1-3. (a) Chuma muka mwakalinga Yehova mwomwo yakwivwa “matoto”? (Talenu muvwimbimbi wakulivanga.) (b) Vyuma muka jino natushimutwila?

ACHISHINGANYEKENU malunga, namapwevo, navana vanemana nakwimba mwaso waWangana. Kaha kufumaho kalama mwalomba kuli Yehova namuchima wenyi wosena mangana avakinge. Vatu vosena muchikungulwilo vanafwelela chikupu ngwavo Yehova mwavazakama, oloze vali nakusakiwa mazu akuvakolezeza. Kaha navevwa vyema vyavatu vali nakuzunga jita haweluka. Vatu vosena muchikungulwilo navatachikiza ngwavo jita yaAlamangetone yinaputuka.—Kuso. 16:14, 16.

² Numba tuhu Yehova ‘mwakevwa matoto chikuma’ hajita yaAlamangetone, oloze keshi kukanongesa vatu chamunongeselako. (Tangenu Ezekele 38:18.) Yehova keshi kukakwachila matoto liswalale umwe chipwe lifuchi limweko, oloze mwakakwachila matoto vatu vavavulu mukaye kosena. Halikumbi lyajita yaAlamangetone, vatu vaze mwakajiha Yehova “navakalumbama kufuma kusongo yimwe yamavu mbwe nakusongo yikwavo.”—Yele. 25:29, 33.

³ Vyuma muka navikalingisa Yehova, uze apwa Kalunga wazangi, “wakeke nakutetela, wakushipwokela kukwata utenu” akevwe “matoto chikuma” nakujiha vatu? (Kulo. 34:6; Yowa. 1, 4:16) Kukumbulula  chihula kana nachituvendejeka nakutulingisa tupwenga vakumika nakuzata natwima mulimo wakwambulula mujimbu wamwaza.

4, 5. Matoto aYehova alihandununa ngachilihi namatoto avatu?

⁴ Twatela kutachikiza ngwetu matoto aYehova kawapwa ngana avatu vakuhona kukupukako. Kakavulu nge mutu ali namatoto chikuma, eji kulinganga vyuma vyavipi. Chakutalilaho, Kena mwana Alama watwatwa “evwile matoto chikuma” mwomwo Yehova akanyine wana wenyi nakwitavila waAvele. Chuma muka chafuminemo? Kena ajihile songo yenyi uze apwile wakwoloka. (Kupu. 4:3-8; Hepe. 11:4) Achishinganyekenu nawa hali Ndavichi lunga uze vevwilile kuwaha kuli Yehova. (Vili. 13:22) Numba tuhu Ndavichi apwile mutu wamwenemwene, oloze hasalile hahandende nakuvulumuna mulonga waunene omu vamulwezele ngwavo lunga waluheto Navale namutukanyina kumwe navangamba jenyi. Ngocho evwile matoto chikuma, kaha ikiye namaswalale jenyi ‘valiswelelele jipoko jamikwale’ mangana vayenga nakujiha Navale hamwe kaha namalunga vosena vamuzuvo yenyi. Oloze Avingayile pwevo lyaNavale, alembelelele Ndavichi namaswalale jenyi vahone kulinga sambanjinga. (Samwe. 1, 25:9-14, 32, 33) Echi chikiko chalingishile Yehova alweze Yakova asoneke ngwenyi: “Utenu wamutu kaweshi kuneha kwoloka chaKalungako.”—Yako. 1:20.

⁵ Yehova kapwa ngana mwavatuko mwomwo ikiye eji kuhonesanga matoto kaha nawa tunahase kutachikiza ovyo vinamulingisa apihilile. Eji kulinganga lika vyuma vyakwoloka numba tuhu nevu matoto chikuma. Omu eji kulwanga navaka-kole jenyi, eji ‘kunongesanga vaka-kuhuka keshi vaka-kwolokako.’ (Kupu. 18:22-25) Kaha nawa Yehova eji kwivwanga matoto mwomwo yavyuma vyakuhenga. Tushimutwilenu havyuma vivali vyeji kumulingisanga evwenga matoto navishina natulinangulako.

