CHILONGESA 12
Vyuma Muka Navikukafwa Utwaleho Kulinangula Mbimbiliya?
Kulinangula Mbimbiliya cheji kukafwanga. Chipwe ngocho, kachapwa chachashi kulinangulayo lwola lwosenako. Lwola lumwe unahase kushinganyeka ngwove, kaweshi kuhasa kutwalaho lika kulinangula Mbimbiliyako. Jino mwomwo ika chapwila chachilemu kuzata nangolo ulinangulengayo lika? Chuma muka nachikukafwa ulinangulenga lika chamokomoko naukalu naumona?
1. Uno kulinangula Mbimbiliya chawahila halihi?
“Mazu aKalunga apwa amatonyi, kaha atwama nangolo.” (WavaHepeleu 4:12) Mbimbiliya yapwa yayilemu, mwomwo yasolola vishinganyeka vyaKalunga, nomwo eji kwivwanga hali ove. Nayikukafwa upwenga nachinyingi, namangana amwenemwene nakutalilila vyuma vyamwaza kulutwe. Chachilemunyi, Mbimbiliya nayikukafwa upwenga usepa lyaYehova. Nge naulinangulanga Mbimbiliya, kaha ngolo jayo najikukafwa mukuyoya.
2. Kutachikiza kulema chamuchano wamuMbimbiliya chalemena halihi?
Muchano wamuMbimbiliya wapwa nge luheto lwalulemu. Echi chikiko Mbimbiliya yatulwezela ‘tulande muchano nakuhona kuulandulula.’ (Vishimo 23:23) Nge natushinganyekanga hakulema chamuchano wamuMbimbiliya, kaha natuzatanga nangolo tutwaleho lika kulinangulawo numba nge natumonanga ukalu.—Tanga Vishimo 2:4, 5.
3. Uno Yehova mwakukafwa ngachilihi utwaleho kulinangula?
Yehova apwa Tengi yove kaha nawa Sepa lyove, shikaho ali nakusaka kukukafwa umutachikize. Nahase kukuhana “muchima wakufwila kulinga vyuma nangolo jakulingamo nawa.” (Tanga Wavaka-Fwilipi 2:13.) Shikaho, nge unevu uli wakulinangula Mbimbiliya, chipwe nge chinakukaluhwila kukavangiza vyuma unalinangula, kaha nahase kukukafwa. Nahase nawa kukuhana ngolo jakufungulula ukalu uze naumona. Mulombenga Yehova mangana akukafwe utwaleho kulinangula Mbimbiliya.—Wavaka-Tesolonyika 1, 5:17.
LINANGULE VYAKUJIMINYINA
Wana vyuma navikukafwa utwaleho kulinangulanga Mbimbiliya numba tuhu watwama navyakulinga vyavivulu, chipwe nge vakwenu vanakufumbukila. Wana nawa omwo Yehova nahase kukukafwa mangana utwaleho lika kulinangulanga.
4. Hakanga kulinangula Mbimbiliya kulutwe
Lwola lumwe vyakulinga vyeji kutuvulilanga nakutulingisa tushinganyeke ngwetu katweshi nalwola lwakulinangula Mbimbiliyako. Jino chuma muka nachitukafwa? Tangenu Wavaka-Fwilipi 1:10, nakushimutwila havihula vino:
-
Vyuma muka wamona kupwa “vyavilemu” chikuma mukuyoya?
-
Vyuma muka navikukafwa umonenga kulinangula Mbimbiliya kupwa chachilemu chikuma?
-
Nge nauvangila kuhaka usekeseke mumungomo numba uhake malolwa helu, aze malolwa kaweshi kutamo osenako
-
Nge nauvangila kuhaka malolwa kwishi, kaha nachikukafwa uhakemo nausekeseke wauvulu. Chochimwe nawa, nge nauvangilanga kulinga “vyuma vyavilemu” mukuyoya chove, kaha nauvikumisanga nakuwanako lwola lwakulinga vyuma vyeka
Kulinangula Mbimbiliya nachitukafwa tutesemo vyuma vyakushipilitu vize twasaka. Vyuma kana shina kutachikiza Kalunga nakumulemesanga. Tangenu Mateu 5:3, nakushimutwila hachihula chino:
-
Chuma muka nachifumamo nge natumonanga kulinangula Mbimbiliya kupwa chachilemu?
