CHILONGESA 13
Omwo Kwitava chaMakuli Chinahungumwisa Vatu
Nge Kalunga apwa zangi, kaha mwomwo ika mauka akwitava eji kulingilanga vyuma vyavipi, okunyi amba ngwawo eji kwimanyinangako Kalunga? Mwomwo mauka kana apwa amakuli. Kaha vyuma veji kuhanjikanga navize veji kulinganga vyeji kulingisanga vatu vamone Kalunga kupwa wamupi. Mujila muka? Kaha Kalunga eji kwivwanga ngachilihi? Chuma muka mwakalinga kumauka kana?
1. Uno vyuma vanangula mukwitava chamakuli, vinalingisa ngachilihi vatu vamone Kalunga kupwa wamupi?
Kwitava chamakuli ‘chinatambasana muchano waKalunga nakwonga.’ (Wavaka-Loma 1:25) Chakutalilaho, mauka akwitava amavulu kawanangula vatu jawo lijina lyaKalungako. Oloze Mbimbiliya yahanjika ngwayo vatu vatela kuzachisa lijina lyaKalunga. (Wavaka-Loma 10:13, 14) Nge kunasoloka vyuma vyavipi, vatwamina vamwe vamumauka akwitava veji kwambanga ngwavo Kalunga ikiye najinyimo. Awa himakuli, mwomwo Kalunga kaneha vyuma vyavipiko. (Tanga WaYakova 1:13.) Chaluvinda, vyuma vyamakuli veji kunangulanga vinalingisa vatu vahone kuzanga Kalunga.
2. Uno vyuma veji kulinganga mumauka akwitava chamakuli vinalingisa ngachilihi vatu vamone Kalunga kupwa wamupi?
Mauka akwitava chamakuli kawazakama vatu ngana muze avazakama Yehovako. Mbimbiliya ngwayo jishili javaka-kwitava chamakuli “jinavulu nakuheta mwilu.” (Kusoloka 18:5) Hamyaka yayivulu, mauka akwitava anazananga muvihande vyamapolitiki, nakukundwiza jijita nakujihisa vatu vavavulu chikuma. Vatwamina vamwe vamumauka akwitava veji kutambulanga jimbongo kuli vatu javo mangana vapwenga nachiyoyelo chauhando. Vilinga kana vyasolola nge kavatachikiza Kalungako, kaha nawa kavatamoko kupwa vaka-kumwimanyinako.—Tanga WaYowano 1, 4:8.
3. Kalunga eji kwivwanga ngachilihi hamauka akwitava chamakuli?
Nge vyuma veji kulinganga mukwitava chamakuli vyeji kukwivwisanga kupihya kumuchima, nyi Yehova eji kwivwanga ngachilihi? Yehova azanga vatu. Oloze eji kupihililanga navatwamina vamukwitava vaze veji kulinganga vyuma vyavipi nakuyanjisa vatu javo. Atushika ngwenyi mwakafumisako kwitava chamakuli, kaha “kaveshi kukachimona chekako.” (Kusoloka 18:21) Kalinwomu Kalunga afumiseko kwitava chamakuli chosena.—Kusoloka 18:8.
LINANGULE VYAKUJIMINYINA
Wana vyavivulu vyakusolola omwo eji kwivwanga Kalunga havyuma veji kulinganga mukwitava chamakuli. Wana vyuma vyeka vize analinginga mauka akwitava chamakuli, novyo vyuma kana kavyatela kukuhonesa kulinangula hali Yehovako.
4. Kalunga ketavila mauka akwitava osenako
Vatu vavavulu vafwelela ngwavo mauka akwitava apwa kaha nge jijila jakututwala kuli Kalunga. Uno mukiko tahi? Tangenu Mateu 7:13, 14, nakushimutwila hachihula chino:
-
Vyuma muka yahanjika Mbimbiliya kutalisa kujila yakuya kukuyoya?
Talenu VINDIYO, nakushimutwila hachihula chinakavangizaho.
-
Kutala Mbimbiliya yahanjika ngwayo kwatwama mauka akwitava amavulu aze eji kwivwisanga Kalunga kuwaha tahi?
5. Mauka akwitava chamakuli kawasolola zangi yaKalungako
Kuli jijila jajivulu jize mauka akwitava analingishilamo vatu vamone Kalunga kupwa wamupi. Jila yimwe yayipi chikuma shina kwazana mujijita. Hakusaka mumone chakutalilaho, talenu VINDIYO. Kufumaho shimutwilenu havihula vinakavangizaho.
