CHILONGESA 09
Kulomba Nachikupandamisa Kuli Kalunga
Uno washinganyeka ngwove kwatela kupwa mutu wakukutwaminyina tahi? Kutala uli navihula vyavilemu vize unakusaka mutu wakuvikumbulula tahi? Uno uli nakusaka kukuvendejeka chipwe kukukolezeza tahi? Kutala uli nakufwila kupandama chikuma kuli Yehova tahi? Kulomba nachikukafwa muvyuma vyosenevi. Jila muka yakwoloka twatela kulombelamo? Uno Kalunga eji kwivwililanga kukala kulomba tahi? Vyuma muka watela kulinga numba Kalunga evwilile kukulomba chove? Tushimutwile havihula kana.
1. Uno twatela kulomba kuli iya, kaha vyuma muka twatela kulomba?
Yesu alombelenga kuli Yehova, kaha atulweza nayetu tulombenga kuli ou Setu wamwilu. Ambile ngwenyi: “Mwatela kulomba ngwenu: ‘Ove Setu uli mwilu . . . ’” (Mateu 6:9) Kulomba nachizamisa usoko wetu naYehova.
Tunahase kumulomba kala vyuma. Chipwe ngocho, hakusaka Kalunga akumbulule kulomba chetu, twatela kulomba kweseka namwaya muchima wenyi. Mbimbiliya ngwayo, “Vyeshovyo natumulomba [Kalunga] kweseka namwaya muchima wenyi, mwatwivwa.” (WaYowano 1, 5:14) Yesu avulukile vyuma vimwe vyakutamo vize tunahase kulomba Kalunga. (Tanga Mateu 6:9-13.) Omu natumulombanga vyuma tuli nakusaka, twatela nawa kumusakwililanga havyuma natulingila, nakumulomba akafweko veka.
2. Uno twatela kulomba ngachilihi?
Mbimbiliya yatulweza ngwayo, “[tulwezenga Kalunga] vyuma vyosena vili mumichima [yetu].” (Samu 62:8) Shikaho vyuma natulomba vyatela kufuma kumuchima. Tunahase kulombela mumuchima chipwe kutambakana, kutwama chipwe kwimana chipwe kufukama, chikalu kaha natusolola kavumbi kuli ikiye. Kaha nawa tunahase kulomba kala lwola, kwosena okwo tuli.
3. Uno Kalunga eji kukumbululanga ngachilihi kulomba chetu?
Eji kutukumbululanga mujijila jakulisezaseza. Yehova atuhana Mazu enyi Mbimbiliya yize yakumbulula vihula vyetu. Kutanganga Mazu aKalunga cheji “kuhananga mangana kumutu wakuzeneka chinyingi.” (Samu 19:7; tanga WaYakova 1:5.) Kalunga nahase kutukafwa tuunde muchima nge tuli muukalu. Eji kuzachisanga nawa vangamba jenyi mangana vatukafwe.
LINANGULE VYAKUJIMINYINA
Kekesa uwane omwo unahase kulomba mujila yize nayivwisa Kalunga kuwaha, nakuwana nawa omwo kulomba chinahase kukukafwa.
4. Vyuma twatela kulinga numba Kalunga evwilile kukulomba chetu
Vyuma muka twatela kulinga numba Kalunga evwilile kukulomba chetu? Kaha vyuma muka twatela kulihendako? Talenu VINDIYO.
Yehova asaka tulombenga kuli ikiye. Tangenu Samu 65:2, nakushimutwila havihula vino:
-
Kutala washinganyeka ngwove “muka-kwivwilila kukulomba” asaka ulombenga kuli ikiye tahi? Mwomwo ika?
Nge tuli nakusaka ngwetu Kalunga evwililenga kukulomba chetu, kaha twatela kukavangizanga jishimbi jenyi. Tangenu Mika 3:4 naWaPetulu 1, 3:12, nakushimutwila hachihula chino:
-
Vyuma muka twatela kulinga numba Yehova evwilile kukulomba chetu?