5. Pwakonga uwakumika nge vali nakukufumbukila
Lwola lumwe vakwenu vanahase kukukanyisa kulinangula Mbimbiliya. Tala chakutalilaho chaFrancesco. Talenu VINDIYO, nakushimutwila havihula vino:
-
Kweseka navindiyo unatale, uno masepa jaFrancesco nanaye vevwile ngachilihi omu avalwezele vyuma apwile nakulinangula?
-
Uno kumika chenyi chanehele vyuma muka vyamwaza?
Tangenu WaChimoteu 2, 2:24, 25, nakushimutwila havihula vino:
-
Uno vausoko wove namasepa jove, veji kwivwanga ngachilihi hakukumona uli nakulinangula?
-
Kweseka nechi chisoneka, naulinga ngachilihi nge vakwenu kaveshi kuwahililako hakukumona uli nakulinangula Mbimbiliya? Mwomwo ika?
6. Pendaminanga hali Yehova akukafwe
Nge natupandama lika kuli Yehova, kaha natufwila chikuma kulinganga vyuma vize navimwivwisa kuwaha. Chipwe ngocho, chinahase kutukaluhwila kwalumunako vyuma vimwe mukuyoya chetu mangana tulinge vyuma vize navimwivwisa kuwaha. Nge nayove uli nakumona ukalu kana, kaha kanda nauzeyako, Yehova mwakukafwa. Talenu VINDIYO, nakushimutwila havihula vino:
-
Kweseka navindiyo, vyuma muka alumwineko Jim mangana evwise Yehova kuwaha?
-
Chuma muka alingile chize chinakwivwisa kuwaha chikuma?
Tangenu WavaHepeleu 11:6, nakushimutwila havihula vino:
-
Vyuma muka vize Yehova nahase kulingila vaze vali “nakumutondatonda chikuma,” kulumbununa vaze vali nakukilikita mangana vamutachikize nakumwivwisa kuwaha?
-
Vyuma kana vyasolola nge Yehova eji kwivwanga ngachilihi hakukumona uli nakuzata nangolo mangana ulinangule Mbimbiliya?
MUTU NAHASE KUHULISA NGWENYI: “Mwomwo ika uli nakulinangwila Mbimbiliya?”
-
Uno naumukumbulula ngachilihi?
CHISHINA UNALINANGULA
Kulinangula Mbimbiliya nachikukafwa ukalivwise kuwaha kuyoya haya myaka, numba tuhu kachapwa chachashi lwola lwosenako. Pendaminanga hali Yehova kaha mwakakufweta.
Kuhituluka
-
Vyuma muka vyakulingisa umone muchano wamuMbimbiliya kupwa waulemu?
-
Nausolola ngachilihi ngwove wahaka “vyuma vyavilemu” kulutwe?
-
Mwomwo ika watela kulomba Yehova akukafwe utwaleho kulinangula Mbimbiliya?
WANA VYAVIVULU
Wana vyuma viwana vize vinakafwe vatu vavavulu vazachisenga kanawa lwola lwavo.
“Mwakuzachishila Kanawa Lwola Lwenu” (Tonenu!, April 2014)
Tala omwo Yehova akafwile pwevo umwe uze vafumbukililile kuli lunga lyenyi mwomwo yakusaka kwivwisa Kalunga kuwaha.
Tala omwo lunga umwe atokwele mwomwo yalukakachila lwapuwenyi.
Lwola lumwe Vinjiho jaYehova veji kuvavangijikilanga ngwavo veji kujihanga usoko wavatu. Uno mukiko veji kulinganga tahi?
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