-
Vyuma muka valingile vaka-jichachi halwola kwapwile Jita yaKaye yamuchivali?
-
Uli nakwivwa ngachilihi havyuma valingile?
Tangenu Yowano 13:34, 35 na 17:16. Kufumaho shimutwilenu havihula vino:
-
Uno Yehova eji kwivwanga ngachilihi nge mauka akwitava nawazana mujita?
-
Mauka akwitava chamakuli akiko ali nakulingisa vatu valinge vyuma vyavipi vyavivulu. Unjiho muka unamono wakusolola nge mauka akwitava anahono kulondezeza Kalunga hakusolola zangi?
Mauka akwitava chamakuli kawalondezeza Kalunga hakusolola zangiko
6. Kalunga asaka kukafwa vatu vafume mukwitava chamakuli
Tangenu Kusoloka 18:4, a nakushimutwila hachihula chino:
-
Uli nakwivwa ngachilihi hakutachikiza ngwove Kalunga asaka kukafwa vatu vaze vanahungumwisa kumauka akwitava chamakuli?
7. Twalaho lika kulinangula hali Kalunga wamuchano
Uno vyuma veji kuhanjikanga mumauka akwitava chamakuli navize veji kulinganga vyatela kukulingisa umone Kalunga kupwa wamupi tahi? Achishinganyeke hali mwana uze mwalikanga kuli ise, nakufuma hembo nakuputuka jino kulinga vyuma vyavipi. Ou chisemi keshi kwivwila kuwaha vilinga vyamwanenyiko. Mwomwo ika nachipwila chakuhenga kuhana mulonga ou chisemi hachiyoyelo chamwanenyi?
-
Kutala nachipwa chakwoloka kuhana Yehova mulonga nakulitwamina kulinangula hali ikiye mwomwo yavyuma vali nakulinga mukwitava chamakuli tahi?
VATU VAMWE NGWAVO: “Kangweshi nakusaka kuhanjika vyakwitavako, mwomwo mauka akwitava akiko ali nakuneha ukalu wauvulu.”
-
Uno omwo mukiko washinganyeka nayove tahi?
-
Uno vyuma veji kulinganga mumauka akwitava vyatela kutulingisa tumone Yehova kupwa wamupi tahi? Mwomwo ika?
CHISHINA UNALINANGULA
Vyuma vanangula nakulinga mukwitava chamakuli vinalingisa vatu vamone Kalunga kupwa wamupi. Kalunga mwakanongesa kwitava chamakuli chosena.
Kuhituluka
-
Weji kwivwanga ngachilihi havyuma vanangula nakulinga mumauka akwitava chamakuli?
-
Uno Yehova eji kwivwanga ngachilihi havyuma veji kulinganga mumauka akwitava chamakuli?
-
Vyuma muka mwakalinga Kalunga kumauka akwitava kana?
WANA VYAVIVULU
Wana jijila jivali jize kwitava chamakuli cheji kulingisanga Kalunga apihilile.
“Uno Kwitava Chosena Cheji Kupandamisanga Vatu Kuli Kalunga Tahi?” (Chihande chili ha jw.org/lue)
Mwomwo ika Kalunga asakila tumulemeselenga hamwe navakwetu?
“Uno Mutu Atela Kupwa muLiuka lyaKwitava Tahi?” (Chihande chili ha jw.org/lue)
Kapilishitu umwe evwilenga kupihya havyuma valingilenga muliuka lyenyi. Oloze echi kachamuhonesele kulinangula muchano waKalungako.
“Ovyo Vyalingishile Kapilishitu Aseze Chachi Yenyi” (Tonenu!, February 2015)
Hamyaka yayivulu, mauka akwitava ananangulanga vyuma vize vinalingisa vatu vamone ngwavo Kalunga katuzakamako, wakukenyuka. Wana vyuma vitatu vyamakuli vize vananangulanga.
“Makuli Aze Alingisa Vatu Vahone Kuzanga Kalunga” (Chihande chamuKaposhi Kakutalila)
a Hakusaka utachikize ovyo mukanda waKusoloka wafwanyishila kwitava chamakuli kupwevo uze vavuluka ngwavo Mbavilone Yayinene, tala Chinyikilo chakusongo 1.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