6. Yehova eji kulinganga ngachilihi nge lijina lyenyi vanalisaula?

⁶ Chuma chatete: Nge lijina lyaYehova vanalisaula. Vatu vosena vaze valivuluka kupwa vangamba jaYehova oloze veji kulinganga vyuma vyavipi nakusaula lijina lyenyi, veji kulingisanga Yehova akwate matoto. (Ezeke. 36:23) Ngana muze twashimutwilanga mutupetulu vanafumuho, vyuma vyavipi valingilenga vaIsalele vyapihishile lijina lyaYehova. Chikupu vene vyuma valingilenga vyalingishilenga Yehova akwate matoto. Oloze kechelelele matoto amulingise azangamise vatu jenyi mujila yayipiko. Avazangamishilenga mujila yakutamo. (Yele. 30:11) Kachi nge nalingi lyehi vyuma najinyi, kaha eji kutulisanga matoto enyi, keshi kulama cheka kokoko.—Samu 103:9.

7, 8. Vyuma muka natulinangula kuli vaIsalele omu Yehova avazangamishile?

⁷ Vishina natulinangulako: Nayetu tunahase kulinangulako vyuma vimwe kuli vaIsalele omu vavazangamishilenga kuli Yehova. Ngana mwavaIsalele, nayetu twatokwa hakutuvulukila lijina lyaYehova. Twapwa tuVinjiho jaYehova. (Isa. 43:10) Hanjikiso yetu navilinga vyetu  vyeji kusololanga Kalunga uze tweji kuzachilanga. Shikaho katwatela kulinganga vyuma vyavipi nakusawisa lijina lyaYehovako. Vilinga kanevi vyavipi navikalingisa Yehova akevwe matoto nakufwila kunongesa vatu vakuhuka mangana akajilike lijina lyenyi.—Hepe. 3:13, 15; Petu. 2, 2:1, 2.

⁸ Uno kutachikiza ngwetu Yehova nahase ‘kwivwa matoto chikuma’ chatela kutulingisa tuhone kupandama kuli ikiye tahi? Nduma. Twatachikiza ngwetu Yehova eji kutalililanga vatu chikoki nakuvakonekela. (Isa. 55:7; Loma 2:4) Oloze twatachikiza nawa ngwetu eji kuzangamisanga vatu nge vanapihisa. Echi cheji kutulingisanga tumuvumbike chikuma hakutachikiza ngwetu eji kukwachilanga matoto vatu vaze veji kutwalangaho lika kulinga shili, kaha eji kufumisanga vatu kana muli vatu jenyi. (Koli. 1, 5:11-13) Yehova atulweza vyuma vize vyeji kumulingisanga evwenga matoto. Shikaho twatela kulihenda kuvyuma vyavipi vize navimulingisa evwenga matoto.—Yowa. 3:36; Loma 1:26-32; Yako. 4:8.

9, 10. Vyuma muka eji kulinganga Yehova nge vatu jenyi vakushishika vanavafumbukila? Hanenu vyakutalilaho.

⁹ Chuma cheji kumulingisanga evwenga matoto. Nge vangamba jaYehova vakushishika vanavafumbukila. Yehova eji kwivwanga matoto nge vaka-kole navafumbukila vangamba jenyi vakushishika. Chakutalilaho, omu vaIsalele vafumine muEjipitu, Fwalo namaswalale jenyi vakavangijile vaIsalele vaze vapwile kungenge yaKalungalwiji Uchila. Oloze omu maswalale vapwile nakuhangasana vaIsalele vaze vapwile nakuhita mukachi kakalungalwiji hamavu aumu, Yehova asokwele tufumbo kumatemba avo ajita nakuvachitwila mukachi kakalungalwiji. Mbimbiliya ngwayo: “Kakwapwile numba umwe ayovokeleko.” (Kulo. 14:11-28) Yehova akwachilile vaEjipitu matoto mwomwo yakufwila kusolwela vatu jenyi ‘zangi yakwilila.’—Tangenu Kulovoka 15:9-13.

¹⁰ Namumakumbi aMwangana Hezekiya, Yehova ayowele vatu jenyi mwomwo yazangi yenyi. VaAsulya vaze vapwile namaswalale vangolo hamakumbi aze valizangile kulukuka nganda yaYelusalema. Vangamba jaYehova vakushishika vavevwishile woma hakuvalweza ngwavo navavahaka muchingombela mangana vavanongese. (Vamya. 2, 18:27) Oloze Yehova atumine kangelo kenyi umwe, kaha ajihile maswalale vakuheta ku 185,000 ufuku umwe kaha. (Vamya. 2, 19:34, 35) Achishinganyekenu vyuma vyasolokele muchilombo chavaAsulya omu kwachele. Mwapwile makunga, najikepwe najipoko jamikwale hanga vyalumbaminanga. Kakwapwile nou embile luneta mangana ahindule maswalaleko. Muchilombo mwapwile mwahwilichi mwomwo maswalale vosena vafwile.

