MUCHANO wavyuma muka? Muchano wakutachikiza muvakumbulwila vihula vimwe vyavilemu vize vanahulisanga vatu. Pamo nayove walihulisaho lyehi vihula vyakufwana nganevi:

• Uno chikupu Kalunga atuzakama tahi?

• Kutala jijita nakuyanda navikakuma tahi?

• Vyuma muka vyeji kusolokanga kuli etu nge tunafu?

• Uno vafu navakasanguka tahi?

• Nangulomba ngachilihi numba Kalunga evwenga kulomba chami?

• Nanguhasa kupwa ngachilihi nguwakuwahilila mukuyoya chami?

Kulihi unahase kuwana muvakumbulwila vihula kanevi? Nge nauya kujizuvo jakulamina chipwe jakulanjishila mikanda, unahase kuwana mikanda yize vashinganyeka vatu ngwavo yinahase kukumbulula vihula kanevi. Oloze kakavulu mikanda kana yalimbalaka nayikwavo. Yeka yeji kusolokanga nge yinahase kukafwa vatu, oloze kutwala muze yeji kusekanga kaha veji kwalumunangako vyuma vimwe chipwe kusoneka yeka.

Chipwe ngocho, kwatwama mukanda umwe uze wakumbulula kanawa vihula kanevi. Ou mukanda kana ukwechi mijimbu yamuchano. Yesu Kulishitu alombele kuli Kalunga ngwenyi: “Mazu ove apwa muchano.” (Yowano 17:17) Makumbi ano twatachikiza Mazu kana kupwa Mbimbiliya. Hamafwo anakavangizaho, nauwana omu Mbimbiliya yakumbulula vihula kanevi mujila yayashi kaha nawa yakwoloka.

OVYO VATU VEJI KUHULISHILANGA CHIHULA KANA: Tuli nakuyoyela mukaye kaze kanazale naulyanyi navilinga vyeka vyavipi. Mauka akwitava amavulu anangula ngwawo kuyanda chosena tweji kumonanga chafuma kuli Kalunga.

VYUMA YANANGULA MBIMBILIYA: Kalunga keshi kuneha vyuma vyavipiko. Mukanda waYopa 34:10 wamba ngwawo: “Nachipwa chakuhenga kuli Kalunga wamuchano kulinga vyuma vyavipi, chipwe ou Wangolo Josena kulinga vyuma vyakuhenga.” Kalunga ajina kulingila vatu vyuma vyamwaza. Evi vikiko Yesu atulwezelele tulombenga ngwetu: “Ove Setu uli mwilu, . . . Wangana wove wizenga. Mwaya muchima wove mulingiwe mwilu, nahamavu nawa.” (Mateu 6:9, 10) Kalunga atuzakama chikuma, kaha evi vikiko vyamulingisa alisuule mangana atesemo vyuma vyamwaza ajina kutulingila.—Yowano 3:16.

Tanga nawa Kuputuka 1:26-28; WaYakova 1:13; naWaPetulu 1, 5:6, 7.

OVYO VATU VEJI KUHULISHILANGA CHIHULA KANA: Jijita chijitwalaho lika kujiha vatu vavavulu. Kaha nawa tuvosena tweji kuyandanga.

VYUMA YANANGULA MBIMBILIYA: Kalunga atufwelelesa ngwenyi mwakaneha kuunda hamavu hosena. Muchiyulo chaWangana waKalunga uze wapwa fulumende yamwilu, vatu “kaveshi kukalinangula cheka jitako.” Oloze ‘navakafululula jipoko javo jamikwale nakupwa matemo akulimisa.’ (Isaya 2:4) Kalunga mwakafumisako kuyanda navilinga vyavipi vyosena. Mbimbiliya yamba ngwayo: “[Kalunga] mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako. Vyuma vyakulivanga vinafumuko lyehi.”—Kusoloka 21:3, 4.

Tanga nawa Samu 37:10, 11; 46:9; naMika 4:1-4.

OVYO VATU VEJI KUHULISHILANGA CHIHULA KANA: Mauka akwitava amavulu mukaye anangula ngwawo kwatwama chuma chimwe mumujimba wamutu chize cheji kutwalangaho lika kuyoya nge mutu nafu. Vamwe vashinganyeka ngwavo vafu vanahase kulemeka vatu vavatonyi, kaha nawa ngwavo Kalunga eji kuzangamisanga vaka-kuhuka haya myaka yosena mukakahya kahelo.

VYUMA YANANGULA MBIMBILIYA: Mutu nge nafu, kaha keshi kutwalaho lika kuyoyako. Mukanda waMuka-kwambulula 9:5 wamba ngwawo: “Vafu kavatachikiza chuma numba chimweko.” Hakuwana nge vafu kaveshi kutachikiza, chipwe kwivwa, chipwe kulinga vyumako, ngocho kaveshi kuhasa kulemeka chipwe kukafwa vatu vavatonyiko.—Samu 146:3, 4.

Tanga nawa Kuputuka 3:19 naMuka-kwambulula 9:6, 10.

OVYO VATU VEJI KUHULISHILANGA CHIHULA KANA: Tuvosena twasaka kuyoya, kaha nawa twasaka kulivwisa kuwaha kutwama navatu twazanga. Evi vikiko vyatulingisa tufwile kukamona cheka vausoko namasepa jetu vaze twafwisa.

