CHILONGESA 07
Uno Yehova Apwa Ngachilihi?
Uno washinganyeka ngwove Yehova Kalunga apwa ngachilihi? Kutala wamona ngwove apwa wamulemu chikuma, oloze atwama kwakusuku ngana mwavatanganyika, kaha kaweshi kuhasa kutunga usepa naikiyeko tahi? Kutala wamumona kupwa wangolo chikuma uze katwama nakekeko tahi? Uno Yehova apwa ngachilihi? Mbimbiliya yatulweza vilinga vimwe vyaYehova, kaha nawa yamba ngwayo akuzakama.
1. Mwomwo ika katwamona Kalungako?
“Kalunga apwa Shipilitu.” (Yowano 4:24) Yehova katwama namujimba wanyama namanyingako, oloze apwa Shipilitu kaha nawa atwama mwilu, muze katweshi kuhasa kumonako.
2. Vilinga muka vimwe atwama navyo Yehova?
Numba tuhu Yehova katwamumonako, oloze atwama navilinga vize vyalingisa vatu vaze vamutachikiza vamuzange. Mbimbiliya ngwayo: “Yehova azanga chiyulo, kaha keshi kusuvilila vatu jenyi vakushishikako.” (Samu 37:28) Kaha nawa “atwama nazangi chikuma, apwa muka-kutetela,” chikumanyi kuli vatu vaze vali nakuyanda. (WaYakova 5:11) Mbimbiliya yamba nawa ngwayo: “Yehova ali hakamwihi navaze vali nakulyonyinga mumuchima. Kaha eji kulwilanga vaze vanahombo.” (Samu 34:18) Kutala wejiva ngwove vilinga vyetu vinahase kwivwisa Yehova kuwaha chipwe kupihya tahi? Nge mutu mwasakula kulinga vyuma vyavipi, kaha mwevwisa Yehova kupihya nakumunyengetesa. (Samu 78:40, 41) Oloze mutu uze eji kulinganga vyuma vyakwoloka eji kumwivwisanga kuwaha.—Tanga Vishimo 27:11.
3. Yehova asolola ngachilihi ngwenyi atuzanga?
Zangi yikiko yapwa yayilemu chikuma havilinga vyosena atwama navyo Yehova. Mbimbiliya ngwayo “Kalunga ikiye zangi.” (WaYowano 1, 4:8) Yehova asolola zangi yenyi kuhichila muvyuma atenga nahakutuhana Mbimbiliya. (Tanga Vilinga 14:17.) Chakutalilaho, achishinganyeke hajila atutengelamo. Atutenga nauhashi wakumona vyuma vyaulombo wamwaza, nawakwivwilila kumyaso yakwivwisa kuwaha, nawakumakila vyakulya viyema. Echi chasolola nge asaka tulivwise kuwaha kuyoya.
LINANGULE VYAKUJIMINYINA
Linangule chuma eji kuzachisanga Yehova mangana alinge vyuma vyakukomwesa. Kufumaho wana jila asolwelamo vilinga vyenyi vyamwaza.
4. Shipilitu yajila yapwa ngolo jaKalunga
Yehova eji kuzachisanga shipilitu yenyi yajila, ngana muze etu vatu tweji kuzachisanga mavoko hakuzata milimo. Mbimbiliya yasolola hatoma ngwayo shipilitu yajila kayapwa kalungako, oloze yapwa ngolo eji kuzachisanga Kalunga. Tangenu Luka 11:13 naVilinga 2:17, nakushimutwila havihula vino:
-
Kalunga eji ‘kuhingunwinanga’ shipilitu yajila hali vaze navamulombayo. Kutala unashinganyeka ngwove shipilitu yajila yapwa kalunga, nyi yapwa ngolo jaKalunga? Mwomwo ika?
Yehova eji kuzachisanga shipilitu yajila mangana alinge vyuma vyakukomwesa. Tangenu Samu 33:6 naWaPetulu 2, 1:20, 21, nakushimutwila hachihula chino:
-
Uno Yehova azachishile shipilitu yajila hakulinga vyuma muka?
5. Yehova atwama navilinga vyamwaza
Numba tuhu Mose azachililile Kalunga nakashishi hamyaka yayivulu, oloze atwalileho lika kulinangula hali Tengi yenyi. Mose alombele Kalunga ngwenyi: “Ngulweze jijila jove, mangana ngukutachikize.” (Kulovoka 33:13) Ngocho Kalunga amulwezele omwo apwa. Tangenu Kulovoka 34:4-6, nakushimutwila havihula vino:
-
Vilinga muka vize Yehova alwezele Mose?
-
Vilinga muka wazanga vize atwama navyo Yehova?
6. Yehova eji kuzakamanga vatu
VaHepeleu vaze vapwile vatu jaKalunga vapwile vandungo muEjipitu. Uno Yehova evwilenga ngachilihi omu vapwile nakuyanda? Ivwililenu kuMAZU AKUKOPA nakukavangiza mujiMbimbiliya jenu, chipwe tangenu Kulovoka 3:1-10. Kufumaho shimutwilenu havihula vinakavangizaho.
-
Kweseka nou mujimbu, Yehova eji kwivwanga ngachilihi hakumona vatu vali nakuyanda?—Tala vesi 7 na 8.
-
Kutala washinganyeka ngwove Yehova asaka kukafwa vatu, kaha nawa atwama nangolo jakuvakafwa tahi? Mwomwo ika?
7. Vyuma atenga Yehova vyasolola vilinga atwama navyo
Yehova asolola vilinga vyenyi kuhichila muvyuma atenga. Talenu VINDIYO. Kufumaho tangenu Wavaka-Loma 1:20, nakushimutwila hachihula chinakavangizaho.
-
Vilinga muka vyaYehova unamono kweseka navyuma atenga vize unatale muvindiyo?
VATU VAMWE NGWAVO: “Katweshi kuhasa kutachikiza Kalungako mwomwo katwamumonako.”
-
Nyi ove washinganyeka muka?
-
Mwomwo ika?
CHISHINA UNALINANGULA
Yehova apwa Shipilitu ngocho katwamumonako, kaha nawa atwama navilinga vyamwaza. Chakutalilaho, atwama nazangi.
Kuhituluka
-
Mwomwo ika katwamona Yehovako?
-
Uno shipilitu yajila yapwa chuma muka?
-
Vilinga muka vimwe vize atwama navyo Yehova?
WANA VYAVIVULU
Linangule vilinga vyaYehova viwana vyavilemu vize navikukafwa umutachikize chikuma.
“Kalunga Atwama naVilinga Muka?” (Kaposhi Kakutalila Na. 1 2019)
Wana unjiho wakusolola nge Yehova atwama kaha mwilu, keshi kuvihela vyosenako.
“Uno Kalunga Atwama Kwosena Tahi?” (Chihande chili ha jw.org/lue)
Wana ovyo Mbimbiliya yavulukila shipilitu yajila kupwa nge mavoko aKalunga.
“Shipilitu Yajila Yapwa Chuma Muka?” (Chihande chili ha jw.org/lue)
Lunga umwe wakapuputa chamukaluhwilile kwitavila ngwenyi Kalunga amuzanga. Wana chuma chalumwine vishinganyeka vyenyi.
“Ngunamono Jino Ngwami Ngunahase Kukafwa Vakwetu” (Kaposhi Kakutalila, October 1, 2015)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
