CHILONGESA 08
Unahase Kupwa uSepa lyaYehova
Yehova ali nakusaka umutachikize kanawa. Mwomwo ika? Mwomwo atachikiza ngwenyi, nge nautachikiza kanawa vilinga vyenyi, najijila jenyi navyuma ajina kukulingila, kaha naufwila kutunga usepa naikiye. Kutala wetavila ngwove unahase kupwa usepa lyaKalunga tahi? (Tanga Samu 25:14.) Vyuma muka watela kulinga mangana upwenga usepa lyenyi? Mbimbiliya yakumbulula vihula kana, kaha nawa yasolola ovyo Yehova apwila sepa wamwenemwene chikuma.
1. Uno Yehova akulweza ulinge ika?
‘Pandama kuli Kalunga, kaha mwapandama kuli ove.’ (WaYakova 4:8) Uno echi chalumbununa ika? Chalumbununa nge Yehova asaka upwenga usepa lyenyi. Vatu vamwe veji kushinganyekanga ngwavo kaveshi kuhasa kupwa masepa jaKalungako mwomwo kavamumonako. Oloze Yehova atuhana Mbimbiliya yize yapwa Mazu enyi mangana tutachikize omwo apwa nakufwila kutunga usepa naikiye. Shikaho nge natutanganga Mbimbiliya, kaha natuzamisa usepa wetu naYehova numba tuhu katwamumonako.
2. Mwomwo ika Yehova apwila Sepa wamwenemwene?
Kakweshi mutu akuzanga kuhambakana omwo akuzanga Yehovako. Asaka uwahililenga nakumulombanga nge uli nakusakiwa kukukafwa. Shikaho, unahase ‘kumbila kulizakamina chove chosena hali ikiye, mwomwo akuzakama.’ (WaPetulu 1, 5:7) Yehova alizanga kukafwa masepa jenyi, nakuvavendejeka nakuvevwilila.—Tanga Samu 94:18, 19.
3. Hakusaka tupwenga tumasepa jaYehova, asaka tulingenga ika?
Yehova azanga vatu vosena, “oloze apwa sepa lyavaka-kusungama.” (Vishimo 3:32) Asaka vatu vaze navasaka kupwa masepa jenyi valingenga vyuma vize amona ngwenyi vyamwaza nakulihenda kuvyuma vize amona ngwenyi vyavipi. Vatu vamwe vashinganyeka ngwavo kaveshi kuhasa kulinga vyuma vyosena asaka Yehova, nakulihenda kuvyuma vyosena vize ahungako. Oloze Yehova atwama nakeke. Shikaho eji kwitavilanga vosena vaze vamuzanga, vaze nawa veji kuzatanga noho hakumina ngolo javo mangana vamwivwise kuwaha.—Samu 147:11; Vilinga 10:34, 35.
LINANGULE VYAKUJIMINYINA
Linangule vyuma watela kulinga mangana upwenga usepa lyaYehova, novyo vyamulingisa apwenga Sepa wamwenemwene.
4. Apalahama apwile sepa lyaYehova
Mujimbu wamuMbimbiliya waApalahama (uze vavuluka nawa ngwavo Apalama) watukafwa tutachikize omwo chalumbunukila kupwa sepa lyaKalunga. Tangenu mujimbu waApalahama hali Kuputuka 12:1-4. Kufumaho, shimutwilenu havihula vino:
-
Uno Yehova alwezele Apalahama alinge ika?
-
Uno Yehova ashikile Apalahama vyuma muka?
-
Uno Apalahama alingile ika havyuma amulwezele Yehova?
5. Vyuma vize Yehova asaka masepa jenyi valingenga
Kakavulu twasaka masepa jetu vatulingile vyuma vimwe.
-
Vyuma muka vimwe vize wasaka masepa jove vakulingile?
Tangenu WaYowano 1, 5:3, nakushimutwila hachihula chino:
-
Uno Yehova asaka masepa jenyi valingenga ika?
Hakusaka tusolole ngwetu tweji kwononokanga Yehova, twatela kwalumunako vilinga vyetu navishinganyeka vyetu. Tangenu Isaya 48:17, 18, nakushimutwila hachihula chino:
-
Mwomwo ika Yehova asakila masepa jenyi valumune vilinga vyavo?
Sepa wamwenemwene nahase kutulweza vyuma vize navitukinga nakutukafwa. Mukiko eji kulinganga naYehova kuli masepa jenyi
6. Vyuma vize Yehova eji kulingilanga masepa jenyi
Yehova eji kukafwanga masepa jenyi vomike muukalu. Talenu VINDIYO, nakushimutwila hachihula chinakavangizaho.
-
Uno Yehova nakafwenga ngachilihi ou pwevo tunatale muvindiyo mangana akeheseko kuhomba?
Tangenu Isaya 41:10, 13, nakushimutwila havihula vino:
-
Vyuma muka vize Yehova ashika kulingila masepa jenyi?
-
Kutala washinganyeka ngwove Yehova nahase kupwa Sepa wamwenemwene tahi? Mwomwo ika?
Vasepa namutu veji kulikafwanga. NaYehova nawa mwakukafwa
7. Kupwa sepa lyaYehova chasakiwa kushimutwilanga nenyi
Usepa weji kuzamanga nge vasepa namutu navashimutwilanga. Tangenu Samu 86:6, 11, nakushimutwila havihula vino:
-
Uno tunahase kuhanjika ngachilihi naYehova?
-
Uno Yehova eji kuhanjikanga ngachilihi nayetu?
Tweji kuhanjikanga naYehova kuhichila mukulomba, ikiye nawa eji kuhanjikanga nayetu kuhichila muMbimbiliya
VATU VAMWE NGWAVO: “Mutu keshi kuhasa kupwa sepa lyaKalungako.”
-
Chisoneka muka unahase kuzachisa hakukafwa mutu atachikize ngwenyi tunahase kupwa masepa jaYehova?
CHISHINA UNALINANGULA
Yehova ali nakusaka upwenga usepa lyenyi, kaha nawa mwakukafwa upandame kuli ikiye.
Kuhituluka
-
Uno Yehova eji kukafwanga ngachilihi masepa jenyi?
-
Mwomwo ika Yehova asakila ngwenyi vaze navasaka kupwa masepa jenyi valumuneko vilinga vyavo?
-
Kutala washinganyeka ngwove Yehova alweza masepa jenyi valinge vyuma vize kaveshi kuhasako tahi? Mwomwo ika?
WANA VYAVIVULU
Uno chiyoyelo chove nachipwa ngachilihi nge mutunga usepa naKalunga?
“Yehova hiKalunga Twatela Kutachikiza” (Kaposhi Kakutalila, February 15, 2003)
Linangule vyuma watela kulinga mangana upwenga usepa lyaKalunga.
“Ngunahase Kupwa Ngachilihi Sepa lyaKalunga?” (Questions Young People Ask—Answers That Work, Volume 2, kapetulu 35)
Wana vyuma vinalingisanga pwevo umwe amone ngwenyi kutunga usepa naYehova chinalumuna kuyoya chenyi.
“Kangwapwile Nakusaka Kufwako!” (Kaposhi Kakutalila Na. 1 2017)
Ivwa vyuma navahanjika vakweze hali Yehova.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
