CHILONGESA 06
Kuyoya Chaputukile Ngachilihi?
“Kuli [Kalunga] kukiko kwafuma kuyoya.” (Samu 36:9) Uno wafwelela mazu kana tahi? Vatu vamwe vashinganyeka ngwavo kuyoya chalijililile chivene, kavalingile chakutengako. Nge vishinganyeka kana vyapwa vyamuchano, kaha nayetu vatu twalijilile etu vavene, kavatutengeleko. Oloze nge Yehova Kalunga ikiye ahakileko kuyoya, kaha kwatela kupwa vyuma vyamulingishile atenge vyuma vyakuyoya, nyi mweka? a Tanga mujimbu wamuMbimbiliya wakusolola omwo chaputukile kuyoya, novyo chapwila chakutamo kufwelela mujimbu kana.
1. Uno ano mavu navyuma vyamumelu vyafumine kulihi?
Mbimbiliya ngwayo: “Hakuputuka Kalunga atangile melu namavu.” (Kuputuka 1:1) Vaka-sayasi vavavulu vetavila ngwavo ano mavu navyuma vyamumelu vyapwile namaputukilo. Uno Kalunga avitengele ngachilihi? Azachishile shipilitu yajila yize yapwa “ngolo” jenyi mangana atenge ano mavu, najipulaneti jeka, namilalaji navatanganyika.—Kuputuka 1:2.
2. Mwomwo ika Kalunga atengelele ano mavu?
Yehova “[katengele mavu chawanako], oloze awatengele ngwenyi hatwamenga vatu.” (Isaya 45:18) Atengele yino pulaneti yamavu mujila yize nayilingisa vatu valivwise kuwaha kutwamaho haya myaka. (Tanga Isaya 40:28; 42:5.) Vaka-sayasi vawana ngwavo, ano mavu alihandununa najipulaneti jikwavo, mwomwo hakiko kaha hanahase kutwama vatu nakuyoya.
3. Vyuma muka vyalingisa vatu valihandunune natunyama?
Omu Yehova atengele ano mavu, ahakileho nawa vyuma vyakuyoya. Chatete, ahakileho mitondo, namwila, natunyama. Kufumaho, “atengele mutu muchifwanyisa chenyi.” (Tanga Kuputuka 1:27.) Vyuma muka vyalingisa vatu valihandunune navyuma vyeka vyakuyoya? Hakuwana nge Kalunga atutenga muchifwanyisa chenyi, tunahase kupwa navilinga vize atwama navyo. Vilinga vimwe shina zangi nachiyulo. Atutenga nawa nauhashi wakulinangula malimi, nawakwivwa kuwaha nge tunamono vyuma vyamwaza, nakulivwisa kuwaha myaso. Kaha nawa vatu kaha vakiko vanahase kulemesa Tengi.
LINANGULE VYAKUJIMINYINA
Wana unjiho wakusolola nge kuyoya valingile chakutenga, kaha nawa chakutamo kufwelela mujimbu wamuMbimbiliya uze wahanjika havyuma vyakutenga. Wana vyuma tunahase kulinangula hali Kalunga hakumona vilinga vatwama navyo vatu.
4. Kuyoya valingile chakutenga
Vatu veji kuvalisanga nge vanatungu chuma. Oloze hakutunga vyuma kana veji kulondezezanga vyuma vyakutenga. Jino iya twatela kwalisa havyuma vyakutenga? Talenu VINDIYO, nakushimutwila hachihula chino:
-
Vyuma muka vatunga vatu vize valondezeza vyuma vyakutenga?
Zuvo hizuvo vayitunga kuli mutu. Jino iya atengele vyuma tweji kumonanga? Tangenu WavaHepeleu 3:4, nakushimutwila havihula vino:
-
Vyuma muka vyakutenga vize vyeji kukwivwisanga kuwaha?
-
Kutala chapwa chakutamo kufwelela ngwetu vyuma vyosena vyahano hamavu navize vyamumelu valingile vyakutenga tahi? Kaha mwomwo ika?
Uno watachikiza tahi?
