Upolofweto wamuMbimbiliya namijimbu yakunyima vyatukafwa tukukulule ngwetu Yesu aputukile kuyula mwilu mu 1914. Mumwaka kana mukiko aputukile makumbi akukuminyina akaye kaSatana. Vyuma muka alingile Yesu omu aputukile kuyula? Uno hahaze vene hakiko asokwele vatu jenyi muufunge muMbavilone Yayinene tahi? Kutala atongwele “ndungo wakushishika wakuzangama” mu 1914 nakuputuka mulimo wakwaha tahi?—Mateu 24:45.

Nduma. Anukenu ngwenu kaposetolo Petulu vamuhwiminyinyine asoneke ngwenyi kusopesa ‘nachikaputukila muzuvo yaKalunga.’ (Petu. 1, 4:17) Kaha nawa kapolofweto Malaki ahanjikilile chimweza vyalwola luze Yehova mwakeza kuzuvo yenyi yakumulemesela, hamwe kaha “[na]muluwa walushiko,” uze apwa Mwanenyi. (Mala. 3:1-5) Lwola kana nalukapwa lwakweseka nakutomesa. Uno mijimbu yakunyima yalitombola naupolofweto kanou tahi?

 Eyo. Kufuma mumwaka wa 1914 nakuheta kumaputukilo amwaka wa 1919, Vinjiho jaYehova vaze vavulukilenga halwola kana ngwavo Vaka-Kulinangula Mbimbiliya, vahichile muukalu waunene chikuma. Mwomwo lwapwile lwola lwakuveseka nakuvatomesa. Mu 1914 vangamba jaKalunga vavavulu hano hamavu vevwile kupihya omu kukuma chakano kaye vatalililile chahonene kwiza. Vevwile chikuma kupihya mu 1916 omu afwile Charles T. Russell, uze apwile nakutwaminyina vatu jaKalunga. Vatu vamwe vaze vazangile chikuma Ndumbwetu Charles T. Russell kavazangile Joseph F. Rutherford uze aputukile kutwaminyina vatu jaKalunga omu afwile Russell. Kaha kuheta mu 1917, muliuka mwepukile vihandwa vize vyasakile kuhandununa liuka lyosena. Jino kuheta mu 1918, vatwamina vamukwitava vavangijikilile Ndumbwetu Rutherford navakwavo 7, ngocho vavatwalile mukamenga. Chikota chetu chamuBrooklyn vachisokele. Chikupu vene chuma kana chasolwele hatoma nge vatu jaKalunga vapwile lika muufunge muMbavilone Yayinene.

Kaha vyuma muka vyasolokele mu 1919? Vyuma vyavivulu vyalumukile chikuma. Kumaputukilo amwaka kana, Rutherford namasepa jenyi vavafumishile mukamenga. Kaha hahaze vene vaputukile kuzata cheka milimo yavo. Nakushimbula chiku, vawahishile vyuma mangana kupwenga kukunguluka chachinene, kaha nawa vaputukile kwalumuna mukanda wauhya uze vavulukilenga ngwavo The Golden Age, (vanakuvuluka jino ngwavo Tonenu!) Ou mukanda vausonekele mangana uvakafwe kwambulula mujimbu wamwaza. Kaha nawa vatongwelenga kalama muchikungulwilo hichikungulwilo mangana atwaminyine mulimo wamuwande. Mumwaka woumwe vasonekele mukanda uze vavulukilenga ngwavo the Bulletin (vanakuvuluka jino ngwavo Mukanda waKukunguluka chaChiyoyelo naMulimo waVaka-Kulishitu) mangana uvakafwe kutwaminyina mulimo wakwambulula.

Jino ika yasolokele? Kulishitu asokwele jino vatu jenyi muufunge muMbavilone Yayinene. Kaha atongwele ndungo yenyi wakushishika wakuzangama. Mulimo wakwaha watwalileho lika. Kufuma vene mumwaka wa 1919, mulimo wakwaha unazovoloka chikuma.