CHILONGESA 04
Kalunga Ikiye Iya?
Kufuma vene kushikulu, vatu vanalemesanga tulunga vakulisezaseza. Oloze Mbimbiliya ngwayo kwatwama Kalunga umwe, uze “apwa wamunene chikuma kuhambakana tulunga veka vosena.” (Mijimbu 2, 2:5) Uno Kalunga muka vene ou? Kaha chuma muka chamulingisa apwenga wamunene chikuma, kuhambakana tulunga veka vosena? Muchilongesa chino, naulinangula vyuma asaka utachikize hali ikiye.
1. Uno Kalunga lijina lyenyi iya, kaha natutachikiza ngachilihi ngwetu asaka tutachikize lijina lyenyi?
MuMbimbiliya, Kalunga alijimbula kuli etu ngwenyi: “Ami yami Yehova, eli likiko lijina lyami.” (Tanga Isaya 42:5, 8.) Lijina lyakwamba ngwavo “Yehova,” lyafuma kulizu lyachiHepeleu, lize lyalumbununa ngwavo, “Eji Kulingisanga Vyuma Kupwako.” Yehova asaka tutachikize lijina lyenyi. (Kulovoka 3:15) Uno twatachikiza ngachilihi? MuMbimbiliya ahakamo lijina lyenyi mapapa akuzomboka 7,000. a Lijina lyakwamba ngwavo Yehova, lyapwa ‘lyaKalunga wamuchano, mwilu nahamavu.’—Lushimbi lwamuchivali 4:39.
2. Uno Mbimbiliya yatulweza vyuma muka hali Yehova?
Kuli vyuma vyavivulu vyalingisa Mbimbiliya yihanjike ngwayo, Yehova kaha ikiye Kalunga wamuchano hatulunga vosena vaze vatu veji kulemesanga. Yehova atwama nangolo jakuyula jakulitulaho. Kaha nawa, ikiye kaha ‘apwa Wakulitulaho Chikuma hamavu hosena.’ (Tanga Samu 83:18.) Apwa nawa “Wangolo Josena,” mwomwo atwama nangolo jakulinga kala chuma nasake. ‘Atangile vyuma vyosena,’ vyamumelu nevi vyahamavu. (Kusoloka 4:8, 11) Ikiye kaha napungako lika, kaha nawa mwapwangako lika haya myaka yosena.—Samu 90:2.
LINANGULE VYAKUJIMINYINA
Tushimutwile chihandwa chatwama hajivulukiso veji kuvulukanga Kalunga, nahalijina lyenyi lyakulipwila. Natushimutwila nawa hajila Kalunga ajimbwilamo lijina lyenyi kuli yove, novyo vyamulingisa alinge ngocho.
3. Kalunga akwechi jivulukiso jajivulu, oloze atwama nalijina limwe kaha
Hakusaka kutachikiza chihandwa chatwama halijina livene lyamutu navulukiso yenyi, talenu VINDIYO, nakushimutwila hachihula chino:
-
Chihandwa muka chatwama halijina, navulukiso yakwamba ngwavo “Mwata,” chipwe jivulukiso jeka?
Mbimbiliya ngwayo vatu veji kulemesanga tulunga vavavulu, navamyata vakulisezaseza. Tangenu Samu 136:1-3, nakushimutwila hachihula chino:
-
Iya “Kalunga katulunga,” kaha nawa “Mwata wavamyata”?
4. Yehova asaka utachikize lijina lyenyi nakulivulukanga
Unatachikiza ngachilihi ngwove Yehova asaka utachikize lijina lyenyi? Talenu VINDIYO, nakushimutwila havihula vino:
-
Kutala washinganyeka ngwove Yehova asaka lijina lyenyi valitachikize tahi? Mwomwo ika?
Yehova asaka vatu vamuvulukenga halijina lyenyi. Tangenu Wavaka-Loma 10:13, nakushimutwila havihula vino:
-
Mwomwo ika chapwila chachilemu kuzachisa lijina lyaKalunga lyakwamba ngwavo Yehova?
-
Weji kwivwanga ngachilihi nge mutu nanuka lijina lyove nakukuvulukalyo?
-
Uno Yehova eji kwivwanga ngachilihi nge naumuvuluka halijina lyenyi?
5. Yehova ali nakusaka upandame chikuma kuli ikiye
Pwevo umwe wakuCambodia walijina lyaSoten, ambile ngwenyi, kutachikiza lijina lyaKalunga, chamulingisa apwenga wakuwahilila chikuma mukuyoya chenyi. Talenu VINDIYO, nakushimutwila hachihula chino:
-
Kweseka navindiyo tunatale, uno kutachikiza lijina lyaKalunga chakafwile ngachilihi Soten?
Shimbu kanda ulikate usepa namutu, watela kuvangila kutachikiza lijina lyenyi. Tangenu WaYakova 4:8a, nakushimutwila havihula vino:
-
Uno Yehova ali nakusaka ulinge ika?
-
Uno kutachikiza lijina lyaKalunga nakulivulukanga, nachikukafwa ngachilihi upandame kuli ikiye?
VATU VAMWE NGWAVO: “Kwatwama Kalunga umwe kaha, shikaho unahase kumuvuluka mwosena omwo unasakila.”
-
Kutala wetavila ngwove Kalunga ikiye Yehova tahi?
-
Unahase kulumbunwina ngachilihi mutu ejive ngwenyi Kalunga asaka tuvulukenga lijina lyenyi?
CHISHINA UNALINANGULA
Kalunga umwe kaha wamuchano, ikiye Yehova. Asaka tutachikize lijina lyenyi, nakulivulukanga mangana tupandame chikuma kuli ikiye.
Kuhituluka
-
Uno Yehova alihandununa ngachilihi natulunga veka vosena vaze vatu veji kulemesanga?
-
Mwomwo ika twatela kuzachisanga lijina lyaKalunga?
-
Watachikiza ngachilihi ngwove Yehova ali nakusaka upandame kuli ikiye?
WANA VYAVIVULU
Kekesa vyuma vitanu vize vyatela kutulingisa tufwelele chikupu ngwetu Kalunga kwatwama.
Wana ovyo chapwila chakutamo kufwelela ngwetu Kalunga kwatwama.
Wana ovyo chapwila chachilemu kuzachisa lijina lyaKalunga, numba tuhu katwatachikiza omwo valivulukilenga kushikuluko.
Kutala twatela kuvulukanga Kalunga mwosena omwo tunasakila tahi? Wana ovyo tunambila ngwetu atwama nalijina limwe kaha.
“Uno Kalunga Atwama naMajina Angahi?” (Chihande chili ha jw.org/lue)
a Nge uli nakusaka kutachikiza mijimbu yayivulu kutalisa kulijina lyaKalunga, novyo jiMbimbiliya jimwe jafumishilamo lijina kana, kaha tala Vihande Vyakuhakilako A4, muMbimbiliya yaVisoneka vyaKaye Kakahya.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
