1, 2. Mwomwo ika lwola lumwe Yehova azachishililenga vyuma vyakumona nameso hakulweza vangamba jenyi muchano wamuMbimbiliya?

ACHISHINGANYEKENU visemi navana vavo vanatwame kumesa nakulinangula Mbimbiliya. Chisemi walunga mwafunjika mivwimbimbi nakutalisa vana venyi mangana avakafwe kwivwishisa muchano wamuMbimbiliya vali nakulinangula. Vana venyi navawahilila chikuma nakuputuka kukumbulula, kaha nachilingisa sevo amone ngwenyi navahete hamichima. Hakuzachisa mivwimbimbi, mwakafwa vana venyi mangana vatachikize vyuma vyavivulu hali Yehova vize kachi kaveshi kuhasa kwivwishisako kweseka namyaka vali nayo.

² Chochimwe nawa, Yehova nazachisanga vyuma vyakumona nameso mangana akafwe vangamba jenyi vevwishise vyuma vyamwilu vize vahona kumona. Chakutalilaho, Yehova alilumbunwine kanawa omu apwa hakumwenesa Ezekele mivwimbimbi yakwivwisa woma. Mukapetulu nafumuho twashimutwilanga hamuvwimbimbi umwe. Shikaho tushimutwilenu jino hamuvwimbimbi ukwavo uze wapwile muchakumwenesa mangana tutachikize omu walumbunukila nomu nautukafwa tupandame kuli Yehova.

3. (a) Kweseka namukanda waEzekele 1:4, 5, vyuma muka amwene Ezekele muchakumwenesa? (Talenu muvwimbimbi wakulivanga.) (b) Ezekele alumbunwine ngachilihi vyuma vyakukomwesa amwene?

³ Tangenu Ezekele 1:4, 5. Ezekele amwene vamwe “vakufwana nge vaka-kuyoya vawana” vaze vafwanyine nge vangelo, navatu natunyama. Achitalenu omu Ezekele alumbunwine kanawa vyuma amwene. Asonekele ngwenyi amwene “vamwe vakufwana nge” vaka-kuyoya vawana. Omu namutanga chakumwenesa chatwama mumukanda waEzekele kapetulu 1, namuwana nge ou kapolofweto azachishile mazu akufwana nge “chasolokele nge,” “kwijiva nge,” “chafwanyine nge.” (Ezeke. 1:13, 24, 26) Kweseka namazu azachishile Ezekele, chasoloka nge atachikijile ngwenyi vyuma amwene vyapwile kaha vifwanyisa chipwe mivwimbimbi yavyuma vyatwama mwilu vize katwamonako.

4. (a) Uno Ezekele evwile woma hakumona chize chakumwenesa tahi? (b) Vyuma muka Ezekele atachikijile hali vakeluve?

⁴ Ezekele atela evwile woma wavivumo evwile navyuma vize amwene. Vaze vaka-kuyoya vawana vasolokele nge “makala akakahya,” kaha vatambukilenga washiwashi “nge kuvesa chamiveso.” Chivumo chamavava avo chevwakanyine “nge chivumo chameya amavulu,” kaha jishindo javo jevwakanyine “nge vyema vyalizavu lyamaswalale.” (Ezeke. 1:13, 14, 24-28; talenu lipwata lyakwamba ngwavo, “Ngwatalile Vaka-Kuyoya.”) Muchakumwenesa chikwavo, Ezekele avulukile jino ava vaka-kuyoya vawana ngwenyi “vakeluve” chipwe ngwetu vangelo vangolo. (Ezeke. 10:2) Hakuwana nge Ezekele vamulelele mutanga yavapilishitu, atela atachikijile ngwenyi vakeluve vapwa valuwa jaKalunga kaha nawa veji kuzachilanga kwakamwihi naikiye.—Miji. 1, 28:18; Samu 18:10.

5. (a) Mujila muka vihanga viwana vyavakeluve vyasolola nge Yehova atwama naupahu nangolo? (b) Uno ulumbunwiso walijina lyaKalunga vausolola ngachilihi muchakumwenesa vamwenesele Ezekele? (Talenu kwinyikila chamwishi.)