Unahase kuwana vihande najivindiyo jinakuhanjika hachihande kanechi ha jw.org haze vanavuluka ngwavo “Uno Valingile Vyakutenga Tahi?” nahakwamba ngwavo “Vyuma Vashinganyeka Vatu Kupandama kuMaputukilo Akuyoya.”
Mwomwo zuvo hizuvo vayitunga kuli mutu, oloze uze atengele vyuma vyosena ikiye Kalunga.
5. Mujimbu wamuMbimbiliya wahanjika havyuma vyakutenga wapwa wakwoloka
Hali Kuputuka kapetulu 1, Mbimbiliya yalumbununa omwo aputukile kupwako mavu navyuma vyakuyoya vize vyatwamaho. Kutala wafwelela ngwove mujimbu kana wamuchano tahi, nyi wamakuli? Talenu VINDIYO, nakushimutwila havihula vino:
-
Uno Mbimbiliya yanangula ngwayo ano mavu navyuma vyakuyoya vyatwamaho vavitengele mumakumbi 6 ajiola 24 tahi?
-
Kutala washinganyeka ngwove mujimbu wamuMbimbiliya uze wahanjika havyuma vyakutenga wapwa wakutamo, kaha nawa wamuchano tahi? Mwomwo ika?
Tangenu Kuputuka 1:1, nakushimutwila hachihula chino:
-
Vaka-sayasi vahanjika ngwavo, ano mavu navyuma vyamumelu vyapwile namaputukilo. Uno vyuma vahanjika vinalifwane ngachilihi navyumevi unatange muMbimbiliya?
Vatu vamwe vashinganyeka ngwavo Kalunga atengele chuma chimwe chakuyoya, kuze kwafuma vyuma vyosena vyakuyoya. Tangenu Kuputuka 1:21, 25, 27, nakushimutwila hachihula chino:
-
Uno Mbimbiliya yanangula ngwayo Kalunga atengele kachuma kamwe kakuyoya kuze kwafuma vaishi natunyama navatu tahi, nyi atengele “miyachi” yosena yavyuma vyakuyoya?
6. Kalunga atengele vatu mujila yakulipwila
Kalunga atengele vatu natunyama. Oloze vatu avatengele mujila yakulipwila yize yavahandununa natunyama. Tangenu Kuputuka 1:26, nakushimutwila hachihula chino:
-
Hakuwana nge vatutenga muchifwanyisa chaKalunga, uno muchima wazangi nakutetela uze twatwama nawo wasolola nge Kalunga apwa ngachilihi?
VATU VAMWE NGWAVO: “Mujimbu wamuMbimbiliya wahanjika havyuma vyakutenga wapwa wamakuli.”
-
Nyi ove washinganyeka muka? Kaha mwomwo ika?
CHISHINA UNALINANGULA
Yehova atengele ano mavu, navyuma vyamumelu navyuma vyakuyoya vyosena.
Kuhituluka
-
Vyuma muka yanangula Mbimbiliya kutalisa kulwola aputukile kupwako ano mavu navyuma vyamumelu?
-
Uno Kalunga atengele miyachi yosena yavyuma vyakuyoya tahi, nyi atengele kachuma kamwe kuze kwafuma vyuma vikwavo?
-
Uno vatu valihandununa ngachilihi natunyama?
WANA VYAVIVULU
Wana vyuma vyakutenga vize vyasolola nge kwatwama owo avitengele.
“Uno Vyuma vyaMwilu NavyaHamavu Vyatunangula Vyuma Muka?” (Tonenu!, September 2006)
Tala omwo chisemi mwalumbunwina mwanenyi mujimbu wamuMbimbiliya wavyuma vyakutenga.
Wana unjiho wakusolola nge kunangula chakwamba ngwavo vyuma vyalijilile vivene chalifwana navyuma yanangula Mbimbiliya nyi chiku.
Wana unjiho wakusolola numba nge vifuwa vavumbwojola navyuma vawana vaka-sayasi vyasolola nge kuyoya valingile chakutenga nyi chalijilile chivene.
a Muchilongesa 25 naukalinangula ovyo Kalunga atengelelele vatu.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
