Mukanda waKufuma kuLizavu Lyakutwaminyina
Kuli Enu Mwazanga Yehova:
Kwapwile kukunguluka chachinene mu 1971 chize chapwile namutwe wakwamba ngwavo: “Divine Name” (Lijina lyaKalunga). Vatu vapwile kukukunguluka kana vawahililile chikuma omu vatambwile mikanda yayihya. Vatu vahanjikile hali yize mikanda ngwavo “mikanda yakulipwila chikuma” mwomwo kavashinganyekele ngwavo navatambula mikanda kanako. Ndumbwetu umwe ahanjikile kutalisa kumukanda umwe hali yize mikanda valowele ngwenyi: “Chinapu hikutokwa chikuma kutulweza vyuma vyamwaza navikasoloka kulutwe.” Uno apwile nakuvuluka mukanda muka? Apwile nakuvuluka mukanda wakwamba ngwavo, “The Nations Shall Know That I Am Jehovah”—How? (Mujila Muka ‘Vaka-Mafuchi Navakatachikiza Ngwavo Ami Yami Yehova’?) Mwomwo yika ou mukanda walingishile vatu vawahilile? Mwomwo valumwineko ulumbunwiso waupolofweto wamumukanda waEzekele. Upolofweto kana wahanjika havyuma navikasoloka kulutwe vize vatalilila vatu vosena.
Kufuma haze valowele mukanda wakwamba ngwavo, ‘Know Jehovah’ (‘Tachikizenu Yehova’), vatu jaKalunga vapwile kafwe jimiliyoni 1.5, oloze makumbi ano vanahambakana jimiliyoni 8. (Isa. 60:22) Ava vangamba jaYehova veji kuhanjikanga malimi akuhambakana 900. (Zeka. 8:23) Vangamba jaYehova vavavulu kanda valinangulengaho lyehi mukanda uze walumbununa kanawa upolofweto waEzekele.
Hakuwana nge musana unakututuka lika, shikaho kufuma vene mu 1971, tunalumunangako vyuma vyamuMbimbiliya twafwelela. (Vishi. 4:18) Mu 1985 twaputukile kutachikiza jino kanawa omu “mikoko veka” vavavulukila kwoloka hakupwa masepa jaKalunga. (Yowa. 10:16; Loma 5:18; Yako. 2:23) Kaha mu 1995 twatachikijile jino ngwetu, kusopesa ‘vapembe’ ‘namikoko’ nachikapwako ‘haluyando lwalunene.’ (Mateu 24:21; 25:31, 32) Vyuma vyosena evi tunalumunako vyatulingishile tukekese cheka haupolofweto wamumukanda waEzekele.
“Ove mwanamutu, tala kanawa nakutengeleka matwitwi ove wivwilile kuvyuma vyosena nangukulweza, mwomwo evi vikiko vanakunehela kuno.”—EZEKELE 40:4
Mumyaka yakalinwomu musana unamunyikanga lika. Achishinganyekenu havishina vize tunalinangula havifwanyisa vize ahanjikile Yesu. Vishina vyavivulu vinatulumbunukila jino kanawa. Vifwanyisa vyavivulu ahanjikile Yesu vyahanjika havyuma vize navikasoloka haluyando lwalunene. Chochimwe nawa jila valumbunwinyinemo upolofweto umwe wamumukanda waEzekele vanayalumunako. Upolofweto umwe shina uze wahanjika hali Ngonge wakuMangonge (kapetulu 38 na 39), namulimo walunga uze apwile nachinoma chavyuma vyakusonekesa chamuka-kusoneka (kapetulu 9), nachinema chavifuwa vyaumu nauze wakununga vitondo vivali (kapetulu 37). Vyuma vyosena vize vasonekele mumukanda wakwamba ngwavo, ‘Tachikizenu Yehova’ vanavyalumunako kweseka nakwivwishisa chachihya.
Echi chikiko chinalingisanga vandumbwetu vavavulu vahulise ngwavo, “Mwaka uka natukatambula mukanda wauhya uze naukalumunako ulumbunwiso wauhya waupolofweto waEzekele?” Shikaho mukanda wauhya wakwamba ngwavo, Kukindulwisa Kulemesa chaMuchano ukiko uli naulumbunwiso wauhya waupolofweto waEzekele. Omu namutanga tupetulu 22 vamukanda kana, nakushinganyeka havyakutalilaho vyamwaza vilimo, namulikomokela chikuma havyuma vanahehwojola hakusoneka ou mukanda. Twalombele chikuma mangana tutachikize ovyo Yehova atusonekelele mukanda waEzekele. Twashinganyekele nawa havihula vyakufwana nge: Vyuma muka vasoneka mumukanda waEzekele vize valinangwileko vatu vamumakumbi enyi, navize natulinangulako etu makumbi ano? Upolofweto muka uze wahanjika havyuma vize navikasoloka kulutwe? Uno twatela kutonda vyuma novyo vyemanyinako muupolofweto waEzekele tahi? Kukumbulula vihula kanevi nachitukafwa twivwishise mukanda waEzekele.
Omu namutanga mukanda waEzekele wosena namulikomokela chikuma hakumona omu chapwa chihanda chaliuka lyaYehova lyamwilu. Kaha nawa munahase kulikomokela chikuma hajindongi jize Yehova ahakako mangana vatu jenyi vahano hamavu navana venyi vamwilu vahase kumulemesa mujila yize etavila. Mukanda uno naumikafwa chikuma mangana mumone kulema chavyuma vize Yehova nalingila vatu jenyi navize mwakavalingila kulutwe. Muno mumukanda muli vishina vivali vyavilemu vize vanavuluka chikuma. Chatete, hakusaka twivwise Yehova kuwaha, twatela kumutachikiza nakwitavila ngwetu apwa Mwata Wakulitulaho mwilu nahamavu. Chamuchivali, twatela kulemesa Yehova mujila yize etavila hakukavangiza jindongi jenyi mukuyoya chetu.
Twafwelela chikupu ngwetu uno mukanda naumikafwa mufwile kulemesa Yehova mujila yize nayivumbika lijina lyenyi lize lyapwa lyajila. Kaha nawa naumikafwa mangana mutalilile kulwola luze vaka-mafuchi osena navakatachikiza ngwavo ikiye Yehova.—Ezeke. 36:23; 38:23.
Yehova uze apwa Setu wazangi amikafwe mwivwishise mukanda wamuMbimbiliya waEzekele.
Yetu vandumbwenu,
Lizavu lyaKutwaminyina lyaVinjiho jaYehova