⁵ Tangenu Ezekele 1:6, 10. Ezekele amwene nawa keluve hikeluve ali navihanga viwana, chihanga chamutu, nechi chandumba, nechi changombe nechi changonga. Ezekele hakumona vize vihanga viwana vyavaze vakeluve, atela alinangwile ngwenyi Yehova atwama nangolo naupahu. Mujila muka? Chihanga hichihanga chasolwele ukelenga, nangolo naulemu. Ndumba apwa kanyama wakuhamuka, kaha ngombe apwa chimuna wakulipwila, kaha ngonga nawa apwa kajila wangolo, kaha mutu apwa wakulipwila muvyuma vyosena hano hamavu, ikiye eji kuyulanga vyuma vyakutenga vyosena vyahamavu. (Samu 8:4-6) Chipwe ngocho, muchakumwenesa chize vamwenesele Ezekele, amwene vaze vaka-kuyoya vangolo vawana vali mwishi yalitanda lyaYehova uze apwa Mwata Wakulitulaho havyuma vyosena. Chakumwenesa kana chasolola nge Yehova nahase kuzachisa vyuma vyakutenga mangana atesemo vyuma ajina. * Chapundu vene, ngana muze ahanjikile muka-kwimba jisamu, “ukelenga [waYehova] watwama helu lyamelu namavu.”—Samu 148:13.

6. Vyuma muka vyakafwile Ezekele atachikize ngwenyi vize vihanga viwana vyemanyinyineko vyuma vimwe?

 ⁶ Omu mwahichile lwola kufuma haze Ezekele amwene chize chakumwenesa, atela ashinganyekele ngwenyi vangamba jaKalunga kunyima vazachishilenga tunyama kwimanyinako vyuma vimwe. Chakutalilaho, Yakova afwanyishile mwanenyi Yuta kundumba, kaha mwanenyi Mbenjamine kukangunge. (Kupu. 49:9, 27) Mwomwo ika? Mwomwo ashinganyekele ngwenyi kulutwe ava malunga navana vavo navakasolola vilinga ngana vize atwama navyo ndumba nakangunge. Shikaho vyakutalilaho kanevi vyamuvisoneka atela vyalingishile Ezekele amone ngwenyi vize vihanga vyavakeluve vyemanyinyineko vilinga vyakulipwila. Vilinga muka?

7, 8. Uno vize vihanga viwana vyavakeluve vyemanyinako vilinga muka?

⁷ Uno vaka-kusoneka Mbimbiliya vaze vapwileko shimbu kanda Ezekele, vafwanyishile ndumba, nangombe nangonga kuvilinga muka? Vasonekele ngwavo: “Vingazule vaze vakwechi michima nge yavandumba.” (Samwe. 2, 17:10; Vishi. 28:1) ‘Ngonga eji kutukanga helu’ kaha “meso enyi eji kumwenanga vyuma hahasuku.” (Yopa 39:27, 29) “Kuze kuli vangombe vavakuji vyakulya vyeji kuvulanga.” (Vishi. 14:4) Kweseka navisoneka kana, mikanda yetu yinalumbununanga ngwayo, chihanga chandumba chemanyinako chiyulo, chihanga changonga chemanyinako mangana, kaha changombe chemanyinako ngolo.

⁸ Nyi ngachilihi ‘chihanga chize chafwanyine nge mutu’? (Ezeke. 10:14) Chize chihanga chatalisa kuvilinga vize tunyama kaveshi kuhasa kusololako shina kaha vatu vaze vatenga muchifwanyisa chaKalunga. (Kupu. 1:27) Vilinga vyakulipwila vatwama navyo vatu shina vize Kalunga ahanjikile mulushimbi luze ahanyine vatu jenyi lwakwamba ngwenyi: “Zangenunga Yehova Kalunga kenu namichima yenu yosena,” nalwakwamba ngwenyi: “Zangenunga vakwenu nganomu mwalizanga enu vavene.” (Lushi. 6:5; Levi 19:18) Kachi nge natusolwelanga vakwetu zangi yamuchano hakukavangizanga jishimbi kaneji, kaha natusolola zangi yize atwama nayo Yehova. Kaposetolo Yowano asonekele ngwenyi: “Etu twazanga vakwetu, mwomwo ikiye alivangile kutuzanga etu.” (Yowa. 1, 4:8, 19) Ngocho ‘chihanga chize chafwanyine nge mutu’ chemanyinako zangi.