11. Vyakutalilaho vyamuVisoneka vize vyasolola omu Yehova nakinginga vatu jenyi vyeji kutuvendejekanga ngachilihi?

¹¹ Vishina natulinangulako: Vyakutalilaho kanevi vyakusolola omu Yehova eji kwivwanga nge vangamba jenyi vanavalukuka, vyatela kulingisa vaka-kole jetu vatachikize ngwavo, nge Yehova mwevwa matoto, kaha nachipwa “chuma chakwivwisa woma  kuholokela mumavoko aKalunga ou ayoya.” (Hepe. 10:31) Oloze etu vangamba jenyi vyeji kutuvendejekanga nakutukafwa tupwenga vakumika. Cheji kutuvendejekanga chikuma hakutachikiza ngwetu Satana keshi kukafukilako. Kalinwomu “kashimbu kakandende” kaze vamuhana kuyula kano kaye kakume. (Kuso. 12:12) Shikaho twatela kuzachila Yehova nakumika hakutachikiza ngwetu kakweshi mutu chipwe liuka chipwe fulumende vinahase kutuhonesa kulinga mwaya muchima waKalungako. (Tangenu Samu 118:6-9.) Kaposetolo Paulu asonekele mazu akutukolezeza ngwenyi: “Kachi nge Kalunga ali kuli etu, kaha iyaze mwatwimanyina nakole?”—Loma 8:31.

12. Vyuma muka navikalingisa Yehova akevwe matoto halwola lwaluyando lwalunene?

¹² Haluyando lwalunene, Yehova mwakatukinga ngana muze akingile vaIsalele omu vavalukukile kuli vaEjipitu nomu nawa akingile vaYuta omu vavahakile muchingombela kuli vaAsulya. Omu vaka-kole jetu navakasaka kutunongesa, Yehova mwakevwa matoto chikuma mwomwo yakutuzanga chikuma. Vaze navakafwila kutulukuka, nachikapwa kwijiva nge vanakukwata hakatutu kahaliso lyaYehova. Hahaze vene Yehova mwakakinga vangamba jenyi nakunongesa  vaka-kole jenyi. (Zeka. 2:8, 9) Mwakanongesa vatu vavavulu chikuma. Vaka-kole jaKalunga navakatachikiza chikupu ngwavo chinatemo kuvanongesa. Mwomwo ika?

13. Yehova nahuhumunanga vatu havyuma muka?

¹³ Yehova apwa “wakushipwokela kukwata utenu,” kaha nahuhumunanga vatu hakuvalweza ngwenyi mwakanongesa vatu vaze veji kulikanganga kuli ikiye navaze veji kuzungisanga vatu jenyi. (Kulo. 34:6, 7) Yehova atuminenga vapolofweto vakufwana nge, Yelemiya, naEzekele, naNdanyele, naKulishitu Yesu, nakaposetolo Petulu, naPaulu naYowano mangana vahuhumune vatu vyajita yayinene.—Talenu lipwata lyakwamba ngwavo, “Yehova Eji Kuhuhumunanga Vatu Vyakwiza chaJita Yayinene.”

14, 15. Mulimo muka nazate Yehova, kaha mwomwo ika?

¹⁴ Yehova asonekele eyi mijimbu muMazu enyi, Mbimbiliya. Kaha nawa ajinyine ngwenyi Mbimbiliya vakayalumune mumalimi amavulu nakuyipangila kuvatu mukaye kosena kuhambakana kala mukanda. Yehova nasakula liyongomena lyavatu vakulisuula mukaye kosena  mangana vakafwe vakwavo kulinangula mwakupwila nausoko wakukola naikiye nakuhuhumuna nawa vatu vyakwiza ‘chalikumbi lyenyi lyalinene.’ (Zefwa. 1:14; Samu 2:10-12; 110:3) Yehova nakafwenga vatu jenyi valumune mikanda yahanjika haMbimbiliya mumalimi amavulu, nakuvakafwa nawa vazate jola jajivulu mumulimo wakwambulula mwaka himwaka nakulweza vatu jishiko jenyi namazu akuhuhumuna atwama muMazu enyi.

¹⁵ Yehova alwezele vatu jenyi vazate mulimo kanou “mwomwo kazanga mutu numba umwe akanongeko, oloze azanga vosena vapihilile nakwalumuka.” (Petu. 2, 3:9) Twatokwa chikuma kwimanyinako Yehova uze apwa Kalunga wazangi nakutalilila chikoki. Kaha nawa twawahilila chikuma hakwazana mumulimo wakutandakanyisa mujimbu wenyi. Oloze chaluvinda, vatu vaze navahona kwivwilila kuvyuma vali nakuvahuhumuna kuli Yehova, kaveshi kukapwa cheka nalwola lwakupihilila nakwalumukako.