Mazavu avali avaka-kwasa jita anahase kulomba Kalunga avakafwe. Kutala nachipwa chakutamo Kalunga kukumbulula kulomba kana tahi?
5. Vyuma natulomba vyatela kufuma kumuchima
Vatu vamwe vavanangula kulomba chakuhilukila hilukila mazu wowamwe. Kutala omu mukiko asaka Kalunga ngwenyi tulombenga tahi? Tangenu Mateu 6:7, nakushimutwila hachihula chino:
-
Vyuma muka navikukafwa uhone ‘kuhilukila hilukila mazu nakuvuluka vyuma vyovimwe’ nge uli nakulomba?
Hakumbi hakumbi, shinganyekanga hachuma chimwe nakulingila Yehova nakumusakwilila hachuma kana. Kaha kuheta kusongo yachalumingo naumona ngwove unavuluka vyuma 7 vyakulihandununa handununa mukulomba chove.
Chisemi wamwenemwene asaka mwanenyi apwenga wakukasunuka kuhanjika naikiye. NaYehova nawa asaka tupwenganga vakukasunuka kulomba kuli ikiye
6. Kulomba chapwa wana wakufuma kuli Kalunga
Uno kulomba chinahase kutukafwa ngachilihi, chikumanyi nge tuli muukalu? Talenu VINDIYO.
Mbimbiliya yatulweza ngwayo kulomba chinahase kutukafwa tuunde muchima. Tangenu Wavaka-Fwilipi 4:6, 7, nakushimutwila havihula vino:
-
Uno kulomba chinahase kutukafwa ngachilihi numba tuhu shimbu jimwe ukalu kaweshi kukumako?
-
Vyuma muka vimwe uli nakusaka kumulomba Kalunga?
Uno watachikiza tahi?
Lizu “amene” lyalumbununa “chipwenga vene ngocho.” Kufuma vene kushikulu, vatu vanazachisanga lizu “amene” hakukumisa kulomba.—Mijimbu 1, 16:36.
7. Wanangako lwola lwakulomba
Lwola lumwe kuvula chamilimo chinahase kutulingisa tuvulyame kulomba. Yesu amwenenga kulomba kupwa chachilemu. Tangenu Mateu 14:23 naMako 1:35, nakushimutwila havihula vino:
-
Vyuma muka alingilenga Yesu numba awaneko lwola lwakulomba?
-
Lwola muka unahase kulomba kuli Kalunga?
VATU VAMWE NGWAVO: “Kulomba chapwa kaha kwenyeka lwola.”
-
Uno unahase kukafwa ngachilihi vatu vakufwana ngana?
CHISHINA UNALINANGULA
Kulomba chakufuma kumuchima cheji kutupandamisanga kuli Kalunga, nakutukafwa tuunde muchima nakulinga vyuma vize navimwivwisa kuwaha.
Kuhituluka
-
Uno twatela kulomba kuli iya?
-
Uno twatela kulomba ngachilihi?
-
Uno kulomba chinahase kutukafwa ngachilihi?
WANA VYAVIVULU
Wana omwo vakumbulula vihula veji kuhulisanga chikuma vatu kupandama kukulomba.
“Vyuma Vitanu naVivali Mwatela Kutachikiza ha Kulomba” (Kaposhi Kakutalila, January 1, 2011)
Linangule ovyo chapwila chachilemu kulomba nomwo nawa unahase kulomba mujila yamwenemwene
“Mwomwo Ika Ngwatela Kulombela?” (Chihande chili ha jw.org/lue)
Wana omwo Mbimbiliya yahanjika hali owo twatela kulomba.
“Uno Ngwatela Kulomba Kuli Vaka-Kujila Tahi?” (Chihande chili ha jw.org/lue)
Yino vindiyo yamwaso nayisolola ngwayo, tunahase kulomba kala lwola kaha nawa kwosena okwo tuli.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
