CHILONGESA 10
Kukunguluka chaVinjiho jaYehova Nachikukafwa Ngachilihi?
Kutala wakungulukaho lyehi naVinjiho jaYehova tahi? Nge kanda, pamo unahase kwivwa woma kukunguluka navo halwola lwatete. Unahase kulihulisa ngwove: ‘Uno kukunguluka kana chapwa ngachilihi? Uno chalemena halihi? Mwomwo ika ngwatela kupwa kukukunguluka kana?’ Muchilongesa chino naulinangula omwo kukunguluka chinahase kukupandamisa chikuma kuli Kalunga nomwo chinahase kukukafwa mukuyoya chove.
1. Mwomwo ika Vinjiho jaYehova veji kukungulukilanga?
Muka-kusoneka Mbimbiliya umwe ahanjikile hakulema chakulikungulwila hamwe navakwetu ngwenyi: “Nangwalisa Yehova muchikungulwilo chachinene.” (Samu 26:12) Omu mukiko veji kulinganga naVinjiho jaYehova mukaye kosena. Chalumingo hichalumingo veji kulikungululanga, nakwalisa Kalunga nakwimba myaso nakulomba. Veji kupwanga nawa nakukunguluka chachinene chakulisezaseza mumwaka, mangana valemese Kalunga.
2. Vyuma muka naukalinangula kukukunguluka chetu?
Hakukunguluka tweji kulinangulanga Mazu aKalunga, ‘nakuwalumbununa kanawa nakushindakanya omu atalikisa.’ (Tanga Nehemiya 8:8.) Nge naupwa kukukunguluka kana, kaha naulinangula hali Yehova navilinga vyenyi vyamwaza. Omu nauputuka kutachikiza ngwove Yehova akuzanga, naupandama chikuma kuli ikiye. Nautachikiza nawa omwo nahase kukukafwa mangana ufukile mukuyoya chove.—Isaya 48:17, 18.
3. Uno vatu naukashimutwila navo hakukunguluka navakakukafwa ngachilihi?
Yehova atulweza ‘tulihakenga michima navakwetu mangana tulikolezeze, tusolole zangi navilinga vyamwenemwene [nakuhona] kusuvilila kulikungulwila hamwe.’ (WavaHepeleu 10:24, 25) Kukukunguluka chetu, naukawanako vatu vaze valizanga kaha nawa vasaka kulinangula hali Kalunga nganomu uli nakulinga. Navakakukolezeza nawa namazu amuMbimbiliya. (Tanga Wavaka-Loma 1:11, 12.) Naukashimutwila nawa navatu vaze vapwa vakuwahilila numba tuhu vali nakumona ukalu. Evi hivyuma vimwe vyalingisa Yehova atulweze tulikungulwilenga hamwe.
LINANGULE VYAKUJIMINYINA
Wana omwo chapwa kukunguluka chaVinjiho jaYehova, novyo chapwila chachilemu kupwa kukukunguluka kana.
4. Kukunguluka chaVinjiho jaYehova
Vaka-Kulishitu vakulivanga valikungulwilenga hamwe mangana valemese Yehova. (Wavaka-Loma 16:3-5) Tangenu Wavaka-Kolose 3:16, nakushimutwila hachihula chino:
-
Uno vaka-Kulishitu vakulivanga valemeselenga ngachilihi Yehova?
Namakumbi ano Vinjiho jaYehova veji kulikungulwilanga hamwe mangana valemese Kalunga. Hakusaka utachikize omwo chapwa kukunguluka chavo, talenu VINDIYO. Kufumaho talenu muvwimbimbi uli nakusolola vatu vali nakukunguluka, nakushimutwila havihula vino:
-
Uno vyuma vyeji kusolokanga haZuvo yaWangana vinalifwane ngachilihi navyuma unatange hali Wavaka-Kolose 3:16?
-
Vyuma vyeka muka unamono muvindiyo chipwe aha hamuvwimbimbi vize vinakwivwisa kuwaha?