16, 17. Kutala Yehova asakula lyehi likumbi mwakaneha jita yamakumishilo tahi? Lumbununenu.

¹⁶ Yehova atongola likumbi mwakaneha jita yamakumishilo. Atachikiza nalwola luze vatu jenyi navakavalukuka kuli vaka-kole.  (Mateu 24:36) Uno Yehova atachikiza ngachilihi vyalwola luze vaka-kole navakalukuka vangamba jenyi?

¹⁷ Ngana muze twashimutwilanga mukapetulu nafumuho, Yehova ahanjikile kuli Ngonge ngwenyi: ‘Nangukakuhaka malovo mujimbangi jove.’ Yehova mwakalingisa vaka-mafuchi vakaputuke kufumbukila vatu jenyi. (Ezeke. 38:4) Oloze echi kacheshi nakulumbununa nge Yehova ikiye mwakasangumuna ndombo kanako. Kaha nawa kacheshi nakulumbununa nge mwakavafumisa lisesa lyakulisakwila vyakulinga lize vatwama nalyo mangana vakalukuke vatu jenyiko. Oloze chasolola nge, Yehova eji kumonanga vyuma vili mumichima yavatu nakutachikiza nawa vyuma navakalinga vaka-kole jenyi.—Samu 94:11; Isa. 46:9, 10; Yele. 17:10.

18. Chuma muka nachikalingisa vatu vakalwe jita naKalunga Wangolo Josena?

¹⁸ Jino kachi nge Yehova keshi kukaputuka jita kanako chipwe kulingisa vaka-kole jenyi valwenga jita, kaha chuma muka nachikazondola vatu vakalwe jita naKalunga Wangolo Josena? Chuma chimwe shina, pamo halwola kana navakashinganyeka ngwavo kakwatwama Kalungako chipwe ngwavo Kalunga keshi kuhasa kukinga vatuko. Pamo navakashinganyeka ngocho mwomwo halwola kana  hivananongesa lyehi kwitava chamakuli chosena hamavu hosena. Shikaho vanahase kukashinganyeka ngwavo kachi nge Kalunga kwatwama kachi nakingi mauka kana awa anapunga nakumuzachila. Oloze kaveshi kukatachikiza ngwavo Kalunga ikiye achihakile mumichima yavo mangana vanongese kwitava chamakuli chosenako.—Kuso. 17:16, 17.

19. Chuma muka chinahase kukasoloka hanyima yakunongesa kwitava chamakuli chosena?

¹⁹ Kufuma halwola luze navakanongesa kwitava chamakuli, Yehova mwakalweza vangamba jenyi vakavilike mujimbu wakusopesa. Mumukanda waKusoloka, ou mujimbu vaufwanyisa kuvula yamalolwa, kaha lilolwa limwe kaha lyalema kafwe jikilongalamu 20. (Kuso. 16:21, kwinyikila chamwishi) Mujimbu kana atela naukahanjika hakunongesa viyulo vyamapolitiki nakufumisako kusekasana chamuno mukaye. Ou mujimbu naukevwisa kupihya vaka-kole, kahechi nachikalingisa vakasaule naKalunga. Atela chuma kana chikiko nachikalingisa vaka-mafuchi vakafwile jino kulalisa vatu jaKalunga vosena. Navakashinganyeka ngwavo katweshi naumwe wakutukingako, kaha nawa chachashi chikuma kutunongesa. Echi nachikapwa hikulimbenja chachinene chikuma.

20, 21. Uno Ngonge apwa iya, kaha vyuma muka navikasoloka kuli ikiye?

²⁰ Ngana muze twamonanga muKapetulu 17, Ezekele azachishile vulukiso yakwamba ngwenyi, “Ngonge wakulifuchi lyaMangonge,” kulumbununa mafuchi aze nawakalifutula nakutufumbukila. (Ezeke. 38:2) Numba tuhu navakalifutula, oloze kulinunga kana nachikapwa chakatando kakandende kaha, mwomwo navakatwalaho lika kulizungisa, nakupwa namuchima wakulivwimba nakulitala hamafuchi. Echi nachikalingisa Yehova akalingise poko yamukwale yamutu himutu ‘yikajihe ndumbwenyi.’ (Ezeke. 38:21) Echi kacheshi nakulumbununa nge vaka-mafuchi navakalinongesa mwavomwavoko, oloze Yehova ikiye mwakavanongesa.

