CHILONGESA 11
Vyuma Muka Navikukafwa Utange Mbimbiliya Nakuyivwishisa?
Uno wevwaho lyehi woma kuputuka kuzata mulimo umwe, mwomwo ngwove waukalu tahi? Pamo chuma chakukafwile ukwashiwile shina kuhona kuuzata wosena halwola lwolumwe. Mukiko chinahase kupwa nahakuputuka kutanga Mbimbiliya. Pamo unahase kulihulisa ngwove, ‘Nanguputukila halihi?’ Muchilongesa chino, natushimutwila hajijila jimwe jajashi jize najikukafwa ulivwisenga kuwaha kutanga Mbimbiliya nakulinangulayo.
1. Mwomwo ika twatela kutangilanga Mbimbiliya hakumbi hakumbi?
Mutu uze eji kutanganga Mbimbiliya, chipwe ngwetu “jishimbi jaYehova” hakumbi hakumbi, eji kufukilanga nakupwa wakuwahilila. (Tanga Samu 1:1-3.) Nge uchili mukuputuka, unahase kuyitanganga muminyutu yayindende. Kaha omu nawijilila, naulivwisanga jino kuwaha kutanga Mazu aKalunga.
2. Chuma muka watela kulinga nge uli nakutanga Mbimbiliya?
Omu natutanganga Mbimbiliya, twatela kulihulikanga nakushinganyeka havyuma tunatange mangana tuyivwishise. Twatela kuyitanganga “nakuhunananangaho.” (Yoshuwa 1:8, kwinyikila chamwishi) Nge uli nakutanga, lihulise ngwove: ‘Uno evi ngunatange vinangunangula ika hali Yehova Kalunga? Nanguhasa kuvizachisa ngachilihi mukuyoya chami? Uno ngunahase kuvizachisa ngachilihi hakukafwa vakwetu?’
3. Lwola muka lwamwaza watela kutanga Mbimbiliya?
Kutala cheji kukukaluhwilanga kuwanako lwola lwakutanga Mbimbiliya tahi? Etu vavavulu cheji kutukaluhwilanga. Chipwe ngocho, eseka ‘kuzachisanga kanawa lwola lwove.’ (Wavaka-Efwesu 5:16) Unahase kulinga ngocho hakunonekangako lwola lwakutanga Mbimbiliya hakumbi hakumbi. Vatu vamwe veji kutanganga Mbimbiliya nachimene. Vakwavo nawa veji kuyitanganga nge kunachi, pamo namusana halwola lwakunoka. Kaha veka nawa veji kuyitanganga naufuku shimbu kanda vasavale. Lwola muka lunahase kupwa lwamwaza kuli yove?
LINANGULE VYAKUJIMINYINA
Wana vyuma navikukafwa ulivwisenga kuwaha kutanga Mbimbiliya, navize watela kuwahisanga vize navikukafwa wivwishisenga vyuma navakunangulanga.
Tunahase kulijilisa kutanga Mbimbiliya nakulivwisayo kuwaha ngana muze tunahase kulivwisa kuwaha kulya vyakulya vize katwazangilenga hakavangako
4. Livwisenga kuwaha kutanga Mbimbiliya
Chinahase kukaluhwa kuputuka kutanga Mbimbiliya. Oloze, tunahase ‘kufwila chikuma’ kutanga Mbimbiliya, ngana muze mutu mwazanga vyakulya vize kalilengako. Tangenu WaPetulu 1, 2:2, nakushimutwila hachihula chino:
-
Uno washinganyeka ngwove nge nautanganga Mbimbiliya hakumbi hakumbi, kaha naulivwisayo kuwaha nakufwila jino kuyitanganga tahi?
Talenu VINDIYO mangana mumone omwo vatu vamwe vaputukile kulivwisa kuwaha kutanga Mbimbiliya. Kufumaho shimutwilenu havihula vinakavangizaho.
-
Ukalu muka vapwile nawo vakweze unatale muvindiyo uze vafungulwile?
-
Vyuma muka vyavakafwile vatwaleho lika kutanganga Mbimbiliya?