VYUMA YANANGULA MBIMBILIYA: Vatu vavavulu vaze vafwa navakasanguka. Yesu ashikile ngwenyi, ‘vosena vaze vali muvimbumbe . . . navakalovokamo.’ (Yowano 5:28, 29) Kweseka navyuma ajinyine Kalunga hakavanga, vatu vaze navakasanguka navakalivwisa kuwaha kutwama mupalachise hano hamavu. (Luka 23:43) Mupalachise kana, vatu vakushishika navakalikangula kumijimba nakukayoya haya myaka yosena. Mbimbiliya yatulweza ngwayo: “Vaka-kwoloka navakaheta mavu, kaha navakatwamangaho haya myaka yosena.”—Samu 37:29.

Tanga nawa Yopa 14:14, 15; Luka 7:11-17; naVilinga 24:15.

OVYO VATU VEJI KUHULISHILANGA CHIHULA KANA: Vatu vavavulu mumauka akwitava veji kulombanga. Oloze vavavulu veji kuhanjikanga ngwavo Kalunga keshi kukumbulula kulomba chavoko.

VYUMA YANANGULA MBIMBILIYA: Yesu atunangwile ngwenyi katwatela kuvulukanga vyuma vyovimwe hakulombako. Ambile ngwenyi: “Hakulomba, kanda namuhilukila hilukila nakuvuluka vyuma vyovimweko.” (Mateu 6:7) Nge tunakusaka Kalunga evwilile kukulomba chetu, kaha twatela kulomba mujila yize asaka. Hakusaka kulinga ngocho, twatela kutachikiza vyuma asaka Kalunga nakulomba kweseka namwaya muchima wenyi. Mukanda WaYowano 1, 5:14 walumbununa ngwawo: “Vyeshovyo natumulomba kweseka namwaya muchima wenyi, mwatwivwa.”

Tanga nawa Samu 65:2; Yowano 14:6, 14; naWaYowano 1, 3:22.

OVYO VATU VEJI KUHULISHILANGA CHIHULA KANA: Vatu vavavulu vashinganyeka ngwavo mutu kupwa wakuwahilila kuvanga apwenga wamwaza nakupwa najimbongo, nakuya fuma. Ngachize vatu vali nakufwila vyuma kanevi, oloze kaveshi nakuwahilila mukuyoya chavoko.

VYUMA YANANGULA MBIMBILIYA: Yesu avulukile vyuma vyavilemu vyeji kulingisanga mutu awahilile, ngwenyi: “Vawahilila vaze vejiva ngwavo vasaka vyuma vyakushipilitu.” (Mateu 5:3) Tunahase kupwa vakuwahilila chikuma mukuyoya nge natulya kulya chakushipilitu, kulumbununa nge twatela kulinangula muchano waKalunga navyuma ajina. Muchano kana watwama muMbimbiliya. Kutachikiza muchano kana chinahase kutukafwa twijive vyuma vyavilemu navize vyamokomoko. Nge natwitavila Mbimbiliya yitutwaminyine muvyuma natulinga, kaha natupwa vakuwahilila mukuyoya.—Luka 11:28.

Tanga nawa Vishimo 3:5, 6, 13-18 naWaChimoteu 1, 6:9, 10.

 Tunashimutwila kaha mukavatu vyuma yanangula Mbimbiliya havihula vitanu nachimwe. Uno unakusaka kutachikiza vyavivulu tahi? Nge nayove uli hakachi kavaze “vejiva ngwavo vasaka vyuma vyakushipilitu,” kaha chikupu vene musaka kulinangula vyavivulu. Pamo walihulisaho lyehi vihula vyeka vyakufwana nge evi: ‘Nge Kalunga atuzakama chikupu, kaha mwomwo ika netavishila upi nakuyanda vitwaleho lika? Vyuma muka ngwatela kulinga numba tanga yami yifukile?’ Mbimbiliya yakumbulula kanawa vihula kanevi navihula vyeka vyavivulu.

Oloze vatu vavavulu makumbi ano kavahaka muchima kukutanga Mbimbiliyako. Vayimona kupwa himukanda waunene chikuma kaha nawa waukalu kwivwishisa. Kutala unakusaka vakukafwe kuwana omu Mbimbiliya yakumbulula vihula kana tahi? Vinjiho jaYehova vakwechi vyuma vivali vize vinahase kukukafwa.

Chatete, mukanda vavuluka ngwavo Mbimbiliya Nayitunangula Vyuma Muka? vausoneka ukafwe vatu vaze vatwama navyakulinga vyavivulu chikuma mangana vatachikize vyuma yanangula Mbimbiliya havihula vyavilemu. Chamuchivali, kukunangula Mbimbiliya chakuzeneka fweto. Chinjiho chaYehova wamungalila yove nahase kukutambukilanga hembo lyove chipwe kuchihela cheka mangana mushimutwilenga Mbimbiliya chalumingo hichalumingo. Vatu vavavulu mukaye kosena vananganyala chikuma kuvanangula mujila kaneyi. Kaha vavavulu vanambenga ngwavo: “Ngunawane jino muchano!”

Evi hivyuma vyavilemu twatela kufwila kulinangula. Muchano wamuMbimbiliya weji kutukafwa tuhone kufwelela mukupanda, namuvyuma vyakutuluwanganyisa nakutukafwa nawa tuhonenga kupwa nawoma. Weji kutukafwanga nawa tupwenga nalutalililo, nakuwahilila, nakwijiva vyuma vyavilemu mukuyoya. Yesu ambile ngwenyi: “Namutachikiza muchano, kaha muchano naumilingisa kupwa vakulihehwa.”—Yowano 8:32.