CHILONGESA 01
Uno Mbimbiliya Yinahase Kukukafwa Ngachilihi?
Vatu vavavulu veji kulihulisanga vihula kutalisa kukuyoya, nakukuyanda, nakukufwa, nakuvyuma navikasoloka kulutwe. Kaha nawa twasaka kuwana mwakukumishila ukalu wakuhona jimbongo, chipwe wakuhona kupwa vakuwahilila mutanga. Mbimbiliya yinakafwe vatu vavavulu hakukumbulula vihula vyavo nakuvakafwa nawa mwakupwila nachiyoyelo chamwaza. Kutala wafwelela ngwove Mbimbiliya yinahase kukafwa vatu tahi?
1. Vihula muka vimwe vize yakumbulula Mbimbiliya?
Mbimbiliya yakumbulula vihula vino vyavilemu: Uno twafuma kulihi? Mwomwo ika tweji kuyoyelanga? Mwomwo ika vatu veji kuyanjilanga? Nge mutu nafu eji kuyanga kulihi? Nge vatu vosena vasaka kuunda, kaha mwomwo ika kwapwila jijita? Uno ano mavu navakawanongesa tahi? Kachapwa chakuhenga kuhulisa vihula kanako. Kaha nawa vyuma yakumbulula Mbimbiliya vinakafwe vatu vavavulu.
2. Uno Mbimbiliya nayitukafwa ngachilihi tupwenganga vakuwahilila?
Mbimbiliya yinahase kutukafwa chikuma. Chakutalilaho, yeji kukafwanga vatu vapwenga vakuwahilila mutanga. Yeji kutukafwanga tuwane mwakulingila nge tunahombo, nakutukafwa nawa tuzange milimo yetu twazata. Naulinangula vyuma yahanjika Mbimbiliya havihande kana omu natushimutwilanga vyuma vili mumukanda uno. Kaha naumona jino oho vyawahila “Visoneka vyosena,” [kulumbununa vyuma vyosena yahanjika Mbimbiliya].—WaChimoteu 2, 3:16.
Uno mukanda kawashishile Mbimbiliyako, oloze naukukafwa ukekese ove ivene vyuma yahanjika Mbimbiliya. Shikaho, tuli nakukukolezeza utangenga Visoneka vyosena vanenyikila mumukanda uno, nakuvyesekesa kuvyuma uli nakulinangula.
LINANGULE VYAKUJIMINYINA
Tutale omwo Mbimbiliya yinakafwe vatu, nomwo unahase kulivwisa kuwaha kuyitanga novyo nawa chapwila chachilemu kukukafwa uyivwishise.
3. Mbimbiliya yinahase kututwaminyina
Mbimbiliya yapwa nge linongo lyakutamuka chikuma. Yinahase kutukafwa tusakulenga kulinga vyuma vyakwoloka, nakutachikiza nawa vyuma navikasoloka kulutwe.
Tangenu Samu 119:105, nakushimutwila havihula vino:
-
Uno ou asonekele eyi vesi amwenenga ngachilihi Mbimbiliya?
-
Nyi ove wayimona ngachilihi?
4. Mbimbiliya yinahase kukumbulula vihula vyetu
Pwevo umwe ambile ngwenyi Mbimbiliya yakumbulwile vihula alihulishilenga hamyaka yayivulu. Talenu VINDIYO, nakushimutwila havihula vino:
-
Vihula muka apwilenga navyo ou pwevo tunatale?
-
Uno kulinangula Mbimbiliya chamukafwile ngachilihi?
Mbimbiliya kayakanyisa kuhulisa vihulako. Tangenu Mateu 7:7, nakushimutwila hachihula chino:
-
Vihula muka uli navyo vize vanahase kukumbulula muMbimbiliya?
5. Unahase kulivwisa kuwaha kutanga Mbimbiliya
Vatu vavavulu veji kulivwisanga kuwaha kutanga Mbimbiliya, kaha yili nakuvakafwa chikuma. Talenu VINDIYO, nakushimutwila havihula vino:
-
Vakweze tunatale vazanga vyakutangatanga tahi? Lumbununa.
-
Jino mwomwo ika vazangila kutanga Mbimbiliya?
Mbimbiliya yinahase kutuvendejeka, nakutukafwa tutalilile vyuma vyamwaza kulutwe. Tangenu Wavaka-Loma 15:4, nakushimutwila hachihula chino:
-
Kutala uli nakusaka kutachikiza vyavivulu havyuma vavuluka muvesi kana tahi?
6. Vatela kutukafwa numba twivwishise Mbimbiliya
Vatu vavavulu vawana nge chapwa chamwaza kupwa namutu wakuvalumbunwina vyuma vanatange muMbimbiliya. Tangenu Vilinga 8:26-31, nakushimutwila hachihula chino:
-
Chuma muka nachitukafwa twivwishise Mbimbiliya?—Tala vesi 30 na 31.
Lunga wakaEchopa asakiwile kumukafwa evwishise Visoneka. Navatu vavavulu makumbi ano vali nakuvakafwa vevwishise Mbimbiliya
VATU VAMWE NGWAVO: “Kutanga Mbimbiliya chapwa kwenyeka kaha lwola.”
-
Nyi ove ngwove ngachilihi? Kaha mwomwo ika?
CHISHINA UNALINANGULA
Mbimbiliya yeji kukafwanga vatu mukuyoya chavo, nakukumbulula vihula vyavo vyavilemu, nakuvavendejeka, nakuvakafwa vatalilile vyuma vyamwaza kulutwe.
Kuhituluka
-
Uno Mbimbiliya yinahase kutukafwa ngachilihi?
-
Vihula muka vimwe vize yakumbulula Mbimbiliya?
-
Vyuma muka uli nakusaka kulinangula muMbimbiliya?
WANA VYAVIVULU
Wana omwo Mbimbiliya yinahase kukafwa vatu makumbi ano.
“Mbimbiliya Yikwechi Mangana Akwilila” (Kaposhi Kakutalila Na. 1 2018)
Tala omwo Mbimbiliya yakafwile lunga umwe uze ahombelenga kufuma vene kuunyike wenyi.
Wana omwo Mbimbiliya yinahase kukafwa vatu mutanga.
“Vyuma 12 Vize Navikafwa jiTanga Jifukile” (Tonenu! Na. 2 2018)
Wana omwo vyuma yanangula Mbimbiliya vyalihandununa navishinganyeka vyavatu vavavulu kupandama kuli owo ali nakuyula kaye.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