9. Uno vize vihanga vyavakeluve vyemanyinako vilinga vyeya?

⁹ Uno iya atwama navilinga kanevi? Hakuwana nge vaze vakeluve amwene vakiko vapwile navihanga kana, ngocho vana vaYehova vamwilu vakushishika vosena vakiko vatwama navilinga kana, mwomwo vaze vakeluve vemanyinako vana vaKalunga vosena vamwilu. (Kuso. 5:11) Hakuwana nge Yehova ikiye atengele ava vakeluve, ngocho vilinga kana vyafuma kuli ikiye. (Samu 36:9) Shikaho vize vihanga vyavakeluve vyemanyinako vilinga atwama navyo Yehova. (Yopa 37:23; Samu 99:4; Vishi. 2:6; Mika 7:18) Mujijila muka Yehova eji kusolwelangamo vilinga kana?

10, 11. Mujijila muka tuli nakunganyala kuvilinga vyakulipwila atwama navyo Yehova?

 ¹⁰ Chiyulo. Hakuwana nge Yehova “azanga chiyulo,” ngocho “keshi kutala vatu kumesoko.” (Samu 37:28; Lushi. 10:17) Shikaho tuvosena tunahase kupwa vangamba jenyi nakukalivwisa kuwaha vyuma vyamwaza atushika kulutwe chamokomoko nachiyoyelo chetu. Mangana. Hakuwana nge Kalunga “apwa wamangana,” ngocho atuhana mukanda uze watwama “[na]mangana amwenemwene.” (Yopa 9:4; Vishi. 2:7) Kuzachisanga jindongi jamuMbimbiliya cheji kutukafwanga tulipike naukalu wahakumbi hakumbi, nakupwa vakusuuluka mukuyoya. Ngolo. Yehova apwa Kalunga “wangolo jajinene,” kaha eji kuzachisanga shipilitu yenyi yajila mangana atuhane “ngolo jakuhambakana jize javatu.” Ngolo kana jeji kutukafwanga tumike mukala vyeseko natumona.—Nahu. 1:3; Koli. 2, 4:7; Samu 46:1.

¹¹ Zangi. Hakuwana nge Kalunga atwama “[na]zangi yakwilila,” ngocho keshi kuseza vangamba jenyi vakushishikako. (Samu 103:8; Samwe. 2, 22:26) Shikaho numba nge katweshi nakuzata kanawa milimo yaYehova ngana muze twalingilenga hakavangako, mwomwo yamisongo chipwe ushinakaji, twatela kutachikiza ngwetu Yehova eji kwanukanga milimo tunamuzachilanga nazangi tunamusolwelanga kunyima. (Hepe. 6:10) Chikupu vene tunanganyala chikuma kuvilinga vize atwama navyo Yehova vyakufwana nge chiyulo, namangana, nangolo nazangi kaha natutwalaho lika kunganyala kuvilinga kanevi vyakulipwila.

12. Kutala tunahase kutachikiza vilinga vyosena atwama navyo Yehova tahi?

¹² Twatela kutachikiza ngwetu vyuma twatachikiza havilinga vyaYehova vyapwa “vyavindende kaha kumilimo yenyi.” (Yopa 26:14) Mbimbiliya ngwayo: “Katweshi kuhasa kutachikiza ou Wangolo Josenako” mwomwo “unene wenyi kaveshi kuhasa kuuhehwojolako.” (Yopa 37:23; Samu 145:3) Ngocho katweshi kuhasa kulava vilinga atwama navyo Yehovako. (Tangenu Wavaka-Loma 11:33, 34.) Chakumwenesa vamwenesele Ezekele chasolola nge vilinga vyaKalunga vyapwa vyavivulu chikuma. (Samu 139:17, 18) Uno chuma muka vavuluka muchakumwenesa kana chize chasolola nge Kalunga atwama navilinga vyavivulu chikuma?

13, 14. Uno vize vihanga viwana vyavakeluve vyemanyinako ika, kaha mwomwo ika tunahanjikila ngocho?

