LIPWATA 14A
Vishina Natulinangula kuChakumwenesa chaTembele Vamwenesele Ezekele
Navazezula Helu Kulemesa chaMuchano Nakuchikinga
Tembele yize vasolwele muchakumwenesa vayizezwile ‘hapili yayisuku chikuma’ (1). Uno nayetu twazezula kulemesa chamuchano hakuchikundwiza chikuma mukuyoya chetu tahi?
Chipango chachinene (2), chize chajingilikile chihela chatembele chosena (3), chatwanukisa nge kakwatela kwitavisa kala chuma chipihise kulemesa chamuchanoko. Kachi nge vatu vavakanyisa kuneha vyuma nakusekasanyina hachihela chakulemesela Kalunga, kahanyi nachipwa chakuhenga chikuma kuli ngamba yaYehova kupwa navilinga vyavipi.—Ezeke. 42:20.
Vyuma Vyamwaza Mwakatulingila Yehova
Kalwiji afumine muchihela chajila chatembele, kaha atohwele nakulingisa vyuma vyosena viyoye nakuneha nawa wilo hamavu (4). Vyuma kanevi vyamwaza natukavishimutwila muKapetulu 19.
Jindongi Jojimwe Vatela Kukavangiza Vosena
Vikolo vyavisuku vyakuchipango chakusali (5) navize vyakuchipango chamukachi (9) vyeji kutwanukisanga nge vosena vaze veji kukundwizanga kulemesa chamuchano, vatela kukavangiza jindongi jaYehova jakwoloka. Kaha nawa vikolo vyakuchipango chakusali nachize chamukachi vyapwile vyakulifwana. Echi chatukafwa tutachikize ngwetu jindongi jaYehova jakwoloka japwa jojimwe kuli vatu jenyi vosena chamokomoko namilimo veji kuzatanga muliuka lyenyi.
Kulila Hamwe Vyakulya naYehova
Tupete vakulila vyakulya (8) vatwanukisa nge kushikulu, omu vatu jaKalunga vanehelanga wana wavimuna vakuvatula mutembele, vambachilengaho umwe nakulila hamwe navakwavo, kusolola nge vapwile nakulya hamwe naYehova. Oloze kachapwa ngocho mutembele yakushipilitu muze veji kumulemeselanga vaka-Kulishitu makumbi anoko, mwomwo mutembele kana vahana lyehi “chimuna wakuvatula umwe.” (Hepe. 10:12) Chipwe ngocho, tweji kuhananga Kalunga chimuna wakuvatula wakumwalisa.—Hepe. 13:15.
Vyuma Atushika Yehova Vyapwa vyaMuchano
Munahase kulikomokela hakushinganyeka omu vapiminyinyinemo tembele yize vamwenesele Ezekele. Oloze chatunangula chishina chimwe chachilemu. Chakwamba nge, vyuma ajina Yehova kutalisa kukulemesa chamuchano vyeji kutesangamo ngana muze vapimine tembele munona munona. Numba tuhu Ezekele kamwene vatu muchakumwenesako, oloze asonekele mazu aYehova akuhuhumuna vapilishitu, navamyata navatu jenyi vosena. Vangamba jaKalunga vosena vatela kukavangizanga jindongi jaYehova jakwoloka.
