Alumuna-alumuna chivumo chalizu lyove. Watela kutohwesa chivumo chalizu lyove mangana ushindakanye vishina vyavinene nakukunyula vaze vanakukwivwilila. Watela kulinga mwomumwe nahakutanga chisoneka chize chili namazu akusopesa. Kaha watela kukehesa chivumo chalizu mangana ulingise vatu vashinganyeke havyuma navikavangizaho, chipwe kusolola woma nakulizakamina vapwile nacho vatu vali mumujimbu uli nakutanga.

Alumuna-alumuna ngolo jalizu lyove. Nge chapwa chakutamo mulilimi lyenu, kaha watela kutohwesa ngolo jalizu lyove mangana usolole twima chipwe kutohwa chachuma chipwe kusuhwa chacho. Kaha nawa watela kukehesa lizu lyove hakuvuluka mazu aushona chipwe akusolola kulizakamina.

Hanjika lumbushi chipwe kulikoka. Nge uli nakuhanjika mujimbu wakuwahilila kaha watela kuhanjika washiwashi. Oloze nge uli nakuhanjika chishina chachilemu kaha hanjika chindende chindende.