¹³ Muchakumwenesa chize vamumwenesele Ezekele, amwene keluve hikeluve ali navihanga viwana. Uno echi chasolola ika? Anukenu ngwenu muMbimbiliya nambala 4 kakavulu vayizachisa kwimanyinako kuzuka mwosena. (Isa. 11:12; Mateu 24:31; Kuso. 7:1) Muchakumwenesa kana Ezekele avulukilemo nambala 4 mapapa 8. (Ezeke. 1:5-18) Natukukulula jino ngwetu ngachilihi? Ngana muze vakeluve vawana vemanyinako vaka-kuyoya vakushipilitu vosena, mukiko navihanga viwana vyavakeluve vyemanyinako vilinga vyosena atwama navyo Yehova. *

 ¹⁴ Hakusaka tutachikize ngwetu chikupu vene vize vihanga viwana vyavakeluve vyemanyinako vilinga vyosena atwama navyo Kalunga keshi vize vilinga viwana kahako, tuchishinganyekenu hachakutalilaho chatufumbo vawana vamwenesele Ezekele. Kafumbo hikafumbo apwile wakukomwesa, oloze hakuwana nge tufumbo vosena vazachililenga hamwe ngocho valingishile lize litemba litambuke. Chochimwe nawa, vihanga viwana vyavaze vaka-kuyoya vawana vyapwa vyavilemu chikuma mwomwo hakiko hazama vilinga vyakukomwesa vyosena atwama navyo Kalunga.

15. Vyuma muka alinangwile Ezekele kuchakumwenesa chatete chize vamumwenesele?

¹⁵ Muchakumwenesa chatete, Ezekele alinangwile chishina chachilemu kutalisa kuusoko apwile nawo naYehova. Chishina kana vachivuluka mumazu amaputukilo amumukanda uze asonekele ivene. Hanyima yakuhanjika ngwenyi apwile “mulifuchi lyavaKalateya,” Ezekele ahanjikile vyuma vyasolokele kuli ikiye ngwenyi: “Ngolo jaYehova jejile hali ami.” (Ezeke. 1:3) Anukenu ngwenu, Ezekele ahanjikile ngwenyi vamumwenesele chakumwenesa  omu apwile muMbavilone keshi muYelusalemako. * Jino echi chasolwele vyuma muka? Chasolwele nge numba tuhu Ezekele apwile kwakusuku naYelusalema natembele, oloze kapwile hahasuku naYehova naliuka lyenyiko. Hakuwana nge Yehova alisolwele kuli Ezekele muMbavilone, ngocho Ezekele alinangwile nge kulemesa Kalunga mujila yize etavila kachapendaminyine kuchihela apwileko. Oloze chapendaminyine hamuchima apwile nawo wakufwila kuzachila Yehova.

16. (a) Uno echi chakumwenesa vamwenesele Ezekele chatukolezeza ngachilihi? (b) Vyuma muka vyamilingisa muzachile Yehova namuchima wenu wosena?

¹⁶ Vyuma alinangwile Ezekele vyatukolezeza ngachilihi nayetu makumbi ano? Nge natuzachila Yehova namuchima wetu wosena, chamokomoko nakuchihela twatwama naukalu tuli nakumona mukuyoya, kaha Yehova mwapandama kuli yetu. (Samu 25:14; Vili. 17:27) Yehova eji kutwalangaho lika kusolwela vangamba jenyi zangi yenyi yakwilila. (Kulo. 34:6) Shikaho mwatusolwelanga lika zangi yenyi yakwilila kala kweshoko tuli. (Samu 100:5; Loma 8:35-39) Kaha nawa chakumwenesa vamwenesele Ezekele chasolola nge Yehova apwa wajila kaha nawa wangolo, shikaho chatela kutukafwa tutachikize ngwetu Yehova kaha ikiye twatela kulemesa. (Kuso. 4:9-11) Twasakwilila chikuma Yehova hakuzachisa vyakumwenesa kana mangana vitukafwe tutachikize muchano wahanjika hali ikiye nahavilinga vyenyi. Kushinganyeka chikuma havilinga vyamwaza atwama navyo Yehova cheji kutukafwanga tupandame chikuma kuli ikiye nakufwila kumwalisa, nakumuzachila namuchima wetu wosena nangolo jetu josena.—Luka 10:27.

17. Vihula muka natukashimutwila mutupetulu navakavangizaho?

¹⁷ Chaluvinda vatu vamumakumbi aEzekele, vapihishile kulemesa chamuchano. Uno vachipihishile ngachilihi? Kaha Yehova alingile vyuma muka? Vyuma muka natulinangulako nayetu makumbi ano? Vihula kanevi natukavishimutwila mutupetulu navakavangizaho.