-
Vyuma muka vyavakafwile mangana valivwise kuwaha kutanga Mbimbiliya?
Vyuma navikukafwa uputuke kutanga Mbimbiliya:
-
Sakula Mbimbiliya yakwoloka, yize nawa yili namazu amashi kwivwishisa. Eseka kutanga Mbimbiliya yaKaye Kakahya nge uli nayo mulilimi lyove.
-
Putuka kutanga mujimbu wamu Mbimbiliya uze weji kukwivwisanga kuwaha. Hakusaka utachikize mwakulingila ngocho, tala chati yakwamba ngwavo, “Putuka Kutanga Mbimbiliya.”
-
Anukanga oho unahete. Zachisa chati yili mumukanda uno yakwamba ngwavo, “Funjika Oho Unakumina Kutanga.”
-
Zachisanga JW Library ®. Unahase kuyizachisa hakutanga Mbimbiliya chipwe hakwivwilila kumazu akukopa mumalimi akulisezaseza hakala likina kwosena okwo uli.
-
Tanganga vihande vyakuhakilako vize vili muMbimbiliya yaKaye Kakahya. Muvihande kana mwatwama jimapu najichati namukana wamazu. Vyuma kana navikukafwa ulivwisenga kuwaha kutanga Mbimbiliya.
5. Hitulukilanga chimweza muvyuma naukalinangula
Tangenu Samu 119:34, nakushimutwila hachihula chino:
-
Mwomwo ika chapwila chamwaza kulomba shimbu kanda uputuke kutanga Mbimbiliya, chipwe shimbu kanda uputuke kuhituluka muvyuma naukalinangula?
Vyuma muka watela kulinga mangana wivwishise chikuma vyuma naulinangula? Omu nauhitulukanga muchilongesa hichilongesa, eseka kukavangizanga vyuma vino:
-
Tanganga jipalangalafu jamaputukilo jamuchilongesa hichilongesa.
-
Tanganga visoneka vyosena nakumona omwo vinalikwatasana nachihande chosena.
-
Funjikanga mazu namikuku haze hanazame kukumbulula. Kulinga ngocho nachikukafwa ukakumbulule kanawa omu namukashimutwila namuka-kukunangula.
Uno watachikiza tahi?
Ijiva ngwove Vinjiho jaYehova vanazachisanga jiMbimbiliya jakulisezaseza jajivulu. Oloze twazanga Mbimbiliya yaVisoneka vyaKaye Kakahya, mwomwo yapwa yakwoloka, yayashi kwivwishisa kaha nawa vasonekamo lijina lyaKalunga.—Tala chihande chahaInternet chakwamba ngwavo “Uno Vinjiho jaYehova Vatwama naMbimbiliya Yavo Tahi?”
VATU VAMWE NGWAVO: “Kulinangula Mbimbiliya chapwa chachikalu, kaha nawa kangweshi nalwola nangolo jakulinangulayoko.”
-
Nyi ove washinganyeka muka?
CHISHINA UNALINANGULA
Hakusaka wivwishise kanawa Mbimbiliya, nonekanga lwola lwakuyitanga, nakulomba kuli Kalunga mangana wivwishise vyuma naulinangula, nakuhitulukanga muvyuma naukalinangula.
Kuhituluka
-
Vyuma muka navikukafwa wivwishise kanawa Mbimbiliya?
-
Lwola muka unahase kunoneka mangana utangenga Mbimbiliya nakulinangulayo?
-
Mwomwo ika chapwila chachilemu kuhitulukanga muvyuma naukalinangula?
WANA VYAVIVULU
Hituluka muvyuma vize navikukafwa wivwishise kanawa Mbimbiliya.
“Vyuma Navimikafwa Munganyale Hakutanga Mbimbiliya” (Kaposhi Kakutalila Na. 1 2017)
Linangule jijila jitatu jakutangilamo Mbimbiliya.
Wana vyuma navikukafwa ulivwisenga kuwaha kutanga Mbimbiliya.
Wana jijila jakulinangwilamo jize vanazachisanga vatu vaze vanatangenga Mbimbiliya hamyaka yayivulu.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