²¹ Shimbu kanda jita yaAlamangetone, vaka-kole jetu navakamona chinjikizo chaMwanamutu, chize pamo nachikapwa chuma chakukomwesa chakusolola ngolo atwama najo Yehova naYesu. Navakamona vyuma vize navikavalingisa vakalizuzukile nawoma. Yesu ambile ngwenyi: “Vatu navakalezumuka hakwivwa woma nahakutalilila nawa vyuma vize navikeza hamavu hosena.” (Luka 21:25-27) Navakatachikiza jino ngwavo valimbenjele chikuma hakufumbukila vatu jaYehova. Echi nachikavalingisa vakatachikize kanawa Tengi, Yehova wamayongomena uze apwa kapitau kamaswalale. (Samu 46:6-11; Ezeke. 38:23) Chakuzeneka kukakasana, Yehova mwakazachisa vyuma vyakutenga navyuma vyakukomwesa mangana akanongese vaka-kole jenyi nakukinga vangamba jenyi vakushishika.—Tangenu WaPetulu 2, 2:9.

22, 23. Veya navakakinga vatu jaKalunga, kaha navakevwa ngachilihi hakuzata mulimo kana?

²² Yesu mwakatetekela lizavu lyenyi lyamaswalale mangana vakalukuke vaka-kole jaKalunga nakukinga vaze vazanga Yehova nakumuzachila. Shinganyekenu nawa omu navakevwa vawavisa halwola  kanelu. Shimbu kanda Alamangetone yiputuke, vasalaho vawavisa vaze navakapwa hano hamavu navakavasangula nakuya mwilu mangana vosena vaze 144,000 vakapwe hamwe naYesu hakulwa jita. (Kuso. 17:12-14) Twafwelela ngwetu, vawavisa vavavulu navakapwa hivanatungu lyehi usepa wakukola namikoko veka omu vazachililenga hamwe. Halwola kanelu jino vawavisa navakapwa nangolo jakukinga vosena vaze vavakafwilenga omu vapwile nakuhita muvyeseko.—Mateu 25:31-40.

²³ Vangelo navakiko navakapwa hamukana wamaswalale vamwilu vaze mwakeza navo Yesu. (Teso. 2, 1:7; Kuso. 19:14) Vangelo vakafwile Yesu hakufumisa Satana hamwe kaha navandemone jenyi mwilu. (Kuso. 12:7-9) Kaha nawa vanapunga nakumukafwa hakuzata mulimo wakukungulula vatu vaze vasaka kulemesa Yehova. (Kuso. 14:6, 7) Chikupu vene nachikapwa chakutamo Yehova kuzachisa vangelo vakakinge vatu kanava vakushishika. Chuma chachilemu chikumanyi shina, maswalale jaYehova vosena navakawahilila chikuma hakuvahana lisesa lyakuzata mulimo wakulingisa lijina lyaYehova kupwa lyajila hakunongesa vaka-kole jenyi vosena.—Mateu 6:9, 10.

24. Uno vatu vamuliyongomena lyalinene navakevwa ngachilihi?

²⁴ Vatu vamuliyongomena lyalinene, kaveshi kukalizakamina chipwe kwivwa womako, mwomwo navakavakinga kumaswalale vangolo. Chikupu vene mikoko veka, ‘navakemana nakwandula mitwe yavo, mwomwo kuyovoka chavo nachikapandama kwakamwihi.’ (Luka 21:28) Shikaho shimbu kanda likumbi lyaYehova lizenga, nachipwa chachilemu chikuma kuzata nangolo nakukafwa vatu vavavulu vatachikize Setu Yehova uze apwa Kalunga wazangi nakutetela kaha nawa uze afwila kukinga vatu jenyi.—Tangenu Zefwanyiya 2:2, 3.

25. Vyuma muka natukashimutwila mukapetulu nakavangizaho?

²⁵ Omu vatu veji kwasanga jita, vyuma vyeji kufumangamo hanyima yajita kana vyapwa vyavipi chikuma. Oloze hanyima yajita yaAlamangetone nakukapwa kuunda nakuwahilila. Jino vyuma muka navikasoloka omu matoto aYehova nawakakuma, nomu maswalale jenyi navakakindulwisa jipoko javo jamikwale muvindalo vyajo, kaha nawa jita nawa yinakumu? Kapetulu nakavangizaho natukashimutwila havyuma kanevi vyamwaza navikasoloka kulutwe.