, 13. Yehova ahanyine jindongi muka kutalisa kukupangila jingalila kumiyachi?

¹² Ezekele atela alikomokelele chikuma hajindongi jize amulwezele Yehova kutalisa kukupangila vatu jingalila, mwomwo jalihandunwine najize ahanyine Mose. Tushimutwilenu hajindongi jivali. Lundongi lumwe lwahanjikile halifuchi, kaha lukwavo havatu.

 ¹³ Lifuchi. Mose vamulwezele ahane ngalila yayinene kumiyachi yize yapwile yayinene. (Kula. 26:52-54) Oloze Ezekele vamulwezele ahane miyachi yosena “vyazano vyakuteseka hamwe [“mutu himutu ngana mwandumbwenyi,” kwinyikila chamwishi].” (Ezeke. 47:14) Shikaho jingalila jize apangililile miyachi 12, kufuma kungiza yakunote nakuheta kungiza yakusulo jatelelele kweseka hamwe. VaIsalele vosena vavahanyine jingalila jakweseka hamwe nakulivwisa kuwaha vyuma vyamwaza vyapwile muLifuchi lyaLushiko.

14. Jindongi jize Yehova alwezele Ezekele kutalisa kuli vamwiza jalihandunwine ngachilihi najize vavuluka muJishimbi jaMose?

¹⁴ Vatu. Jishimbi jize vahanyine Mose jakingile vamwiza nakuvalingisa vazane mukulemesa Yehova, oloze kavavahanyine jingalila mulifuchiko. (Levi 19:33, 34) Oloze jindongi jize Yehova alwezele Ezekele kajalifwanyine naJishimbi jize vahanyine Moseko. Yehova alwezele Ezekele ngwenyi: “Mukahana vamwiza uswana kweshokwo navakatwama mujingalila jamiyachi yenu.” Lushimbi kana lwasolwele hatoma nge Yehova afumishile chihandwa chapwile hali “vaIsalele” navamwiza vaze vatwaminenga navo. (Ezeke. 47:22, 23) Lifuchi lize vamwenesele Ezekele muchakumwenesa, amwenemo vatu vanatwame mukuunda nakulemesela hamwe Kalunga mukulinunga.—Levi 25:23.

15. Chuma muka natulinangula kujindongi jize Yehova alwezele Ezekele kutalisa kuvatu nalifuchi?

 ¹⁵ Eji jindongi jivali valwezele Ezekele kutalisa kulifuchi navatu jakafwile vafunge vatachikize ngwavo Yehova mwakavahana jingalila jakweseka hamwe numba vapwa vaIsalele chipwe vamwiza vaze valemeselenga Yehova. (Ezela 8:20; Nehe. 3:26; 7:6, 25; Isa. 56:3, 8) Eji jindongi javakolezezele vatachikize ngwavo Yehova amona vangamba jenyi vosena kupwa vavalemu. (Tangenu Hangai 2:7.) Makumbi ano, tuvosena twetavila ngwetu Yehova atumona kupwa vavalemu numba tukwechi lutalililo lwakukayoyela mwilu chipwe hano hamavu.

16, 17. (a) Natunganyala ngachilihi kujindongi jize Yehova alwezele Ezekele kutalisa kuvatu nalifuchi? (b) Chuma muka natukashimutwila mukapetulu nakavangizaho?

¹⁶ Natunganyala ngachilihi kujindongi jize Yehova alwezele Ezekele kutalisa kuvatu nalifuchi? Jindongi kana jatwanukisa nge vangamba jaKalunga vosena vapwa vavalemu kaha nawa vapwa vakulinunga mukaye kosena. Yehova amona vatu vosena kupwa vavalemu. Twatela kulihulisa ngwetu: ‘Kutala ngwamona vatu vosena kupwa vavalemu ngana muze avamona Yehova tahi? Kutala ngweji kuvumbikanga vandumbwetu vosena chamokomoko nachisemwa, nachiyoyelo chavo nokwo vafuma tahi?’ (Loma 12:10) Twawahilila chikuma hakuwana nge Yehova eji kutukafwanga tuvosena tulivwise kuwaha kuyoyela mupalachise yakushipilitu muze tweji kumuzachilanga milimo yajila namichima yetu yosena, nakunganyala kuvyuma vyamwaza eji kutuhananga.—Ngale. 3:26-29; Kuso. 7:9.

¹⁷ Tushimutwilenu jino halushiko lwamuchiwana luze ahanjikile Yehova muli echi chakumwenesa chamakumishilo vamwenesele Ezekele. Lushiko kana lwavulukile nge Yehova mwakapwa hamwe navafunge. Vyuma muka natulinangula kulushiko kana? Chihula kana navakachikumbulula mukapetulu nakavangizaho.