Tangenu Wavaka-Kolinde 2, 9:7, nakushimutwila hachihula chino:
-
Mwomwo ika Vinjiho jaYehova kaveshi kulomba jimbongo kuli vatu vaze vaneza kukukungulukako?
Ove namuka-kukunangula, shimutwilenu vyuma navipwa hakukunguluka chachino chalumingo.
-
Chihanda muka chakukunguluka chize unazange?
Uno watachikiza tahi?
Unahase kuya ha jw.org, uwane chihela nalwola lwakulisezaseza luze veji kukungulukanga mukaye kosena.
-
Kukukunguluka chetu kweji kupwanga vihande, navimweso najivindiyo. Kaha cheji kuputukanga namwaso nakulomba, nakukuma nawa namwaso nakulomba
-
Kwatwama vihanda vimwe vyahakukunguluka vize veji kukumbululangaho vaze vali mulizavu
-
Vatu vosena, malunga namapwevo, vakulwane navanyike, vanahase kupwa kukukunguluka
-
Kukunguluka chayetu Vinjiho jaYehova chapwa chawana. Katwafwetesako, kaha nawa katwahichisamo lilonga mangana tutambule jimbongo kuvatuko
5. Chasakiwa kuzata nangolo numba upwenga kukukunguluka
Tala chakutalilaho chatanga akolelelemo Yesu. Mwaka himwaka vatambukilenga hamavu tunda yajipili makumbi atatu kufuma kuNazaleta nakuya kuYelusalema mangana vakalemese Kalunga. Tangenu Luka 2:39-42, nakushimutwila havihula vino:
-
Kutala washinganyeka ngwove kuya kuYelusalema chapwile chachikalu tahi?
-
Mwomwo ika watela kuzachila nangolo mangana upwenganga kukukunguluka?
-
Kutala wamona ngwove chapwa chamwaza kulinga ngocho numba tuhu chasakiwa kuzata nangolo tahi? Mwomwo ika?
Mbimbiliya yatulweza ngwayo kulikungulwilanga hamwe nakulemesa Kalunga chapwa chachilemu chikuma. Tangenu WavaHepeleu 10:24, 25, nakushimutwila hachihula chino:
-
Mwomwo ika twatela kupwilanga kukukunguluka lwola lwosena?
VATU VAMWE NGWAVO: “Mutu katela kukunguluka nakulemesa Kalunga hamwe navakwavoko. Chili kaha kanawa kutangila Mbimbiliya hembo lyenyi.”
-
Chisoneka muka chipwe chakutalilaho chamuMbimbiliya chasolola vyuma asaka Yehova hachihande kana?
CHISHINA UNALINANGULA
Kuyanga kukukunguluka nachikukafwa ulinangule vyavivulu hali Yehova nakuzamisa usepa wove naikiye nakumulemesela hamwe navakwenu.
Kuhituluka
-
Mwomwo ika Yehova atulwezela tulikungulwilenga hamwe navakwetu?
-
Vyuma muka naukalinangula kukukunguluka chaVinjiho jaYehova?
-
Uno kuyanga kukukunguluka kana chinahase kukukafwa mujila muka yikwavo?
WANA VYAVIVULU
Vyuma muka watela kulinga nge uli nakwivwa woma kuya nakukunguluka? Tala vyuma vyakafwile lunga uze evwilenga woma kuya kukukunguluka, azange jino kukunguluka.
Tala vyuma alivwishile kuwaha mukweze umwe kukukunguluka, navyuma alingile mangana atwaleho lika kukungulukanga.
Wana omwo veji kwivwanga vatu vamwe hakupwa kukukunguluka.
“Mwomwo Ika Tweji Kuyilanga naKukunguluka kuZuvo yaWangana?” (Chihande chili ha jw.org/lue)
Wana omwo kupwanga kukukunguluka chaVinjiho jaYehova chalumwine kuyoya chachihwanga umwe.
“Lwola Lwosena Ngwatambukilenga naUta” (Chihande chamuKaposhi Kakutalila)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
